قازاقپارات ءتىلشىسى ءولىم اۋزىنان امان قالعان جانۋارلار جانە ولاردىڭ قۇتقارۋشىلارى تۋرالى ەرەكشە وقيعالاردى ۇسىنادى، دەپ حابارلايدى قازاقپارات.
الماتى زووباعىنا وتكىزىلگەن ءبىرقازاننىڭ وقيعاسى كوپشىلىكتى تاڭعالدىرعانى بەلگىلى.
وسىدان ءۇش اي بۇرىن جاس ءبىرقازان ءۇندىستانعا قىستاۋعا ۇشىپ بارا جاتىپ، قوستاناي ماڭىنداعى زاتوبولسك ساياجايلارىنىڭ بىرىنە قۇلاپ تۇسكەن. اۋلاسىندا جاتقان ەكزوتيكالىق قۇستى بايقاعان لەنا زەلەنوۆا جانۋاردى ويلانباستان جىلى ۇيگە كىرگىزىپ، تاماقتاندىرىپ، كۇتىپ شىعۋعا تىرىسقان.
ءۇي جايىندا جابايى قۇستى باعۋ مۇمكىن ەمەستىگىن تۇسىنگەن سوڭ، ايەل ونى الماتى زووباعىنا تاپسىرعان.
قۇستىڭ الماتىعا جەتۋ تاريحى ءبىرقاتار ب ا ق- تا جاريالانعان بولاتىن. باقىلداۋىق جانۋار الماتى-قوستاناي باعىتىنداعى پويىزدىڭ ءىشىن ۋ-دۋعا بولەگەن ەدى.
بۇگىندە حاليف ەسىمدى ءبىرقازان بۇيراباس ءبىرقازاندارعا قوسىلدى. مامانداردىڭ ايتۋىنشا، ءبىرقازاندار ادامدارعا تەز ۇيرەنىپ كەتەدى، جاتىرقاۋدى بىلمەيدى.
ءوز قۇتقارۋشىسىن ايمالاعان اققۋ
بريتان تەلەجۇرگىزۋشىسى ريچارد ۆيز اببوتسبەرري قورىعىندا سەرۋەندەپ ءجۇرىپ، بالدىرعا شىرمالىپ قالعان اققۋدى كورگەن. ريچارد بىردەن قۇسقا كومەكتەسىپ، تۇزاقتان بوساتقان. العىس رەتىندە اققۋ ءوزىنىڭ قۇتقارۋشىسىنىڭ موينىنا ورالىپ، ايمالاعان.
«جابايى جانۋاردىڭ ماعان بىردەن كەۋدەمە ورالا كەتكەنى وتە تاڭعالارلىق جاعداي. ول مەنى مۇلدە جاتسىنعان جوق»، - دەدى بريتان ازاماتى.
ءوزىنىڭ قۇتقارۋشىسىنا كۇندە العىس ايتاتىن بۇعى
نورۆەگيانىڭ باتىسىندا ءبىر وتباسى جابايى بۇعىنى اڭشىلاردىڭ قۋدالاۋىنان قۇتقارىپ قالعان. جابايى جانۋار سول جاقسىلىققا العىس رەتىندە بۇل ۇيگە كۇندە كەلىپ تۇرۋدى ادەتكە اينالدىرعان.
وتباسى مۇشەلەرى بۇعىعا قورەك بەرىپ تۇرادى ەكەن. جانۋار تەرەزەگە كەلىپ، ءبارى ويانعانشا كۇتەتىن كورىنەدى. بۇعى ناندى وتە جاقسى كورەدى ەكەن، سوندىقتان جەرگىلىكتى دۇكەنشىلەر وعان 1-2 ناندى الىپ قالادى.
قوساياق
اۆستراليانىڭ Kangaroo Sanctuary Alice Springs زووباعىندا ەبيگەيل ەسىمدى ۇرعاشى قوساياق ءومىر سۇرەدى. جانۋاردى 5 ايلىعىندا ادامدار براكونەرلەردەن قۇتقارىپ قالعان. سودان بەرى قوساياق وسى زووباقتا تۇرادى. سول ۋاقىتتان بەرى ەبيگەيل ءوزىن قۇتقارعان ادامداردى مۇلدە جاتسىنعان ەمەس.
ياگۋار
برازيليا اسكەرىنىڭ ساربازدارى امازونكا دجۋنگليىنەن كىشكەنتاي ياگۋاردىڭ بالاسىن تاۋىپ العان. جانۋار سول كەزدە ءولىم مەن ءومىر اراسىندا جاتقان. ساربازدار جانۋاردى وزىمەن بىرگە جاتاقحانالارىنا الىپ كەتكەن.
جانۋار جابايى تابيعات اياسىندا ءومىر سۇرۋگە بەيىمدىلىگىن جوعالتىپ العاندىقتان، جەرگىلىكتى بيلىك جىرتقىشتى ساربازدارمەن قالدىرۋعا رۇقسات بەرگەن. قازىر دجيكيتاي (ياگۋاردىڭ اتى) دەنى ساۋ، ادامدارعا مىسىق سياقتى ەركەلەيدى.