ق ر ۇلتتىق سپورت تۇرلەرى قاۋىمداستىعىنىڭ ۇيىمداستىرۋىمەن وتكەن ايتۋلى ماراپات كەشى ۇلتتىق سپورتتاعى ۇزدىكتەردى انىقتاپ، جىلدى قورىتىندىلاۋعا ارنالدى.
بيىلعى «التىن تۇعىر» ەرەجەسى بويىنشا 14 نوميناتسيا جانە 5 ارنايى سىيلىق تابىس ەتىلدى.
«بيىل ۇلتتىق سپورت ءۇشىن ەرەكشە جىل بولدى دەپ ايتۋعا بولادى. ويتكەنى، حالىقارالىق باسەكەلەردە ءبىزدىڭ ساڭلاقتارىمىز سان مارتە دارا شىقتى. اتاپ ايتساق، اۋدارىسپاقتان III ازيا چەمپيوناتىندا، تەڭگە ءىلۋ مەن قۇسبەگىلىكتەن IIازيا چەمپيوناتىندا، جامبى اتۋدان XIV الەم چەمپيوناتىندا، كوكپاردان، توعىزقۇمالاقتان، اسىق اتۋدان، قازاق كۇرەسىنەن حالىقارالىق جارىستاردا جۇلدەلى ورىن يەلەنگەن سپورتشىلارىمىز بارشىلىق. سول سياقتى بيىل وڭتۇستىك كورەيادا جامبى اتۋدان وتكەن الەم چەمپيوناتىندا 23 ەلدىڭ ىشىنەن سپورتشىلارىمىز I ورىن يەلەندى. بۇگىنگى سىي- قۇرمەت سول ۇلتتىق سپورت باسەكەلەرىندە ەل نامىسىن اسقاقتاتىپ جۇرگەن ازاماتتارىمىزدىڭ ەسىمىن ارداقتاۋعا ارنالادى»، - دەدى ق ر ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان.
ونىڭ ايتۋىنشا، بۇگىندە ۇلتتىق سپورتقا ايرىقشا كوڭىل بولىنۋدە. جۋىردا عانا كوكپار، اۋدارىسپاق، تەڭگە ءىلۋ جانە جامبى اتۋدان ۇلتتىق قۇراما تۇركيانىڭ انتاليا قالاسىندا وقۋ- جاتتىعۋ جيىنىنان ورالدى.
سونىمەن قاۋىمداستىق تاعايىنداعان ۇلتتىق قۇندىلىقتاردى دارىپتەپ، وعان قوسقان ۇلەسى ءۇشىن بەرىلەتىن «ەلىمجان» ءتوس بەلگىسىمەن قىزىلوردا وبلىسىنىڭ اكىمى ق. كوشەربايەۆ ماراپاتتالدى.
سونداي-اق، ءبىرقاتار سپورتشىلارعا «ۇلتتىق سپورت ارداگەرى» ءتوس بەلگىسى جانە «ۇلتتىق سپورتقا قوسقان ۇلەسى» ءۇشىن العىس حاتتار تابىس ەتىلدى.
سونىمەن قاتار، «ناۋرىز- دۋمان» تەلەجوباسىندا ۇلتتىق سپورت تۇرلەرىن ناسيحاتتاعانى ءۇشىن ەلىمىزگە بەلگىلى ازىلكەش ءارتىس تۇرسىنبەك قاباتوۆ ارنايى سىيلىققا يە بولدى.
ودان بولەك، ۇلتتىق سپورتقا اقپاراتتىق قولداۋ كورسەتكەن بىرنەشە ب ا ق وكىلدەرىنە دە سىي- سياپات كورسەتىلدى.
«التىن تۇعىر-2018» سىيلىعىنىڭ يەگەرلەرى:
«ۇزدىك مەرگەن» - ابزال تۇرلىبەكوۆ (جامبىل وبلىسى)؛
«ۇزدىك بايگە اتى» - «قاراكوز» جۇيرىكتىڭ يەسى ارتىعالي ميرازوۆ، شاباندوزى بەكزات ءسادۋاقاس (الماتى وبلىسى)؛
«ۇزدىك كوكپار كومانداسى» - «قۇلاگەر» (تۇركىستان وبلىسى)؛
«ۇزدىك كوكپارشى» - اسلانبەك سايدۋللا (تۇركىستان وبلىسى)؛
«ۇزدىك شاباندوز» - باۋىرجان مىرزابايەۆ (الماتى وبلىسى)؛
«ۇزدىك اۋدارىسپاقشى» - شىڭعىسحان ەرجانوۆ، ازامات سەرعازين (اقتوبە وبلىسى)؛
«ۇزدىك تەڭگە ءىلۋشى» - ماعجان ساپاربەك (تۇركىستان وبلىسى)؛
«ۇزدىك قۇسبەگى» - باباجان بەرىكبولسىن (جامبىل وبلىسى)؛
«ۇزدىك قازاق كۇرەسىنىڭ پالۋانى» - ەرسۇلتان مۇزاپپاروۆ (شىمكەنت قالاسى)؛
«ۇزدىك توعىزقۇمالاق ويىنشىسى» - اسەل داليەۆا ( قىزىلوردا وبلىسى)؛
«ۇزدىك اسىق اتۋشى» - مۇحتار احمەتوۆ (قوستاناي وبلىسى)؛
«ۇزدىك تورەشى» - نۇرلان دوداي (اقتوبە وبلىسى)؛
«ۇزدىك جاتتىقتىرۋشى» - گۇلنار بازارحانوۆا (ش ق و)؛
«ۇزدىك جەتەكشى» - ەربول ەدىلبايەۆ (التاي رەسپۋبليكاسى).