توقتار اۋباكىروۆ قولى جەتپەگەن قازاق قىزى مەن ورىس ايەلى جايلى سىر شەرتتى. بۇل تۋرالى «استانا» ارناسىنىڭ «ماقپال مەكەن» جوباسىندا ايتىلدى، دەپ جازادى Stan.kz.
«اكەسى قارسى بولدى. كەيىنگى جىلدارى ول كىسىمەن كەزدەستىك. قازىر تەلەفونمەن تاۋىپ الۋ وڭاي عوي. ول كىسى: - اكەم ولاي ايتۋعا ءتيىستى ەمەس ەدى، - دەدى. سەبەبى اكەم مەنى جاقسى كورۋشى ەدى، دەدى. ءبىراق ءوز قۇلاعىممەن ەستىدىم تەلەفون ارقىلى. ول كىسى قارسى شىعىپ ەدى. «قاڭعىرىپ جۇرگەن بالاعا مەنىڭ بەرەتىن قىزىم جوق» دەگەن. مەن ول كەزدە سوناۋ قيىر شىعىستا جۇرگەنمىن. 21 جاسىمدا سول كىسىمەن تانىستىق. 31-گە دەيىن 10 جىل حابارلاسىپ تۇردىق، ءبىراق بۇيىرمادى. ول كىسى مەن ۇيلەنگەن سوڭ ءبىر جىلدان كەيىن تۇرمىسقا شىقتى. ەكى بالاسى بار، قۇدايعا شۇكىر، نەمەرەلەرىن كوردى»، - دەپ اعىنان جارىلدى قازاقتىڭ تۇڭعىش عارىشكەرى.
بۇدان كەيىن توقتار مىرزا ورىستىڭ تاتيانا ەسىمدى قىزىنا ۇيلەنگەن. كۇنى بۇگىنگە دەيىن سول كىسىمەن ءبىر شاڭىراق استىندا تۇرىپ كەلەدى. ايتۋىنشا، بۇگىنگى جەتكەن جەتىستىگىنە تاتيانانىڭ قوسقان ۇلەسى زور.
«جاقسى ايەل جامان كۇيەۋىن تورگە وتىرعىزادى. مەن دە قۇدايعا شۇكىر جامان ەمەسپىن. ءبىراق ول كىسى مەنىڭ تورگە وتىرۋىما كوپ اسەر ەتتى. ءوزى ورىس بولسا دا، قازاقستانعا كوشۋ كەرەك دەپ ماعان تىنىشتىق بەرمەدى. ەندى ول ءاربىر كىسىگە بەرىلمەيتىن سەزىم. وسىندا كەلگەن سوڭ، كىشكەنتاي بالالاردى، نەمەرەلەرىمدى «قازاق مەكتەبىنە بەرىڭدەر» دەپ بۇگىنگى كۇنگە دەيىن بالالارىمنىڭ قۇلاعىنا قۇيىپ جۇرگەن سول - تاتيانا ميحايلوۆنا»، - دەيدى توقتار اۋباكىروۆ.
Stan.kz