«وقۋشىلار مەن اتا- انالار مەكتەپتىڭ «قوجايىنى» بولماۋى ءتيىس. ءمۇعالىمنىڭ ورنى - ءتور» . بۇل - پاۆلودار قالاسىنداعى №37 ورتا مەكتەبىنىڭ ديرەكتورى ءلايلا ءجۇسىپوۆانىڭ پىكىرى.
ايتا كەتەيىك، بۇل مەكتەپتە قازاقستاندا العاش رەت سىناق جۇزىندە ە- اسحانا مەن بالالاردى ساۋساق ىزدەرى ارقىلى كىرگىزۋ جۇيەسى ەنگىزىلگەن.
«جاڭا زاڭنان كۇتەرىمىز كوپ. بىرىنشىدەن، مۇعالىمدەردىڭ تابىسى وسەدى. ەندى اكادەميالىق دارەجەسى بار دارىندى ۇستازدار جالاقىلارىنا ۇستەماقى الا باستاپ، الەۋمەتتىك جاعدايىن جاقسارتا الادى دەگەن ويدامىن. ەكىنشىدەن، دەمالىسقا شىعاتىن پەداگوگقا ساۋىقتىرۋعا قوسىمشا قاراجات بولىنەدى. بۇگىنگى تاڭدا ءبىلىم بەرۋدىڭ جاڭارتىلعان مازمۇنىن ەنگىزۋ اياسىندا ۇستازعا 18 جۇمىس ساعاتى ءۇشىن تولەنەدى. مۇعالىمدەر مۇعالىم- ساراپشى، مۇعالىم- زەرتتەۋشى، مۇعالىم مودەراتور، مۇعالىم- شەبەر ساناتتارىنا ءبولىنىپ، ءار كاتەگورياعا ۇستەمە اقى تولەنەدى. ال 30 جىلدان استام ەڭبەك ەتكەن مامان قۇرمەتتى دەمالىسقا شىعۋ مۇمكىندىگىنە يە بولادى. بۇل - ءبىزدى قۋانتاتىن نەگىزگى جايتتار» ، - دەيدى ءلايلا ءجۇسىپوۆا.
تاجىريبەلى مۇعالىمنىڭ پىكىرىنشە، جاڭا زاڭ بەكىتىلگەن سوڭ پەداگوگيكا ماماندىعىن ۇزدىك وقۋشىلار تاڭدايدى. سونىمەن قاتار، الەۋمەتتىڭ مۇعالىمدەرگە دەگەن قۇرمەتى ارتا تۇسەدى.
«وكىنىشكە قاراي، بۇگىندە ۇلتتىق ءبىرىڭعاي تەستىلەۋدە از ۇپاي جيناعان وقۋشىلار پەداگوگيكا ماماندىعىنا «تيسە تەرەككە- تيمەسە بۇتاققا» پرينتسيپى بويىنشا تۇسە سالادى. باستى ماقساتتا سول، مەملەكەتتىك گرانت ۇتىپ الۋ. كەيىن جوعار ءبىلىم العان سوڭ مۇعالىمدىكتەن باس تارتىپ وتىرادى. بۇل - بۇگىنگى كۇننىڭ اشى شىندىعى. ەندى زاڭ قابىلدانعان سوڭ جاعداي وزگەرەدى دەگەن ويدامىن. پەداگوگ مارتەبەسى ارتقاندا بۇل سالانى ۇزدىك، دارىندى بالالار تاڭدايدى» ، - دەيدى ءلايلا ءجۇسىپوۆا.
قازىرگى تاڭدا ءلايلا ءجۇسىپوۆا باسشىلىق ەتەتىن مەكتەپتە 1200 وقۋشى ءبىلىم الادى. ولارعا سانالى تاربيە مەن ساپالى ءبىلىمدى 80 گە جۋىق ۇستاز بەرەدى. ءبىلىم ورداسى بىلتىرعى جىلى «ۇزدىك مەكتەپ» اتانىپ، 20 ميلليون تەڭگەنىڭ سىيلىعىنا يە بولعان.
«بۇگىندە زەينەت جاسىنا جەتكەن ۇستازدارىمىز كوپ. ولار دەمالىسقا شىققاندا، ورىندارىن قانداي ماماندار باسادى؟ . ءبىزدى بۇل ماسەلە الاڭداتادى. جاڭا زاڭ ۇستازداردىڭ الەۋمەتتىك ماسەلەلەرىن شەشۋمەن قاتار، ماماندار ساباقتاستىعىنىڭ ۇزىلمەۋىنە سەپ بولماق» ، - دەپ ءسوزىن تۇيىندەدى مامان.
اقمارجان ادىلبەك