ونى قازاقستاندىق تاپقىر ورەندەر ويلاپ تاپتى، دەپ حابارلايدى قازاقپارات قوردىڭ باسپا ءسوز قىزمەتىنە سىلتەمە جاساپ.
«Age of Business» («بيزنەس ءداۋىرى») - بيزنەس-پروتسەسس ەلەمەنتتەرىنەن جانە قارجى، ەكونوميكا، ينۆەستيسيا جونىندەگى ۆيكتورينالىق سۇراقتاردان قۇرالعان ۇستەل ويىنى. يدەيا اۆتورى - كاسپي ۋنيۆەرسيتەتىنىڭ ستۋدەنتتىك كومانداسى. ولار ءوز جوباسىن شىندىققا اينالدىرۋ ءۇشىن تۇڭعىش پرەزيدەنت قورىنىڭ گرانتىن جەڭىپ الدى.
جاستار بەسىنشى جىل قاتارىنان «تىرەگى سەندەر ەلىمنىڭ» ستۋدەنتتەر فەستيۆالى اياسىندا ۇيىمداستىرىلعان رەسپۋبليكالىق «جاس تولقىن» وليمپياداسىنىڭ گران-پريىن يەلەندى. وليمپيادا جاستاردى يننوۆاتسيالىق ورتاعا تارتۋدى كوزدەيتىن بىرنەشە كونكۋرستىق تاپسىرمادان تۇرادى.
«جاس تولقىننىڭ» قاتىسۋشىلارى جالپى ءبىلىم پاندەرى بويىنشا سۇراقتارعا جاۋاپ بەردى، ستۋدەنتتىك ءومىر تۋرالى روليكتەر كورسەتتى، دەنە دايىندىعى بويىنشا پرەزيدەنت سىناعىن تاپسىردى جانە «ميلليونعا تاتيتىن يدەيا» كەزەڭىندە يننوۆاتسيالىق بيزنەس-جوبالارىن قورعادى. سوڭعى تۋرداعى باستى تالاپ - جوبا جاڭاشىلدىققا تولى، جاستارعا ارنالعان، ال باستاپقى ينۆەستيسيا ءبىر ميلليون تەڭگەدەن اسپاۋى كەرەك.
تۇڭعىش پرەزيدەنت قورىنىڭ گرانتىن جەڭىپ الۋ ءۇشىن نۇر-سۇلتان، الماتى، اقتوبە، قاراعاندى جانە پاۆلوداردان كەلگەن 7 ستۋدەنتتىك كوماندا باق سىنادى. ستۋدەنتتەردىڭ يدەيالارى ادام ءومىرىنىڭ ءتۇرلى سالالارىن قامتىدى. جاس قازاقستاندىقتاردىڭ يننوۆاتسيالىق جوبالارىنىڭ ىشىندە تۇرمىسى تومەن وتباسىلارعا كومەكتەسەتىن سايت، قوقىستى ءبولىپ جيناۋ جۇيەسى، دۇرىس تاماقتانۋ بۋفەتى، سۋدى جانە ەلەكتر قۋاتىن گەنەراتسيالايتىن قۇرىلعى جانە سونداي-اق فيتوقابىرعا بولدى.
دەگەنمەن، وليمپيادا قورىتىندىسى بويىنشا ءادىل قازى القاسى ءبىراۋىزدان «Age of Business» ۇستەل ويىنىنىڭ اۆتورلارىن جەڭىمپاز دەپ تانىدى. قالعان 6 كوماندا تۇڭعىش پرەزيدەنت قورىنىڭ باعالى سىيلىقتارىمەن ماراپاتتالدى.