تاعدىر تالكەگىنە تۇسكەن جاس جىگىتتىڭ اناسىنىڭ سوزىنشە، «قازىر اتتاپ باسساڭ، الدىڭنان بۋكمەكەرلىك كەڭسە شىعادى» .
«ۇلىم وتە اقىلدى بالا ەدى، گيمنازيادا وقىدى. زور ءۇمىت كۇتتىك. اينالاسىندا وعان قولداۋ بىلدىرەتىن ادامدار كوپ بولدى. بۋكمەكەرلىك كەڭسەگە قالاي قۇمارتقانىن بىلمەيمىن. ءبارى كومپيۋتەر ويىندارىنان، ويىن اۆتوماتتارىنان باستالدى. سودان كەيىن ءباس تىگۋگە كوشتى. بۋكمەكەرلىك كەڭسەلەردىڭ وقۋشىلاردان ءباس قابىلدايتىنى مەنى تاڭ قالدىرادى. ول جەردە 21 جاستان باستالادى ەمەس پە؟ بالامدى قۇمارلىقتان ارىلتامىز دەپ ماشينامىز بەن پاتەرىمىزدى ساتتىق» - دەيدى ج. مۇشانوۆا.
ونىڭ ايتۋىنشا، بالاسى 100 تەڭگەدەن باستاپ 2 ميلليون تەڭگەگە دەيىن ءباس تىككەن.
«ءۇيىمىزدىڭ اۋلاسىنىڭ وزىندە ءبىر لومبارد، ەكى بۋكمەكەر كەڭسەسى بار. ودان بولەك، قانشاما ونلاين ويىندار بار، وعان قۇمار ويىنداردى ناسيحاتتايتىن قاپتاعان جارنامانى قوسىڭىز. سونىڭ اسەرىنەن ونىڭ ويى جەڭىل اقشا تابۋعا ويىسقان بولار. قۇمار ويىننىڭ زاڭى بويىنشا العاشقى كەزدەرى ادام ۇنەمى جەڭەدى، وسى ەيفوريامەن ءارى قاراي ءباس تىگە بەرەدى. ۇلىم اقشا تىگۋدى مىڭ تەڭگەدەن باستاپ، ودان ءارى كوبەيتە بەرگەن. اقشاسى بولماعان كەزدەرى تۋىستاردان ءتۇرلى سىتاۋمەن اقشا سۇراعان. جانە اقشا الۋ ءۇشىن ءتۇرلى وتىرىك وقيعالار ويلاپ تاپقان. كەيىن ۇلىما اقشا بەرگەن ادامدار بىزگە كەلدى» ، - دەيدى ول.
جانار مۇشانوۆا قازىر وتباسى مەن ۇلىنا پسيحولوگيالىق كومەك كەرەكتىگىن جەتكىزدى.
«ۇلكەن ۇلىمنىڭ جاعدايىنان بولەك، كىشكەنتاي بالام دا دەنساۋلىعىنا بايلانىستى ەرەكشە كۇتىمدى قاجەت ەتەدى. ونى سانكت- پەتەربوردا ەمدەتۋ ءۇشىن ءۇيىمىزدى ساتىپ، باسقا ۇيگە كوشتىك. ويىنعا ابدەن ەسى كەتكەن ۇلىم شامامەن 3 ميلليون تەڭگەنى قۇمار ويىنعا تىككەن. بۋكمەكەرلەردىڭ جاس بالادان وسىنداي ءىرى كولەمدەگى ءباستى قالاي قابىلدايتىنى تاڭ قالدىرادى. ولار اقشانى قايدان العانىن سۇراپ نەمەسە اتا- اناسىنا حابارلاسسا بولادى عوي. مۇمكىن ول ۇرلانعان اقشا شىعار؟ » ، - دەپ نارازىلىعىن ءبىلدىردى ايەل.
جاناردىڭ ايتۋىنشا، بۇگىندە بالاسىنىڭ ءومىر ءسۇرۋ سالتى وزگەرىپ، جۇمىس ىستەگىسى كەلمەيدى. پسيحولوگيالىق كۇيزەلىسكە ۇشىراعان.
«بۇرىنعى مەن بىلەتىن بالا جوق. ەڭ سوراقىسى، ول نە ايتسا دا وتىرىك ايتقانداي سەزىكتەنىپ تۇرامىن. ونىڭ قانداي ەكەنىن تۋىستارى دا، دوستارى دا جاقسى بىلگەندىكتەن، وعان ەشكىم اقشا بەرمەيدى. سوندىقتان اقشا تابۋ ءۇشىن قىلمىسقا بارا ما دەپ تە قورقامىن. قازىر بالام وڭالتۋ ورتالىعىندا ەمدەلىپ جاتىر. ءتيىستى ەم قابىلداپ، بۇرىنعى قالپىنا كەلەدى دەگەن ءۇمىتىمىز زور» ، - دەيدى ج. مۇشانوۆا.
ءسوز سوڭىندا جاس جىگىتتىڭ اناسى ەلىمىزدە قۇمار ويىندار قاتاڭ باقىلاۋعا الىنىپ، وعان قاتىستى ءتيىستى شارالار مەن زاڭناما كۇشەيسە دەگەن ءوتىنىشىن ءبىلدىردى.
«ماعان وسى جەرگە كەلۋ وڭايعا سوقپادى. بىزدە «ۇيات، نامىس» دەگەن بار. دەگەنمەن، بۇل مەنىڭ عانا بالامنىڭ باسىنداعى وقيعا ەمەس. بۇل وقيعا وتباسى جاعدايىمىزعا قاتتى اسەر ەتتى. سوندىقتان، وسىندا وتىرعان ءتيىستى قۇقىق قورعاۋ جانە باسقا دا مەملەكەتتىك ورگان وكىلدەرىنە ءوتىنىشىم بار. قازاقستاندا قۇمار ويىن جۇيەسىن ۋاقىت سوزباي قولعا الۋ كەرەك. بۇل - بۇكىل قوعامنىڭ دەرتى. وسىنداي قايعىلى وقيعاعا تاپ بولسا دا، ەشكىمگە سىرىن بىلدىرمەي، ىشتەي قان جۇتىپ جۇرگەندەر قانشاما. بالالارى قۇمار ويىننىڭ جەتەگىندە كەتكەن اتا- انالاردىڭ اتىنان زاڭ جوباسىنا وزگەرىستەر ەنگىزۋدى سۇرايمىن» ، - دەپ تۇيىندەدى ءسوزىن ول.
ايتا كەتسەك، بۇگىن استانادا «نۇر وتان» پارتياسىندا دوڭگەلەك ۇستەل ءوتىپ، ەلىمىزدەگى قۇمار ويىن پروبلەمالارى مەن ونى شەشۋ جولدارى ءسوز بولدى.