ەلورداداعى دوستىق ۇيىندە حالىقتىڭ الەۋمەتتىك وسال توپتارىن قولداۋعا ارنالعان «قايىرىمدىلىق كەرۋەنى» شاراسى اياسىندا «سارقىت» رەسپۋبليكالىق اكتسياسى باستالدى.
شارادا ەلوردالىق ەتنومادەني بىرلەستىكتەردىڭ ۇيىمداستىرۋىمەن «انالار ءۇيىنىڭ» بالالارى ءۇشىن «تۇساۋكەسەر» جانە «بەسىكتوي» راسىمدەرى وتكىزىلدى.
«بۇگىننەن باستاپ قازاقستان حالقى اسسامبلەياسىنىڭ «قايىرىمدىلىق كەرۋەنى» شاراسى ءوز جۇمىسىن باستادى. وتكەن جىلى اتالعان اكسيا اياسىندا ءتۇرلى باعىتتاعى 8700 ءىس- شارا ءوتتى. سونىڭ ناتيجەسىندە 400 مىڭنان استام ادامعا 2,5 ميلليارد تەڭگەنىڭ قايىرىمدىلىق كومەگى بەرىلدى. سونداي- اق، جىل بويى اتالعان شارالارعا بەلسەندى قاتىسىپ، ءوز ۇلەستەرىن قوسىپ جۇرگەن مەتسەناتتارعا «جومارت جان» اتاعىن تابىس ەتتىك. بۇگىن باستالعان قايىرىمدىلىق شاراسى ەلىمىزدىڭ بارلىق وڭىرىندە وتەدى جانە جىل بويىنا جالعاسادى» ، - دەدى ق ح ا ءتوراعاسىنىڭ ورىنباسارى لەونيد پروكوپەنكو.
ونىڭ ايتۋىنشا، بۇگىنگى شارا بارىسىندا استانالىق كومەككە مۇقتاج 55 وتباسىعا تەگىن ازىق- تۇلىك ۇلەستىرىلەدى. ودان بولەك، «جاڭعىرۋ جولى» رەسپۋبليكالىق جاستار قوزعالىسىنىڭ ۇيىمداستىرۋىمەن فلەشموب وتەدى.
قايىرىمدىلىق شاراسىنا ق ر ءماجىلىسىنىڭ دەپۋتاتتارى، قوعامدىق ۇيىمدار مەن قورلار جانە ەتنومادەني بىرلەستىكتەر وكىلدەرى قاتىستى.