ولار بۇگىن الەم چەمپيوناتىنىڭ جۇبانىش كەزەڭىندەگى ەكىنشى كەزدەسۋىندە دانيا قۇراماسىن 4:0 ەسەبىمەن ويسىراتا جەڭدى، دەپ حابارلايدى قازاقپارات ءتىلشىسى.
اتالمىش كەزدەسۋ كانادانىڭ ۆانكۋۆەر قالاسىندا وتكىزىلدى. ەكى كۇن بۇرىن ءبىزدىڭ جاستار اتالمىش قارسىلاسىن 4:3 ەسەبىمەن تىزە بۇكتىردى. ەرەجەگە سايكەس ەكى قۇرامانىڭ ءبىرى ەكى مارتە جەڭىسكە جەتسە سول جەڭىمپاز الداعى الەم چەمپيوناتىندا توپ- ديۆيزيوندا ويىن كورسەتۋ مۇمكىندىگىنە قول جەتكىزەدى.
ەستەرىڭىزگە سالا كەتەلىك، قازاقستان جاستارى بۇعان دەيىن ۆ توبىندا سىنعا ءتۇستى. توپتىق كەزەڭدە ءبىزدىڭ جاستار بارلىق كەزدەسۋىندە قارسىلاستارىنا ەسە جىبەردى. اتاپ ايتقاندا، الدىمەن فينليانديادان 0:5 ەسەبىمەن جەڭىلسە، ودان كەيىن ا ق ش- تان 2:8 ەسەبىمەن ۇتىلىپ قالدى. جاستارىمىز ءۇشىنشى كەزدەسۋدە سلوۆاكيادان 2:11 ەسەبىمەن ويسىراي جەڭىلسە، سوڭعى ويىندا شۆەتسياعا 1:4 ەسەبىمەن جول بەردى.
دانيا جاستارى دا بارلىق ويىندا جەڭىلىستىڭ اشى ءدامىن تاتتى. ولار الدىمەن كانادادان 0:14, رەسەي، شۆەيتساريا، چەحيادان 0:4 ەسەبىمەن جەڭىلىپ قالدى. وسىلايشا ا توبىندا سوڭعى ورىندى مىسە تۇتتى. دانيا قۇراماسى بىلتىر دا توپ- ديۆيزيوننىڭ جۇبانىش كەزەڭىندە وينادى. ول جولى بەلارۋس جاستارىن 5:4, 3:2 (بۋلليتتەن) ەسەبىمەن جەڭدى. وسىلايشا توپ- ديۆيزيونداعى ورنىن ساقتاپ قالدى.
بۇگىنگى كەزدەسۋ ءبىزدىڭ جاستار ءۇشىن ءساتتى باستالدى. ولار ويىن باسىنان شابۋىل تىزگىنىن قولعا الۋعا تىرىستى. العاشقى شايبا نەبارى 35 سەكۋندتا سوعىلدى. ونى سايان دانيار ورىندادى. ال 4- مينۋتتا قازاقستان ەكى شايبا ايىرماسىمەن العا شىقتى. ول داۆىد ماكۋتسكيدىڭ ەنشىسىنە جازىلدى.
ەكىنشى كەزەڭدە قوس قۇرامانىڭ دا ەسەپتى وزگەرتۋگە مۇمكىندىگى بولعان ەدى. اسىرەسە، دانيا جاستارىنىڭ بەلسەندىلىگى ايقىن اڭعارىلىپ تۇردى. دەگەنمەن ولارعا ءبىزدىڭ حوككەيشىلەر لايىقتى دەڭگەيدە تويتارىس بەرە ءبىلدى. كەيبىر ساتتە قاقپاشىمىز دەميد ەرەمەيەۆ شەبەرلىگىن كورسەتتى.
