التىنشى شاقىرىلعان ق ر پارلامەنتىنىڭ ءۇشىنشى سەسسياسىنىڭ اشىلۋىندا ەلباسى نۇرسۇلتان نازاربايەۆ تىكەلەي ينۆەستيتسيالاردى تارتۋعا جانە ەكسپورتتىق ءوندىرىستى ىنتالاندىرۋعا باستى نازار اۋدارىلاتىنىن ايتقان بولاتىن. وسىعان بايلانىستى ۇكىمەتكە ارنايى ەكونوميكالىق جانە يندۋستريالىق ايماقتار بويىنشا زاڭنامانى جاقسارتۋ تاپسىرىلعان ەدى.
وسى ورايدا ءتيىستى زاڭ جوباسىن سەناتورلارعا ق ر يندۋستريا جانە ينفراقۇرىلىمدىق دامۋ ءمينيسترى رومان سكليار تانىستىردى.
اتاپ ايتقاندا، قۇجاتتا يندۋستريالىق ايماقتاردىڭ قىزمەتىن قۇقىقتىق رەگلامەنتتەۋ ەسكەرىلگەن.
«زاڭنامادا يندۋستريالىق ايماقتار قۇرىلعاننان قىزمەت اتقارىپ، تاراتىلعانعا دەيىنگى بارلىق سيكل قاراستىرىلعان. ارنايى ەكونوميكالىق جانە يندۋستريالىق ايماقتاردىڭ قاتىسۋشىلارىنا جەر ۋچاسكەلەرىن بەرۋدىڭ جاڭا تەتىگى ەنگىزىلدى. جەر ۋچاسكەلەرى باسقارۋشى كومپانيالارعا ۋاقىتشا پايدالانۋعا بەرىلەدى. ال باسقارۋشى كومپانيا ول ۋچاسكەلەردى اتالعان ايماقتاردىڭ قاتىسۋشىلارىنا ءوز ەركىمەن بەرە الاتىن بولادى. بۇل تەتىك ارنايى ەكونوميكالىق جانە يندۋستريالىق ايماق قاتىسۋشىلارىنىڭ جەر ۋچاسكەلەرىن الۋ مەرزىمىن قىسقارتۋعا مۇمكىندىك بەرەدى، سونداي- اق ءتۇرلى رۇقسات بەرۋ قۇجاتتارىن الۋدى جەڭىلدەتەدى» ، - دەدى ر. سكليار.
بەلگى بولعانداي، ارنايى ەكونوميكالىق جانە يندۋستريالىق ايماقتاردىڭ باسقارۋشى كومپانيالارىن قارجىلاندىرۋ قاراستىرىلادى جانە جاۋاپكەرشىلىگى بەكىتىلەدى.
وسى ورايدا قارجىلاندىرۋ تەك باسقارۋشى كومپانيانىڭ 100 پايىز اكتسيالارى مەملەكەتكە تيەسىلى بولعان جاعدايدا عانا جۇزەگە اسىرىلادى. ۇكىمەتتىڭ شەشىمى بويىنشا ارنايى ەكونوميكالىق ايماقتاردىڭ قىزمەت ەتۋ مەرزىمىن ۇزارتۋ مۇمكىندىگى قاراستىرىلدى.