ۇلتتىق ەكونوميكا مينيسترلىگىندەگىلەردىڭ سوزىنشە، بايلىققا سالىقتى ەنگىزۋ ءۇشىن بىرنەشە شارت ورىندالۋى ءتيىس. ال ساراپشىلار مەملەكەتىمىزدىڭ مۇنداي وزگەرىسكە دايىن ەمەس ەكەنىن ايتۋدا.
بۇل تۋرالى «استانا» ارناسى حابارلايدى.
ەلىمىزدىڭ قارجى مينيسترلىگى بىرنەشە جىلدان بەرى تابىس سالىعىنىڭ پروگرەسسيۆتى شكالاسىنا ءوتۋدىڭ مۇمكىندىكتەرىن قاراستىرۋدا. ياعني ازاماتتاردىڭ تابىسى قانشالىقتى كوپ بولسا، تولەيتىن سالىعى دا كوبەيەدى.
دەسە دە وتاندىق كاسىپكەرلەر قىمبات مۇلكى ءۇشىن ونسىز دا ءبىرتالاي اقشا تولەپ وتىرعاندارىن ايتۋدا. تانىمال كاسىپكەر بەيبىت الىبەكوۆتىڭ سوزىنشە، ۇلكەن قوزعالتقىشتى 3 اۆتوكولىگى ءۇشىن جىلىنا ميلليون تەڭگە كولەمىندە سالىق تولەيتىن كورىنەدى.
«بىزدە ادال اقشا تاۋىپ جاتسا دا بايلارعا دەگەن قوعامنىڭ كوزقاراسى جاقسى ەمەس. سوندىقتان ولارعا سالىقتى كوبەيتىپ، ودان ءارى تىنىشتىعىن بۇزعانشا، جايلى جاعداي جاساپ، كاپيتالىن ءوز ەلىمىزدەگى بيزنەسكە سالۋعا يتەرمەلەۋ كەرەك. قۇرىلىسقا سالسا دا، ءۇي نارىعىنا سالسا دا ول ىشكى جالپى ءونىمنىڭ ءبىر بولىگى. جىل سايىن قالتالىلار ەلدەن كوپتەپ كوشىپ جاتىر. بايلىق سالىعى جاعدايدى تەك ۋشىقتىرا تۇسەدى» ، - دەيدى الىبەكوۆ.
ال ەكونوميست ماقسات حالىقتىڭ پىكىرىنشە، ەلىمىزدەگى كاسىپكەرلەردىڭ دەنى سالىق تولەۋدەن قاشىپ وتىرعان جوق. دەسە دە تۇسكەن سالىقتىڭ جۇمسالاتىن سحەماسى كورسەتىلۋى ءتيىس، دەيدى ول.
«كوپتەگەن كاسىپكەرلەر، كاپيتاليستەر مەملەكەتكە سالىق تولەۋدەن قاشپايدى. الاڭداتاتىنى - ول الەۋمەتتىك ماسەلەنى شەشۋگە جەتە مە، جەتپەي مە؟ ەگەر جاقسى مۇلىكتى ازامات بولساڭ، ودان تۇسكەن سالىق مىناداي ءبىر الەۋمەتتىك ماسەلەنى شەشۋگە جۇمسالادى دەگەن سحەمانى كورسەتۋ كەرەك. ءبىز سىبايلاس جەمقورلىقتى جويۋ كەرەكپىز، كولەڭكەلى ەكونوميكانىڭ ۇلەسىن ازايتۋ كەرەكپىز» ، - دەيدى ەكونوميست.
ءوز سوزىندە ول تولەنگەن سالىقتىڭ حالىققا قايتاتىن اقشا ەكەنىن ۇمىتپاۋ كەرەكتىگىن اتاپ ءوتتى. ول ارقىلى كوپتەگەن ماسەلەلەر شەشىلەدى دەيدى.
«ءسىز سالىقتى تولەپ جاتقان كەزدە ويلانۋىڭىز كەرەك - وسى ارقىلى مەن جۇمىسسىز جۇرگەن اعاما جۇمىس تاۋىپ بەرىپ جاتىرمىن دەپ» ، - دەيدى ماقسات حالىق.
بۇل ورايدا قوعام بەلسەندىسى نەسىپجان ءامىروۆانىڭ پىكىرىنشە، باقۋاتتىلار تاپقانىمەن ءبولىسۋى ءتيىس.
«مەن ءوزىمنىڭ قولىممەن، بەينەتىممەن تاپتىم، مەن نەگە بەرۋىم كەرەك دەيدى. بەرۋ كەرەك، ءبولىسۋ كەرەك! مىنا كەدەيلەرمەن ءبولىسۋ كەرەك! فوربسقا ەنگەن بايلار بار جانە بازاردا پىستە ساتىپ وتىرعان كەدەيلەر بار... ءبولىسسىن دەلىك، ءبىراق جىرىپ بەرگەنى ءتيىستى جەرگە جەتە مە؟ ەكونوميكا كۋرسىنان ساباق بەرگەن ءبىر اعاي: «بىزدە بيزنەستىڭ ءداستۇرلى ءۇش ەمەس، ءتورت ءتۇرى بار: شاعىن، ورتا، ءىرى جانە بيۋدجەت اقشاسىن جىمقىرۋ» دەپ ازىلدەپ ەدى. مىنە، وسى « ءتورتىنشى بيزنەس» - سالىق جۇيەسىنە دە سەلكەۋ ءتۇسىرىپ تۇر. وعان بىلتىر شىققان «جۇماق دوسەسى» سياقتى وففشورلارعا اقشا تىققاندار تۋرالى دوسەلەردى قوسىڭىز. «تىنىش ۇيىقتاي» الاتىندار بىزدە كوپ. ءبىراق دوڭبەكشىپ شىعاتىنداردى ۇيىقتاتپايتىن قارجى كولەمى دە وتە قوماقتى» ، - دەيدى ءامىروۆا.
ازىرگە ۇكىمەت بايلىق ءۇشىن سالىق ەنگىزۋگە اسىعار ەمەس. الايدا شەنەۋنىكتەر تاياۋدا ەلىمىزدە جىلجىمايتىن مۇلىك پەن اۆتوكولىككە تولەنەتىن سالىق كولەمى شارشى مەترى مەن قوزعالتىقىشىنىڭ مولشەرىنە عانا ەمەس، قۇنىنا بايلانىستى دا ەسەپتەلۋى مۇمكىن ەكەندىگىن جوققا شىعارمايدى. دەسە دە مۇنداي وزگەرىستىڭ قاشان ەنگىزىلەتىنى ازىرگە بەلگىسىز.