وسىنى ۋاقىتىلى ۇققان قالتالى ازاماتتار قازىر ءار جەردەن كۆەست ورتالىقتارىن اشىپ جاتىر. قازىر قورقىتۋدىڭ ءوزى پايدانىڭ كوزىنە اينالدى.
ەلىمىزدە بىرىنەن سوڭ ءبىرى كۆەست بولمەلەر اشىلىپ جاتىر. استانانىڭ وزىندە وسىنداي 6 ورىن بار ەكەن. ال وعان كەلەم دەۋشىلەردىڭ قاتارى كوبەيمەسە، ازاياتىن ءتۇرى جوق. ويتكەنى كۇندەلىكتى الەمدە نەبىر قورقىنىشتى فيلمدەر شىعىپ جاتىر. ونى تۇراقتى كورەتىندەر كەيىن ءدال سونداي جاعدايدى سەزىنگىسى دە كەلەدى.
ءاليحان قۇرمانبايەۆ، كۆەستتى ۇيىمداستىرۋشى:
- قازىر بۇل باعىت كەڭىنەن ەتەك جايىپ كەلەدى. اسىرەسە، ادامدار اۋىر جۇمىس كۇنىنەن كەيىن وسىلاي دەمالۋدى ادەتكە اينالدىرعان.
ءيا، قورقىنىشتى. كۆەستتىڭ نەگىزگى ەرەكشەلىگى دە وسىندا. كۆەستتى ۇيىمداستىرۋ دەگەن بولمەنى الاق- جۇلاق بەزەندىرىپ، جارىعىن سوندىرە سالۋ ەمەس. ونداعى اكتەرلاردىڭ ءتۇر- سيپاتى مەن ويناۋ شەبەرلىگى دە ۇلكەن ءرول اتقارادى. ءتىپتى ولاردىڭ ارەكەتىنەن كەيىن دەنساۋلىعى سىر بەرىپ جاتاتىندار بار ەكەن. سوندىقتان كەلۋشىلەرمەن الدىن الا كەلىسىم جاسالادى.
جارقىن مىرزاحان، جەرگىلىكتى تۇرعىن:
- حوررور كۆەست باعىتى الەمدە دە قارقىندى دامىپ كەلەدى. اسىرەسە، قورقىنىشتى فيلم اۋەسقويلارى قايتالانباس اسەر الۋ ءۇشىن بارلىق تاۋەكەلگە بارۋعا دايىن.
ال ەندى ونىڭ قانشالىقتى دۇرىس- بۇرىستىعىنا جاۋاپ ىزدەۋدىڭ قاجەتى جوق سياقتى. ويتكەنى قازىگى جاھاندانۋ داۋىرىندە ادامعا ىزدەگەن اسەرىن بەرەتىن، ال يەسىنە قىرۋار قارجى اكەلەتىن اعىندى توقتاتۋ مۇمكىن ەمەس.
www.24.kz