الەمنىڭ كوپتەگەن حايۋاناتتار باعىندا قولتىراۋىندار كوپ جاعدايدا قوزعالىسسىز جاتادى، سەبەبى ولاردىڭ بارلىعى (كايماندار، ۇزىن تۇمسىق قولتىراۋىندار، الليگاتورلار) - سالقىن قاندىلار. ياعني، بۇل رەپتيليالاردىڭ بەلسەندىلىگى قورشاعان ورتاعا بايلانىستى. اڭشىلىققا شىقپاس بۇرىن نەمەسە قانداي دا ءبىر قيمىل جاساماس بۇرىن ولار قاجەت تەمپەراتۋرانى جيناپ الۋلارى كەرەك.
قولتىراۋىندار قوزعالمايتىن ءارى ەنجار بولىپ كورىنگەنىمەن، رەاكسيالارى وتە جىلدام بولىپ كەلەدى. ەڭ قىزىعى دا سول، قوزعالىسسىز جاتقان دەنە اياق استى ءبارىن جويعىش جاۋىزعا اينالادى. الماتىنىڭ حايۋاناتتار باعىنىڭ كەيبىر قوناقتارى بۇعان كۋا دا بولعان. ۇزىندىعى ءۇش مەتر قولتىراۋىن فيدەل تەرراريۋمداعى اينەكتى سىندىرىپ، بارلىعىن دۇرلىكتىرگەنى بار.
تاماقتاندىرۋ كەزىندە قاۋىپسىز قاشىقتىقتان قولتىراۋىننىڭ بارلىق «ونەرىن» كورۋگە بولادى. كەيبىر حايۋاناتتار باعىندا بۇل شارانى قوناقتارعا ارنالعان شوۋعا اينالدىرادى. ماڭگىلىككە ەستە ساقتالىپ قالار بۇل ءساتتى تاماشالاۋ ءۇشىن ونداعان ادام جينالادى.
الماتىنىڭ حايۋاناتتار باعىندا سەربەر لاقاپ اتىمەن سيام قولتىراۋىنى بار. مۇنداعى قىزمەتكەرلەردىڭ ايتۋىنشا، لاقاپ اتىن مىنەزى وتە اۋىر سەربەر ەسىمدى توبەتكە ۇقساتىپ قويعان. بۇل قولتىراۋىن ءالى كىشكەنتاي، ۇزىندىعى شامامەن 1,5 مەتر، ەگەۋقۇيرىقتاردى جاقسى كورەدى. زينا ەسىمدى كايمان قولتىراۋىن كولەمى مەن مىنەزى جاعىنان سەربەرگە ۇقساس. الايدا، زووباق قىزمەتكەرى ميحايل سوروكوۋموۆتىڭ ايتۋىنشا، ول بۇدان ارى وسپەيدى، سەبەبى تابيعاتى سونداي. ايتقانداي، قولتىراۋىن زينا 1972 -جىلى تۋعان جانە ول الماتى حايۋاناتتار باعىنىڭ ەڭ ۇزاق ءومىر ءسۇرىپ كەلە جاتقان رەپتيلياسى.
فوتو: ميحايل سوروكوۋموۆ