اتالعان تولەمدەر مىندەتتى الەۋمەتتىك ساقتاندىرۋ قورىنان بەرىلىپ وتىرادى. بۇگىندە قوردىڭ تولەمدەرىن ارتتىرۋ ۇسىنىلىپ وتىر، دەپ حابارلايدى قازاقپارات ءتىلشىسى.
ۆيتسە- ءمينيستردىڭ ايتۋىنشا، اسىراۋشىسىنان ايىرىلعان وتباسىلاردىڭ الەۋمەتتىك قورعالۋىن ارتتىرۋ ماقساتىندا ارنايى كوەففيتسيەنتتى وزگەرتۋ كوزدەلىپ وتىر. سونىڭ ناتيجەسىندە الەۋمەتتىك ساقتاندىرۋ قورىنان بەرىلەتىن تولەمنىڭ مولشەرى ۇلعايادى.
ماسەلەن، مىندەتتى الەۋمەتتىك ساقتاندىرۋ قورىنا جارنا اۋدارىپ كەلگەن ادام اسىراۋشىسىنان ايىرىلعان جاعدايدا ونىڭ اسىراۋىندا قالعان ادامداردىڭ كوەففيتسيەنتى كوتەرىلەدى. ءبىر ادام ءۇشىن 40 پايىزدان 50 گە، ەكى ادام ءۇشىن 50 دەن 65 پايىزعا، ءۇش ادام ءۇشىن 60 پايىزدان 80 گە، ال ءتورت جانە ودان كوپ ادام بولسا 80 نەن 100 پايىزعا كوبەيتۋ ۇسىنىلىپ وتىر. جالپى العاندا، ءاربىر كوەففيتسيەنتتىڭ ءوسىمى بۇرىنعى مولشەردىڭ 25 پايىزىن قۇرايدى.
«ماسەلەن، اسىراۋشىسىنان ايىرىلعان ادامنىڭ ورتاشا ايلىق تابىسى - 100 مىڭ تەڭگە. ال جۇيەگە قاتىسۋ ءوتىلى 85 ايدى قۇرايدى. ونىڭ اسىراۋىنداعى ءبىر ادام ءۇشىن تولەم مولشەرى 23907 تەڭگە بولادى. بۇل قازىرگى پارامەتردى قولدانۋ كەزىندەگى تولەم مولشەرىنەن 30 پايىزعا كوپ. بۇگىندە 18390 تەڭگە تولەنىپ وتىرادى» ، - دەدى س. جاقىپوۆا ق ر پارلامەنت ماجىلىسىندە وتكەن جيىندا.
ونىڭ سوزىنە قاراعاندا، اسىراۋشىسىنان ايىرىلۋ بويىنشا مەملەكەتتىك الەۋمەتتىك جاردەماقىنى ەسكەرە وتىرىپ، تولەمنىڭ جالپى سوماسى 43910 تەڭگەدەن 49448 تەڭگەگە ارتاتىن بولادى.
«زاڭ جوباسى ماجىلىسكە ەندى كەلدى. ەگەر ءماجىلىس قابىلداپ، سەناتتان ءوتىپ، ەلباسى قول قوياتىن بولسا، جوسپار بويىنشا بارلىق شارالار 2020 -جىلدىڭ 1 - قاڭتارىنان باستاپ جۇزەگە اسادى» ، - دەپ اتاپ كورسەتتى س. جاقىپوۆا.
ايتا كەتەيىك، بۇگىن ق ر ەڭبەك جانە حالىقتى الەۋمەتتىك قورعاۋ مينيسترلىگى پارلامەنت ءماجىلىسىنىڭ دەپۋتاتتارىنا مىندەتتى الەۋمەتتىك ساقتاندىرۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر ەنگىزۋ تۋرالى زاڭ جوباسىن تانىستىردى. ۆيتسە- مينيستر سۆەتلانا جاقىپوۆانىڭ ايتۋىنشا، زاڭ جوباسىن قابىلداۋدىڭ ناتيجەسىندە ەڭبەك ەتۋ قابىلەتىنەن، اسىراۋشىسىنان جانە جۇمىسىنان ايىرىلۋ بويىنشا تولەمدەردىڭ ورتاشا مولشەرى ورتا ەسەپپەن 30-36 پايىزعا دەيىن ارتادى. حالىق مىندەتتى الەۋمەتتىك ساقتاندىرۋ جۇيەسىنە كوبىرەك قاتىسادى. ءسويتىپ، رەسمي تۇردە جۇمىس ىستەيتىن ادامداردىڭ سانى ارتادى دەگەن بولجام بار.
سونداي- اق، ۆيتسە- مينيستر ەڭبەك ەتۋ قابىلەتىنەن ايىرىلۋعا قاتىستى الەۋمەتتىك تولەمنىڭ قالايشا وزگەرەتىنىن دە ءتۇسىندىردى.