«حالىقارالىق ايەلدەر كۇنى قارساڭىزدا «قازاقستان تەمىر جولى» ۇ ك» ا ق بارلىق فيليالدارى مەن قۇرىلىمدىق بولىمشەلەرى نازىك جانداردى مەرەكەمەن قۇتتىقتادى. قازاقستاننىڭ تەمىر جول سالاسىندا قازىرگى تاڭدا ەرلەرمەن قاتار، 33 مىڭ ايەل تەر توگىپ ءجۇر»، - دەلىنگەن ق ت ج حابارلاماسىندا.
تەمىر جول سالاسىنداعى ايەلدەر قوزعالىستىڭ قاۋىپسىزدىگىنە جاۋاپ بەرىپ، جولاۋشىلار كەشەنىندەگى جۇمىستى اتقارادى، ەكونوميكالىق جانە كادرلىق ماسەلەلەردى شەشەدى. ەڭ كۇردەلى ءارى سيپاتى ءارتۇرلى اۋماقتاردا تەمىرجولشى ايەلدەر شىنايى كاسىبيلىكتىڭ جانە جاۋاپكەرشىلىكتىڭ ۇلگىسىن كورسەتىپ كەلەدى.
حالىقارالىق ايەلدەر كۇنىنە وراي وتكىزىلگەن سالتاناتتى شارادا «قازاقستان تەمىر جولى» ۇ ك» ا ق باسقارما ءتوراعاسى ساۋات مىڭبايەۆ سالانىڭ دامۋىندا ايەلدەردىڭ قوسىپ جاتقان ۇلەسى مول ەكەنىن ەرەكشە اتاپ ءوتتى. نازىك جانداردىڭ ەڭبەگى دە باعالانىپ وتىر. وتكەن جىلى عانا 500-گە تارتا قىزمەتكەر ءارتۇرلى ماراپاتتارعا يە بولعان.
قازىرگى تاڭدا 7 مىڭعا تارتا ق ت ج قىزمەتكەرى - كوپبالالى انا. ولاردىڭ جەتپىسى «كۇمىس القا» جانە «التىن القا» مەملەكەتتىك ناگرادالارىمەن ماراپاتتالعان.
«ايەلدەردىڭ كۇردەلى جۇمىسپەن بىرگە وتباسىلىق شارۋالاردى قوسا اتقارىپ جۇرگەنىن ەرەكشە اتاپ ءوتۋ كەرەك»، - دەيدى ق ت ج باسشىسى.
سالتاناتتى شارا بارىسىندا ەلىمىزدىڭ تۇكپىر- تۇكپىرىندە تەمىر جول كاسىپورنىندا ەڭبەك ەتەتىن 15 ۇزدىك قىزمەتكەرگە قۇرمەت گراموتالارى تابىستالدى. ارۋلار كۇنىنە وراي ق ت ج ونەرلى قىزمەتكەرلەرى مەن بالالار ارنايى كونسەرت قويىپ، كوپتىڭ قوشەمەتىنە يە بولدى.