زارداپ شەككەندەردىڭ ەكەۋى جانساقتاۋ بولىمىندە جاتىر، دەپ حابارلايدى قازاقپارات ءتىلشىسى.
وقيعا 25 -مامىر كۇنى سوڭعى قوڭىراۋدان كەيىن، الماتى-تالدىقورعان تاسجولىنىڭ بالپىق بي مەن باقتىباي اۋىلىنىڭ اراسىندا بولعان.
دارىگەرلەردىڭ سوزىنشە، تۇسكى ساعات ءبىر شاماسىندا 2001-2002 -جىلى تۋعان 4 ادام اۋرۋحاناعا جەتكىزىلگەن. ولاردىڭ ۇشەۋى ءبىر مەكتەپتىڭ تۇلەگى. كولىك تىزگىنىندە سولاردىڭ ءبىرى بولعان. قازىر ەكى ناۋقاس جانساقتاۋ بولىمىندە جاتىر. ءبىرىنىڭ جاعدايى اۋىر، ارنايى اپپاراتتىڭ كومەگىمەن تىنىس الۋدا. ونىڭ مويىن ومىرتقاسى سىنىپ، جۇلىنىنا زاقىم كەلگەن. بىردەن وتا جاسالعان.
«ومىرتقاسى ورنىنا قويىلدى. ءبىراق ءالى ناتيجە جوق. ناۋقاستىڭ جاعدايى اۋىر. ەكىنشى ناۋقاستىڭ سان سۇيەگى سىنعان. توبىقتارى سىنعان. ءبىر-ەكى كۇندە وبلىستىق اۋرۋحاناعا اۋىستىرىلىپ، وپەراتسيا جاسالادى»، - دەدى كوكسۋ اۋداندىق اۋرۋحاناسىنىڭ دارىگەرى شىڭعىس راحيموۆ.
ال زارداپ شەككەن وزگە ەكى جاس جاراقاتتارىنىڭ جەڭىل بولۋىنا بايلانىستى ۇيلەرىنە جىبەرىلگەن.
«كولىك اپاتىنا تۇسكەن ءۇش بالا ءبىزدىڭ مەكتەپتىڭ بيىلعى تۇلەكتەرى. ولاردىڭ اتا-انالارىنا ەسكەرتىلگەن. بالالارىڭىزعا قاراڭىزدار، قازىر ولاردىڭ الىپ-ۇشىپ وتىرعان ۋاقىتى دەپ تە ايتىلدى. ەندى ءبىز اماندىعىن عانا تىلەپ وتىرمىز. انىقتامالارىن اكەپ بەردى، ەمتيحاندارىنان بوساتىلادى، ولاردى ساۋىققاننان كەيىن تاپسىرادى»، - دەدى تالدىقورعان قالاسىنا قاراستى ەركىن اۋىلىنداعى №11 -مەكتەپتىڭ ديرەكتورى گۇلبارشىن بەيسەكەنوۆا.