قازاقستاندىق پوليسياعا ادام ۇرلانعانى جونىندەگى حابارلاما قىتاي حالىق رەسپۋبليكاسى ەلشىلىگىنەن كەلىپ ءتۇستى. قىتايلىق بيزنەسمەننىڭ 37 جاستاعى جۇبايى وسى ەلشىلىككە كومەك سۇراپ جۇگىنگەن ەكەن.
ايەلدىڭ ايتۋىنشا، وعان بەلگىسىز بىرەۋلەر تەلەفون شالىپ، كۇيەۋىن ۇرلاپ كەتكەندەرىن حابارلاپ 400 مىڭ يۋان (22,5 ميلليون تەڭگە) تالاپ ەتكەن.
قىلمىستى اشۋ ماقساتىندا الماتى قالاسى پوليسيا دەپارتامەنتىندە جەدەل- تەرگەۋ توبى قۇرىلدى. العاشقى مينۋتتاردان باستاپ پوليسيا قىزمەتكەرلەرى بارلىق قاجەتتى جەدەل جانە ارنايى ءىس- شارالاردى جۇرگىزدى. ناتيجەسىندە كۇدىكتىلەردىڭ جەكە باسى انىقتالدى.
ءسال كەيىنىرەك پوليسيانىڭ جەدەل قىزمەتتەرى ارنايى ءبولىنىس جاۋىنگەرلەرىمەن ۇرلانعان ادامدى قۇتقارۋ بويىنشا وپەراتسيالار جۇرگىزدى.
قىلمىسقا قاتىسۋشىلاردىڭ بارلىعى ۇستالىپ، قاماۋعا الىندى. ولاردىڭ ءار قايسىنىڭ مىندەتى تەرگەۋمەن انىقتالاتىن بولادى. قازىر ولاردىڭ وزگە قىلمىستارعا قاتىستىلىعى تەكسەرىلۋدە.
«قازاقستان ۇكىمەتىنە، ىشكى ىستەر مينيسترىنە، الماتى قالاسىنىڭ پوليتسەيلەرىنە مەنىڭ جۇبايىمنىڭ كومەك سۇراعان وتىنىشىنە كوڭىل قويىپ، مەنى جەدەل قۇتقارعاندارى ءۇشىن ۇلكەن راحمەتىمدى ايتامىن. ءىستىڭ وسىلاي تەز شەشىلگەنىنە مەن وتە قۋانىشتىمىن. قىتاي حالىق رەسپۋبليكاسىنىڭ ەلشىلىگىنە دە ارنايى العىسىمدى بىلدىرەمىن. مەن قازاقستانعا مىندەتتى تۇردە تاعى كەلەمىن. مۇندا ادامداردىڭ قاۋىپسىزدىگى ءبىرىنشى ورىندا تۇرعانىنا كوزىم جەتتى» ، - دەپ ريزاشىلىعىن ءبىلدىردى جابىرلەنۋشى بيزنەسمەن.
بۇگىن قىتاي حالىق رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى جان شياۋ قازاقستان رەسپۋبليكاسى ءى ءى م- نە ارنايى كەلىپ، ءمينيستردىڭ وزىنە جانە بارلىق پوليسيا قىزمەتكەرلەرىنە ۇرلانعان قىتاي ازاماتىن تاۋىپ، قۇتقارعانى ءۇشىن العىسىن ءبىلدىردى.
ول بۇل ءىستىڭ تاۋلىك ىشىندە تەز اشىلعانىن ەستىگەندە، تاڭ قالعانىن جاسىرمادى. ەلشى قىلمىستى اشۋعا قاتىسقان ءى ءى م- ءنىڭ بارلىق قىزمەتكەرلەرىنە ءوزىنىڭ العىسىن ايتىپ، بۇل قازاقستاندىق پوليسيانىڭ كاسىبيلىگى مەن جوعارى جاۋاپكەرشىلىگىن كورسەتەتىنىن اتاپ ءوتتى.
جان چياۋ ءوز سوزىندە ەكى ەلدىڭ قۇقىق قورعاۋ ورگاندارى جەلىسى بويىنشا جەمىستى ىنتىماقتاستىق بولاتىنىنا سەنىم ارتىپ، بۇل ىنتىماقتاستىق قوس مەملەكەتكە جانە ونىڭ حالقىنا ءتيىمدى بولاتىنىن جەتكىزدى.