«نەگىزى، بۇل جوباعا قاتىستى جۇمىستاردى ءبىز پارتيا جانىنان قۇرىلعان بالالار قۇقىعىن قورعاۋ كەڭەسى اياسىندا باستاپ كەتكەن بولاتىنبىز. ەندى، ەلباسى، پارتيا ءتوراعاسىنىڭ تاپسىرماسىنا سايكەس، وسى جۇمىستاردى جانە جەرگىلىكتى اكىمشىلىكتەر اتقارىپ جاتقان جۇمىستى جۇيەلەپ، بىرىكتىرىپ، جاڭا ۇلتتىق «باقىتتى وتباسى» جوباسى اياسىندا وتكىزەتىن بولامىز» ، - دەدى پارتيا حاتشىسى تامارا دۇيسەنوۆا استانادا وتكەن جيىندا.
جوبانىڭ نەگىزگى ماقساتى - قازاقستاندىق وتباسىلار مەن بالالاردىڭ ءال- اۋقاتىن ارتتىرۋ. اتالعان ماقساتقا جەتۋدىڭ ءۇش جولى انىقتالىپ وتىر. سونىڭ ءبارى كەزەڭ- كەزەڭمەن ىسكە اسىرىلادى.
پارتيا حاتشىسىنىڭ ايتۋىنشا، فيليالدار مەملەكەتتىك جانە جەرگىلىكتى ورگاندارمەن بىرلەسە وتىرىپ، قيىن جاعدايدا وتىرعان وتباسىلاردى انىقتايدى. ول ءۇشىن ارنايى توپتار ۇيلەردى ارالايدى. سونىڭ ءبارى حالىقتىڭ الەۋمەتتىك كارتاسىندا كورسەتىلەدى.
«نەگىزى، وسى جۇمىس جەرگىلىكتى جەردە باستالىپ كەتتى. پارتيا فيليالدارى دا اتسالىسىپ جاتىر. سونىڭ نەگىزىندە كەدەيشىلىك شەگىنەن تومەن وتباسىلارعا كومەك بەرىلەدى. ال ونداي وتباسىدا جۇمىسقا جارامدى ادامدار بولسا، ولارعا ارنايى وقۋ كۋرستارىنان وتۋگە، گرانت پەن شاعىن نەسيە الۋعا ۇسىنىس جاسالادى. بۇدان بولەك، باسپاناعا ءزارۋ كوپبالالى جانە تولىق ەمەس وتباسىلارعا ارەندالىق پاتەرلەر بەرىلەدى. بۇنىڭ بارلىعىن مەملەكەتتىك جانە جەرگىلىكتى اتقارۋشى ورگاندار ىسكە اسىرادى. ال پارتيا فيليالدارى باقىلاۋ جاسايدى» ، - دەيدى ت. دۇيسەنوۆا.
ونىڭ سوزىنە قاراعاندا، پارتيا فيليالدارى ءوز كەزەگىندە ۇكىمەتتىك ەمەس ۇيىمداردىڭ كومەگىمەن قوسىمشا قولداۋ شارالارىن ۇيىمداستىرادى. ماسەلەن، اتاۋلى كومەكتى الاتىن وتباسىلاردى انىقتاۋمەن قاتار قيىن جاعدايعا تاپ بولعان وتباسىلار دا ەسەپكە الىنادى. ولارعا جان- جاقتى قۇقىقتىق كومەك كورسەتىلەدى. ۇيدە وتىرىپ، جۇمىس جاساۋعا مۇمكىندىك جاسالادى.
«بۇگىندە جەرگىلىكتى اتقارۋشى ورگانداردىڭ وتباسىلاردى قولداۋعا ارنالعان بارلىق جوبالارى مەن پارتيا فيليالدارىنىڭ شارالارى «باقىتتى وتباسى» ۇلتتىق جوباسى اياسىندا توپتاستىرىلاتىن بولادى. بۇل - ۇلتتىق جوبا. ءبىز ونى بىرلەسىپ اتقاراتىن بولامىز» ، - دەپ اتاپ كورسەتتى ت. دۇيسەنوۆ.
ايتا كەتەيىك، بۇگىنگى جيىندا ماۋلەن اشىمبايەۆ پارتيا فيليالدارىنىڭ كەمشىن تۇسىن اتادى.
«ماسەلەن، جايىق وزەنىن الايىق، جەلتوقسان ايىنان بەرى بالىقتار قىرىلدى. قازىر وسى ماسەلە وزەكتى پروبلەماعا اينالدى. سونىڭ ىشىندە قولدان وسىرىلگەن بەكىرە تۇقىمداس بالىقتار دا بار. بۇل - وتە قىمبات ءونىم. سودان ۇلكەن شىعىن كەلدى. پارتيانىڭ اتىراۋ وبلىستىق فيليالى بولسا، وسى ماسەلەنى مەملەكەتتىك ورگاندارعا جەتكىزىپ، ساراپشىلاردىڭ كومەگىمەن ناقتى سەبەبىن ىزدەۋدىڭ ورنىنا ورتالىققا «ءبارى جاقسى» دەپ حات جازىپ وتىر. «سەنبىلىك كەزىندە ءبارىن تازارتىپ تاستايمىز» دەيدى. ونداي حات-حابارلاردىڭ قاجەتى قانشا؟ ماسەلەنى شەشۋمەن اينالىسۋ كەرەك. ايماقتا پروبلەما بولسا، ونى دەر كەزىندە كوتەرىپ، مەملەكەتتىك ورگاندارعا جەتكىزۋ كەرەك» ، - دەدى م. اشىمبايەۆ.