الماتى پوليتسياسى جەدەل جاردەمدى وتكىزبەگەن جۇرگىزۋشىنى جازالادى

الماتى. قازاقپارات - الماتى پوليتسياسى جەدەل جاردەم كولىگىن وتكىزبەگەن «نيسسان» جۇرگىزۋشىسىنە جازا قولداندى، دەپ حابارلايدى قازاقپارات ءتىلشىسى.

نيسسان جۇرگىزۋشىسى دابىل قاققان جەدەل جاردەم كولىگىنە بەتپە-بەت كەلىپ، جول بەرمەي تۇرعانى ۆيدەوعا ءتۇسىپ قالعان.

«اۋەزوۆ اۋداندىق ءى ءى ب جول-پاترۋل پوليتسياسىنىڭ قىزمەتكەرلەرى تەكسەرۋ جۇمىستارىن جۇرگىزدى. ناتيجەسىندە كولىكتىڭ يەسى كىم ەكەنى انىقتالدى. 45 جاستاعى ايەل اكىمشىلىك جاۋاپكەرشىلىككە تارتىلدى. ق ر ا ق ب ك 598-بابىنىڭ 2-ءبولىمى بويىنشا (ارنايى جارىق جانە دىبىس سيگنالدارى ىسكە قوسىلعان جەدەل جانە ارنايى قىزمەتتەر كولىك قۇرالىنىڭ جۇرۋىنە باسىمدىق بەرمەۋ) 7-15 اەك كولەمىندە ايىپپۇل سالۋ قاراستىرىلعان»، - دەدى جەرگىلىكتى پوليتسيا قىزمەتىنىڭ باسشىسى جاسۇلان بايكەنوۆ.

ەسكە سالا كەتسەك، Instagram الەۋمەتتىك جەلىسىندەگى @kris_p_almaty پاراقشاسىندا بەينەروليك جاريالانعان بولاتىن. وندا كولىك رۋلىندەگى ايەل ادام جەدەل-جاردەم كولىگىنىڭ وتۋىنە كەدەرگى جاساپ تۇر. ۆيدەوروليك 45 مىڭ كورىلىم جيناپ، وندا وسى وقيعاعا بايلانىستى كوپتەگەن سىني پىكىرلەر جازىلعان.