بيىل مەرەكە الەمدە 15- ناۋرىزدا تويلانادى. ال، الماتى زووباعى بيىل ءبىرىنشى رەت تىنىشتىق ساعاتىن وتكىزىپ وتىر.
«جانۋارلار اعزاسى ءۇشىن دە ۇيقىنىڭ ماڭىزى جوعارى. ولار دا ۇيىقتاعاندى، كۇن شۋاعىنا قىزدىرىنعاندى جاقسى كورەدى. بۇل كۇنى كەز كەلگەن ادام زووباققا كەلىپ، جانۋارلاردىڭ مىزعىعانىن تاماشالاي الادى. بىزدە ەڭ قۇس ۇيقىلى نەمەسە كەرىسىنشە ەڭ ماۋباس جانۋارلار بار»، - دەدى زووباقتىڭ ديرەكتورىنىڭ مىندەتىن اتقارۋشى ايگۇل تولەيەۆا.
زووباقتىڭ فوتوگرافى ميحايل سوروكوۋموۆ جانۋارلاردىڭ ۇيقىسىن باقىلاپ جۇرگەن مامانداردىڭ ءبىرى.
«ۇيقىسىز ەشقانداي جانۋار دۇرىس ءومىر سۇرە المايدى. زووباقتا بۇل پروتسەستى كورۋگە بولادى. ايۋلار اياقتارىن سوزىپ ۇيىقتاعاندى ۇناتادى. ەگەر كىرەكەي (ۇرعاشى ايۋ- اۆت) قاسىندا قونجىعى بولسا، ول بالالارىن قۇشاقتاپ جاتادى. جابايى مىسىقتار، ارىستاندار مەن بارىستار ءبىر بۇيىرلەپ جاتقاندى ۇناتادى»، - دەدى ميحايل سوروكوۋموۆ.
عالىمداردىڭ ايقىنداۋىنشا، جىرتقىشتار تابيعاتتا ەڭ ۇزاق ۇيىقتايدى ەكەن. ال ءشوپ قورەكتى تۇياقتىلار ەڭ سەرگەك ۇيىقتايتىن جانۋارلار.
مىسىق تەكتەستەر - تۇنگى جانۋارلار. ولار كۇندىز 14 ساعاتتاي ۇيىقتاپ، تۇندە جورىققا شىعادى.
«كەرىكتەر بىرنەشە اپتا بويى ۇيقىسىز ءومىر سۇرە الادى. ولارعا ەكى ساعات مىزعىپ الۋ جەتكىلىكتى. كەرىكتەر قاۋىپسىزدىك ءۇشىن كوپ ۇيىقتاي المايدى. ۇيىقتاسا دا ءجيى ويانىپ، جان- جاعىن ءجيى باقىلاپ تۇرادى. ولار تىك تۇرىپ الىپ، موينىن جون ارقاسىنا توسەپ ۇيىقتاي الادى. پىلدەر باسىن جوعارى كوتەرىپ ەتپەتىنەن جاتادى. پىلدەرگە 3 ساعات ۇيقى جەتەدى. ءبىزدىڭ قىزمەتكەرلەر وسى ۋاقىتقا دەيىن ءپىلدىڭ نەمەسە كەرىكتىڭ ۇيىقتاعان ءساتىن كورگەن جوق»، - دەدى ميحايل سوروكوۋموۆ.
كوپتەگەن جانۋارلار توپتاسىپ ۇيىقتايدى. پىلدەر مەن تۇلكىلەر ءبىر- بىرىنە ۇيىسىپ ۇيىقتايدى.
بۇعى، تاۋ ەشكىلەرى سياقتى ءمۇيىزدى جانۋارلار ۇيىقتاعان كەزدە مۇيىزدەرىنىڭ سالماعى باسىپ كەتپەس ءۇشىن تەپە- تەڭدىك ساقتاپ ەتپەتىنەن جاتادى. قوقيقاز ءبىر اياعىن كوتەرىپ الىپ، باسىن قاناتىنىڭ استىنا تىعىپ الىپ مىزعيدى. ونىڭ كوزى جان- جاقتى باقىلاۋ ءۇشىن ۇنەمى اشىق تۇرادى.
اۆتور: گۇلميرا عوسمانالي