مۇسىلمان قاۋىم اسىعا كۇتكەن قاسيەتتى رامازان ايىنىڭ اياقتالۋىنا دا ساناۋلى كۇندەر قالدى. رامازان ايىندا ورازا ۇستاۋدان بولەك جاعدايى بار ادامدار ءپىتىر ساداقا بەرۋگە مىندەتتى.
بيىلعى ءپىتىر ساداقا كولەمى 300 تەڭگە. بۇعان دەيىن ءپىتىر ساداقا مەشىتتەردە قولما- قول نەمەسە ارنايى جاشىكتەر ارقىلى بەرىلسە، ەندى تەرمينالدار ارقىلى اۋدارۋ مۇمكىندىگى بار.
بۇل تۋرالى «مەشىتتەرگە ساداقا تەرمينالدارى ورناتىلۋدا. مەشىتتىڭ ەسەپ- شوتىنا تۇسكەن قارجى قايىرىمدىلىق شارالار مەن قۇلشىلىق ءۇيىنىڭ كوممۋنالدىق شىعىندارى مەن ءدىن قىزمەتكەرلەرىنىڭ جالاقىسىنا، عىلىمي، يگى جوبالارعا جۇمسالادى. بۇل - قولما-قول اقشادان ارىلۋ دەگەن ءسوز. ءمۇفتياتتىڭ بۇل باستاماسى كەزەڭ- كەزەڭىمەن جۇزەگە اساتىن بولادى»، - دەپ حابارلادى قازاقستان مۇسىلماندار ءدىني باسقارماسىنىڭ باسپا ءسوز قىزمەتىنىڭ جەتەكشىسى اعابەك قونارباي ۇلى.
ايتا كەتسەك، سوڭعى جىلدارى مەشىت قاراجاتىنىڭ اشىق كورسەتىلمەيتىنى، يمامداردىڭ رامازان ايىندا بەرىلگەن ساداقا مولشەرى مەن ونىڭ جۇمسالۋى تۋرالى ەسەپ بەرمەيتىنى جايىندا الەۋمەتتىك جەلىدە حالىق ءجيى تالقىلاعان بولاتىن.
وسى ورايدا جۋىردا ماجىلىستە ماقۇلدانعان «ءدىني قىزمەت جانە ءدىني بىرلەستىكتەر ماسەلەلەرى» تۋرالى زاڭ نەگىزىندە بارلىق ءدىني بىرلەستىكتەر جىلىنا ءبىر رەت ب ا ق ارقىلى تۇسكەن ساداقا مەن قايىرىمدىلىق كومەك تۋرالى ەسەپ بەرۋگە مىندەتتەلدى.