ۆيتسە-ءمينيستردىڭ ايتۋىنشا، بۇگىندە بالا ءبىر جاسقا تولعانعا دەيىن مەملەكەتتىك جاردەماقىدان بولەك مىندەتتى الەۋمەتتىك ساقتاندىرۋ قورىنان دا الەۋمەتتىك تولەمدەر بەرىلەدى. ءبىراق انا ءبىر جىل تولماي، جۇمىسقا شىعىپ كەتسە، ونداي تولەمدەر توقتاتىلىپ وتىرادى. ەندى، قوردىڭ تولەمدەرىن بالا ءبىر جاسقا تولعانشا ارى قاراي جالعاستىرۋ ۇسىنىلىپ وتىر. ءبىراق اتالعان اقىنىڭ مولشەرى مەملەكەتتىك جاردەماقى دەڭگەيىنە دەيىن تومەندەتىلەدى.
«جاڭا تۋعان بالالاردى جانە ولاردىڭ اتا-انالارىن قامسىزداندىرۋ ماقساتىندا الۋشى ەڭبەك قىزمەتىن قايتا قالپىنا كەلتىرگەن جاعدايدا الەۋمەتتىك تولەمدى جالعاستىرۋ ۇسىنىلادى، بۇل رەتتە مەملەكەتتىك الەۋمەتتىك ساقتاندىرۋ قورىنان تولەنەتىن الەۋمەتتىك تولەمنىڭ مولشەرى مەملەكەتتىك جاردەماقى دەڭگەيىنە دەيىن تومەندەتىلەتىن بولادى. سوسىن انانىڭ بالا كۇتىمى بويىنشا دەمالىستا بولعان كەزەڭىندە ول ءۇشىن مەملەكەت بۇرىنعىداي ونىڭ دەكرەتتىك دەمالىسقا شىققانعا دەيىن ءبىرىڭعاي جيناقتاۋشى زەينەتاقى قورىنا اۋدارعان مىندەتتى زەينەتاقى جارنالارىن تولەيدى»، - دەدى س. جاقىپوۆا بۇگىن ق ر پارلامەنت ماجىلىسىندە وتكەن جيىندا.
وسى ورايدا ۆيتسە-مينيستر ءبىر جاسقا تولعانعا دەيىنگى بالا كۇتىمى بويىنشا رەسپۋبليكالىق بيۋدجەتتەن تولەنەتىن جاردەماقىنىڭ 2020 -جىلعى مولشەرىن دە جاريالادى. ءبىر بالاعا - 15050 تەڭگە، ەكى بالاعا - 17794 تەڭگەنى، ءۇش بالاعا - 20512 تەڭگە، ءتورت جانە ودان كوپ بالاعا - 23255 تەڭگە. مىندەتتى الەۋمەتتىك ساقتاندىرۋ ماسەلەلەرى بويىنشا كەيبىر زاڭنامالىق اكتىلەرگە قاتىستى وزگەرىستەر كەلەسى جىلدان باستاپ كۇشىنە ەنەتىن بولسا، بالا كۇتىمىمەن وتىرعان انالار ءبىر جىلعا جەتپەي، جۇمىسقا شىعىپ كەتسە، اتالعان مەملەكەتتىك جاردەماقىلاردىڭ كولەمىندە الەۋمەتتىك تولەمدەردى الا بەرەدى.
«زاڭ جوباسى ماجىلىسكە ەندى وتكىزىلدى. ەگەر ءماجىلىس قابىلداپ، سەناتتان ءوتىپ، ەلباسى قول قوياتىن بولسا، جوسپار بويىنشا بارلىق شارالار 2020 -جىلدىڭ 1 -قاڭتارىنان باستاپ جۇزەگە اسادى»، - دەپ اتاپ كورسەتتى س. جاقىپوۆا.
ايتا كەتەيىك، بۇگىن ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا دەپۋتاتتارعا مىندەتتى الەۋمەتتىك ساقتاندىرۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر ەنگىزۋ تۋرالى زاڭ جوباسىن تانىستىردى. ونىڭ ايتۋىنشا، زاڭ جوباسىن قابىلداۋدىڭ ناتيجەسىندە ەڭبەك ەتۋ قابىلەتىنەن، اسىراۋشىسىنان جانە جۇمىسىنان ايىرىلۋ بويىنشا تولەمدەردىڭ ورتاشا مولشەرى ورتا ەسەپپەن 30-36 پايىزعا دەيىن وسەدى. حالىق مىندەتتى الەۋمەتتىك ساقتاندىرۋ جۇيەسىنە كوبىرەك قاتىسادى. ءسويتىپ، رەسمي تۇردە جۇمىس ىستەيتىن ادامداردىڭ سانى ارتادى دەگەن بولجام بار.
ۆيتسە-مينيستر ەڭبەك ەتۋ قابىلەتىنەن ايىرىلۋعا قاتىستى الەۋمەتتىك تولەمنىڭ قالايشا وزگەرەتىنىن دە ءتۇسىندىردى. بۇدان بولەك، اسىراۋشىسىنان ايىرىلعانداردىڭ الەۋمەتتىك تولەمدەرى وسەدى.