ءبىز نەگە وزگەنىڭ ءىسىن قايتالايمىز؟

قازىردىڭ وزىندە الەۋمەتتىك جەلىدە #10yearchallenge حەشتەگىمەن فلەشموب كەڭىنەن تانىمال. وزگەلەردىڭ ءىسىن قايتالاۋعا نە سەبەپ بولادى؟

اينا ءتارىزدى نەيروندار: 1992 -جىلى يتالياندىق نەيروبيولوگ دجاكومو ريزولاتتي عىلىمدا جاڭا اشىلۋعا سەبەپ بولدى: ونى اينا ءتارىزدى نەيروندار دەپ اتادى. بۇل بەلگىلى ءبىر ءىستى قايتالاعاننان قوزۋ ۇردىسىنە ۇشىرايتىن جۇيكە جاسۋشالارى. ارينە، بۇل تاقىرىپ توڭىرەگىندە كوپ داۋ بولدى. ءبىرى تەرىسكە شىعاردى، ەندى ءبىرى قولدادى. دەگەنمەن، ءبىزدىڭ ءار ارەكەتىمىزدىڭ نەگىزگى سەبەبىن كورسەتەتە الاتىن بولعاندىقتان بۇل اشىلۋعا قولداۋ تانىتقاندار باسىم بولدى.

 تابيعات زاڭدىلىعى: ادەتتەردى كوشىرۋدىڭ باستى سەبەبى -  ۇيرەنۋ. بالا تۋا سالىسىمەن سويلەپ نە ءجۇرىپ كەتپەيدى. ول بارلىق ادەتتى اينالاسىنداعىلاردان ۇيرەنەدى. بۇل ءبىزدىڭ سانامىزعا ابدەن قالىپتاسقان. بىرەۋدىڭ ارەكەتىن كوشىرۋدى تابيعات زاڭدىلىعى دەپ تە اتايمىز. ويتكەنى، ەۆوليۋتسيا كەزىندە ادامدار ومىردەن جاڭىلماۋ ءۇشىن نەمەسە وزگەلەردەن قالىپ قويماۋ ءۇشىن سانالى تۇردە ميىمىزدى باعدارلامالايمىز.

ماركەتينگتەگى نەيرو: ماركەتينگ سالاسىندا ءبىزدىڭ بۇل «كوشىرۋ» ادەتىمىزدى ءجيى قولدانادى. ءبىز بىرەۋ ۇسىنعان فيلمگە بارامىز، مەيرامحانانى تاڭدايمىز. جارنامالار قولداناتىن «حالىق تاڭداۋى» ، «ساتىلىم ءحيتى» ، «كاسىب مامان ۇسىنادى» دەگەن تىركەستەر دە وسىدان شىققان. بۇنى كورگەن بويدا ادامنىڭ ساناسى ەرىكسىز تۇردە ونى «سەنىمدى» تۇردە قابىلدايدى. ادامنىڭ تولى بولۋى دا وزىنشە اسەر ەتەدى. مىسالى، جىلدا ۇيىمداستىرىلاتىن «قارا جۇما» نەمەسە جاڭا جىل الدى جەڭىلدىكتەر كەزىندە دۇكەندەر مەن ساۋدا ۇيلەرىندە حالىق سانى ارتادى. «جۇقپالى» اينا ءتارىزدى نەيروندار بۇل ۋاقىتتا بەلسەندى جۇمىس جاسايتىنى سونشا، ادامعا «مەن وزگەدەن قالماۋىم كەرەك» دەگەن وي كەلەدى. بۇنى -  ەۆوليۋتسيا بارىسىندا قالىپتاسقان ءوزىن قورعاۋ ءتاسىلى دەپ تە اتايدى.

كەز كەلگەن ۇلگى -  جۇقپالى. فيلم قاراۋ، كىتاپ وقۋ، ادامدارمەن قارىم- قاتىناس تەك ۋاقىت وتكىزۋدىڭ امالى عانا ەمەس، ءبىزدىڭ ءوز بويىمىزعا قالىپتاستىرىپ جاتقان ادەتتەردىڭ باستاماسى. كەيىن مەندە مىناداي ادەت جوق ەدى، قايدان پايدا بولعان دەپ تاڭعالىپ جۇرمەۋ ءۇشىن، اينالاڭىزداعى ادامدار مەن بوس ۋاقىتتا اينالاساتىن ارەكەتتەرگە ءبىر ۋاقىت نازار اۋدارۋدى ۇمىتپاڭىز. 

Massaget.kz