«بۇل قىلمىسقا كۇدىكتى رەتىندە الماتى وبلىسىنىڭ تۇرعىنى، 33 جاستاعى ايدوس ۋاليەۆ ۇستالدى. قانداي قىلمىستى بولسىن اشكەرەلەۋ كەزىندە پوليتسيا قىزمەتكەرلەرى ۇلكەن جۇمىس اتقارادى. بۇل قىلمىستى اشۋ كەزىندە 45 كامەرانىڭ كادرلارى قارالدى. ونىڭ 5 ەۋىندە قىلمىسكەر وتىرعان Hyundai كولىگى كورىنەدى. وسى كولىكتى تابۋ ءۇشىن ءبىز 156 كولىكتى تەكسەردىك. بۇل قىلمىس تا اشىلدى. كۇدىكتى ەر ادام قاسىندا تۇرعان Range Rover كولىگىنىڭ دە ايناسىن الىپ كەتكەنى تۇسىنىكتى بولدى»، - دەيدى قالالىق پوليتسيا دەپارتامەنتىنىڭ باسشىسى سەرىك كۇدەبايەۆ.
ايتا كەتۋ كەرەك، مۇنىڭ الدىندا وليمپيادا چەمپيونى دميتري بالانديننىڭ قۇرمانعازى- بايسەيىتوۆا كوشەلەرىنىڭ قيىلىسىندا تۇرعان كولىگىنىڭ ايناسى ۇرلانعانى تۋرالى اقپارات تاراتقان بولاتىنبىز. كوپ ۇزاماي پوليتسيا ۇرىنىڭ ۇستالعانى جونىندە مالىمدەدى. مۇلكىنە زاقىم كەلتىرگەن ادامنىڭ ۇستالعانىنا ريزا بولعان وليمپيادا چەمپيونى پوليتسياعا العىس ايتتى.