بوزبالا بولسا كەرەك. 32-1928-جىلدارى گولوشەكين قازاقستاندا كىشى رەۆوليۋتسيا وتكىزىپ، بايلاردى، ءال-اۋقاتتىلاردى، كەيىننەن ورتا شارۋانى كامپەسكەلەپ، سوتتاپ، اباقتىعا جاۋىپ، جالپى قازاقتى الدىنداعى مالىنان ايىرىپ، اشارشىلىققا ۇشىراتتى. سول كەزدەگى حالىق ساناعى بويىنشا 6 ميلليون قازاقتان اشارشىلىقتان كەيىن 3 ميلليون قازاق امان قالدى.
مەنىڭ اكەمنىڭ اكەلەرى باي، ءال-اۋقاتتى ءومىر سۇرسە كەرەك. باي بولعاندارى ءۇشىن كامپەسكەگە ىلىنگەن، اباقتىعا جابىلعان، قۋعىن-سۇرگىن كورگەن. سول كەزدەردە اكەمنىڭ اكەسىنىڭ ءىنىسى احمەت اتامىزدىڭ ۇيىندە توقتى باسىنداي التىنى بولعان ەكەن. قاراڭعى قازاق ءۇيى ىشىندە، تۇندىكتەن تۇسكەن كۇن ساۋلەسىنە سول التىندى ۇستاپ كورسە، ءۇي ءىشى قىزعىلت ساۋلەلەنىپ كەتەدى ەكەن. سوعان قاراعاندا ساف التىن بولسا كەرەك.
احمەت اتامىز مەنىڭ اكەمە بىلاي دەگەن ەكەن: «بايسەيىت، مەن اناۋ سەندەرگە كورسەتكەن التىندى ور قورانىڭ ءبىر شەتىنە كومىپ، تىقتىم. جانىندا ءبىر ناگان بار كيىزبەن وراپ، جەلىمدەپ، سىرتىنا بالاۋىز جاقتىم شىرىمەس ءۇشىن. مىنا دۇربەلەڭ بىتكەن سوڭ قازىپ تاۋىپ الىڭدار. قاجەتتەرىڭە جاراتساڭدار ولمەسسىڭدەر» - دەيدى. ول ور قورا دەگەنى ەنى 500 م، ۇزىندىعى دا سونداي 1,5 مەتر ور قازىلعان، توپىراعى جاعاسىنا ۇيىلگەن قوي قورا ەكەن. سول ور قورانىڭ ورنى قازىر دە بار. الىستان قاراساڭ نوبايى كورىنەدى. ال التىننىڭ قاي شەتىندە جاتقانى ءبىر اللاعا ءمالىم.
ال مەنىڭ اكەم اۋمالى-توكپەلى زاماندا، ول التىندى ىزدەمەگەن. ءوزى باي بالاسى بولعانى ءۇشىن 90 كۇن اباقتىعا جابىلعان، ايتەۋىر امان-ەسەن شىققان. كەيىن ەكىنشى دۇنيەجۇزىلىك سوعىس باستالىپ، ول التىن ۇمىت بولعان. احمەت اتامىز سول تۇرمەدەن ورالماعان. ونىڭ ۇستىنە باي تۇقىمى بولعانى ءۇشىن اباقتىعا جابىلاتىن زاماندا التىندى ىزدەۋ، وزىڭە-ءوزىڭ جاۋ بولعانمەن پارا-پار عوي.
سول التىن تىعىلعان ور قورانىڭ ورنىن كەيىن اكەم ماعان كورسەتكەن ەدى. ول 76-1975 -جىلدار ەدى. اكەم مارقۇم 1979-جىلى بۇل ومىردەن وزدى. ال التىن تىعىلعانتور قورا، مەركى اۋدانىنىڭ ءبىر كىشكەنە اۋىلىندا، توبە استىندا، سايدا ورنالاسقان. ول سوم التىن ەگەر بار بولسا، قۇبىر ىزدەگىش نەمەسە ميناىزدەگىشپەن قوپارىپ تاۋىپ الۋعا بولاتىن سياقتى. ءبىراق بالەنشە جىل وتكەن سوڭ ول التىن ءالى بار ما؟ الدە بىرەۋ تاۋىپ العان شىعار دەگەن كۇدىك وي كەجەگەڭدى كەيىن تارتادى. ال ەگەر بار بولسا شە؟ وسى وي ءۇمىتىڭدى وياتادى.
«ءاي، ول التىن جوق ەكەن. بىرەۋ تاۋىپ قازىپ العان عوي» دەپ ءدۇدامال كوڭىلگە، سۇراققا نۇكتە قويىپ، تىنىشتالعىڭ كەلەدى. مۇمكىن، ءالى جاتقان شىعار، تاۋىپ الارمىن دەگەن ءۇمىت تاعى بار. وسى ويلارمەن كەيدە ارپالىسىپ جۇرەمىن. تابىلماعان التىن بار ما، جوق پا؟ بىلمەدىم.