سوت ماجىلىسىنەن شىققان سوڭ سوتتالۋشى جانار تولىبايەۆانىڭ قورعاۋشىسى امانگەلدى ساريەۆ جۋرناليستەرگە تۇسىنىكتەمە بەردى.
ونىڭ ايتۋىنشا، بۇل قىلمىس تاپسىرىسپەن جاسالدى دەگەن قيسىنعا كەلمەيدى.
«بۇل قىلمىسقا ەشكىمنىڭ، ءۇشىنشى، ءتورتىنشى ادامداردىڭ قاتىسى بارىنا دالەل جوق. مۇندا ادامدى ءولتىرۋ قۇرامى جوق. كوردىڭىزدەر عوي، تەلەفوندارى، اقشاسى، ايفونى، كولىكتىڭ ايناسى ءبارى قالعان. قاراقشىلىق جاساعىسى كەلسە، سۋمكانى بوساتىپ الىپ كەتپەي مە»، - دەدى جانار تولىبايەۆانىڭ قورعاۋشىسى امانگەلدى ساريەۆ.
ونىڭ ايتۋىنشا، جانار تولىبايەۆا تەننىڭ ولگەنىن قاپشاعايدا قىدىرىپ جۇرگەندە ەستىگەن.
ەسكە سالساق، دەنيس تەندى بيىل 19 -شىلدەدە الماتى قالاسىندا بەلگىسىز بىرەۋلەر پىشاقتاپ كەتكەن ەدى. اۋىر حالدە اۋرۋحاناعا جەتكىزىلگەن سپورتشى كوز جۇمعان بولاتىن.
دەنيس تەننىڭ ولىمىنە قاتىستى قىلمىستىق ءىس قوزعالىپ، كۇدىكتىلەر ىزدەستىرىلدى. ەلباسى دەنيس تەنگە قاتىستى قىلمىستى مۇقيات تەكسەرۋدى تاپسىردى. كەيىن ق ر ءى ءى م كۇدىكتىلەردىڭ ۇستالعانىن جاريا ەتتى. ال، قىركۇيەك ايىنىڭ سوڭىندا ىشكى ىستەر ءمينيسترى قالمۇحانبەت قاسىموۆ اتالمىش قىلمىستىق ءىستىڭ تەرگەلۋىنە قاتىستى مالىمەت بەرگەن بولاتىن. 25 - جەلتوقساندا الماتى قىلمىستىق ىستەر بويىنشا اۋدانارالىق مامانداندىرىلعان سوتتا بەلگىلى سپورتشىنىڭ ءولىمى بويىنشا الدىن الا سوت تىڭدالىمى وتكەن بولاتىن.