ەرجاننىڭ اناسى گۇلميرا الىبەكتىڭ ايتۋىنشا، ۆالەري مەلادزەنىڭ كومانداسىندا بولعان 11 جاسار ۇلى «جەكپە-جەكتەر» كەزەڭىنەن سۇرىنبەي ءوتتى.
وندا ورالدىق جاس ءانشى ءوزى سياقتى كونكۋرسقا قاتىسىپ جاتقان يۆان ستاريكوۆ جانە يسلام بالكويەۆپەن مۋسليم ماگومايەۆتىڭ «سينيايا ۆەچنوست» ءانىن ورىندادى. تالىمگەرى ۆ. مەلادزە وسى ۇشەۋىنىڭ ىشىنەن ەرجاندى تاڭدادى.
باعدارلاما سوڭىندا قاتىسۋشىلار تاعى دا ىرىكتەلدى. سونىڭ ناتيجەسىندە ەكى فيناليست انىقتالدى. ە. ماكسيممەن بىرگە ميحايل گريگوريانعا فينالعا جولداما بەرىلدى.
ونىڭ الدىنداعى سىندا ەرجان اندرەا بوچەلليدىڭ «Ama credi e vai»ءانىن ورىنداپ، تاماشا داۋىسىمەن قازىلار القاسىن تاڭعالدىرعان بولاتىن. قازىلار سۆەتلانا لوبودا، پەلاگەيا جانە ۆالەريي مەلادزە ۇشەۋى بىردەي بۇرىلىپ، قازاقستاندىق جاس ورىنداۋشىنى وزىنە باۋلۋعا الۋعا ىقىلاس ءبىلدىردى. ەرجان سولاردىڭ ىشىنەن اتاقتى ءانشى ۆالەري مەلادزەنى تاڭداعان ەدى.
«جەكپە-جەكتەر» كەزەڭى 2- ناۋرىزدا ءوتتى. تەك بايقاۋدىڭ ەرەجەسى بويىنشا ناتيجەسىن ەشكىمگە ايتۋعا بولمايتىن ەدى. سوندىقتان قورىتىندىسى كەيىن بەلگىلى بولىپ جاتىر. ەندى 19- ساۋىردە قوسىمشا كەزەڭ، 26- ساۋىردە فينال جانە سۋپەرفينال بولادى. ەرجاننىڭ ورالداعى ۇستازى - بەلگىلى ءانشى داريا باقىتوۆا. اقتاۋداعى ۆوكاليست ۇستازى - نۇرگۇل مەدەربەكوۆا. قازىر اقتاۋ قالاسىندا دايىندالىپ جاتىرمىز»، دەدى قازاقپارات تىلشىسىنە گ. الىبەك.
ەرجان ماكسيم - جاستىعىنا قاراماستان، رەسپۋبليكالىق، حالىقارالىق دودالارعا قاتىسىپ، توپ جارىپ ۇلگەرگەن ءانشى.
ەسكە سالا كەتەيىك، بۇدان بۇرىن ە. ماكسيمنىڭ ريگادا وتكەن فەستيۆالدا ءۇش مارتە جۇلدەگەر اتانعانىن، يتاليانىڭ سان-رەمو قالاسىندا ءبىرىنشى ورىندى يەلەنگەنىن جازعان بولاتىنبىز.