ءۇشىنشى كەزەڭدە دانيالىقتار العا ۇمتىلدى. دەگەنمەن ولارعا قارسى قورعانىستا ءبىزدىڭ جاستار ساۋاتتى ويىن كورسەتە ءبىلدى. سوڭعى مينۋتتاردا دانيا قۇراماسى قاقپاشىسىز ويناۋعا، ياعني ونى التىنشى حوككەيشىگە الماستىرۋعا ءماجبۇر بولدى. وسىنى پايدالانعان ءبىزدىڭ جاستار ولاردىڭ قاقپاسىنا ەكى شايبا سوعىپ كەتتى. الدىمەن 59-مينۋتتا ارتۋر گاتياتوۆ وسىلايشا ەكى شايبا سوقتى. ەسەپ 4:0. قازاقستان جاستارى جەڭىسكە جەتتى. قارسىلاسىن قاتارىنان ەكى مارتە تىزە بۇكتىرگەن قۇرامامىز ەندى ءۇشىنشى ويىن وتكىزبەيتىن بولدى. الداعى الەم چەمپيوناتىندا ولار توپ- ديۆيزيوندا ويىن كورسەتەدى. جارىس ەرەجەسى بويىنشا ەكى مارتە جەڭىسكە جەتكەن قۇراما ۇزدىكتەر قاتارىنداعى ءوز ورنىن ساقتاپ قالادى.
الەم چەمپيوناتىندا قازاقستان جاستار قۇراماسى ساپىندا قاقپادا ەرەمەيەۆ دەميد، كاراتايەۆ دەنيس، نۋرەك ۆلاديسلاۆ، قورعانىستا دانيار سامات، ورەحوۆ ۆالەريي، شينكارەتسكيي ەۆگەنيي، مۇسابايەۆ ەرنار، حريپكوۆ ياروسلاۆ، كوروليەۆ ارتەم، مۇراتوۆ داۆيد، شابۋىلدا دانيار سايان، گاتياتوۆ ارتۋر، ماكۋتسكيي داۆىد، ۆەرەشاگين يۆان، جورابەك ايدوس، مۇراتوۆ باتىرلان، بويكو ولەگ، گۋسەينوۆ دياس، مۋسوروۆ ماكسيم، بۋيالسكيي اندرەي، دەمين رۋسلان، ميتەنكوۆ دميتري، ترەتياكوۆسكي دانيل قورعادى. ولار «سنەجنىە بارسى» ، «التاي- تورپەدو» ، «تەمىرتاۋ» جانە «التاي» كوماندالارىندا وينايدى.
ەلىمىزدىڭ 20 جاسقا دەيىنگى جاستار قۇراماسى الەم چەمپيوناتىنا 1993 -جىلدان بەرى قاتىسىپ كەلەدى. شيرەك عاسىردان بەرى ءبىزدىڭ حوككەيشىلەر ءارتۇرلى ديۆيزيوندا باق سىنادى. ءبىزدىڭ حوككەيشىلەر توپ- ديۆيزيوندا 1998-2011, 2008-2009 -جىلدار ارالىعىندا سىنعا تۇسكەن. بىلتىر فرانتسيادا وتكەن ءبىرىنشى ديۆيزيوننىڭ ا توبىندا كوش باستاپ، ۇزدىكتەر قاتارىنا سەگىز جىلدان استام ۋاقىتتان كەيىن قايتا ورالدى. فرانتسيا جەرىندە وۆەرتايمدا گەرمانيانى 3:2, بۋلليتتەن لاتۆيانى 3:2, ۆەنگريانى 5:3, اۆستريانى 3:2 جانە فرانيانى 6:1 ەسەبىمەن تىزە بۇكتىردى.
ايتا كەتەرلىگى، بۇگىن جارتىلاي فينال ويىندارى دا وتەدى. وندا رەسەي مەن ا ق ش، فينليانديا مەن شۆەيتساريا جاستارى كەزدەسەدى. 2019 -جىلدىڭ 2 - قاڭتارىندا وتكەن شيرەك فينالدا رەسەي سلوۆاكيادان 8:3, ا ق ش چەحيادان 3:1, فينليانديا كانادادان 2:1, شۆەيتساريا شۆەتسيادان 2:0 ەسەبىمەن باسىم ءتۇستى.