ەكولوگيالىق اكسيا Eurasian Resources Group باستاماسىمەن ەلوردانىڭ بىرنەشە ساۋدا جەلىسىندە ءوتتى، دەپ حابارلايدى قازاقپارات.
بۇگىن، ياعني بۇكىلالەمدىك قورشاعان ورتا كۇنىندە استاناداعى Galmart, كەڭمارت، الما جانە SMALL ساۋدا جەلىلەرىنىڭ ساتىپ الۋشىلارى ءۇشىن ەرەكشە شارا ۇيىمداستىرىلدى. سۋپەرماركەتكە ساۋدا جاساۋعا كەلگەن دۇكەن قوناقتارىنا ادەتتەگىدەي پوليەتيلەن پاكەتتەر ەمەس، وزدىگىنەن ىدىراپ كەتەتىن، قورشاعان ورتاعا زيانى جوق ەكوپاكەتتەر تاراتىلدى. سىرت كوزگە مۇنداي سومكەلەر كادىمگى پوليەتيلەن پاكەتتەن ەش ەرەكشەلەنبەيدى، ەسەسىنە 2-5 جىل ىشىندە ىدىراپ كەتەدى.
«جىلىنا الەمدە 500 ميلليارد پوليەتيلەن پاكەت پايدالانىلادى. مينۋت سايىن شامامەن ءبىر ميلليونداي پلاستيك بوتەلكە ساتىپ الامىز. سوڭعى 10 جىل ىشىندە پايدالانىلعان پلاستيك كولەمى سوڭعى 100 جىلدا قولدانىلعان پلاستيك اۋقىمىنان كوپ. سوندىقتان ءبىزدىڭ توپ استانا تۇرعىندارىنىڭ نازارىن وسىلاي اۋدارتىپ وتىر. وسى ماقساتتا ارنايى بيوپاكەتتەر شىعارىپ، حالىققا تاراتتىق»، - دەيدى ەۋرازيالىق توپتىڭ (ERG) قورشاعان ورتانى قورعاۋ دەپارتامەنتى ديرەكتورى تالعات تورەبەكوۆ.
ساتىپ الۋشىلار ءۇشىن مۇنداي اكسيا كۇتپەگەن وقيعا، ال بيوپاكەتتەر ناعىز جاڭالىق بولدى.
«قولدانۋ كەرەك ەكەن، مۇنداي ەكوپاكەتتى ءبىرىنشى رەت الىپ تۇرمىن. تاجىريبە جاساپ، پاكەتتىڭ قانشا ۋاقىتتا ىدىراپ كەتەتىنىن انىقتاپ كورەمىن. قىزىقتىردى. ارينە، پلاستيكتەن باس تارتۋ كەرەك»، - دەپ پىكىرىمەن ءبولىستى استانا تۇرعىنى ەلەنا ميروشنيكوۆا.
دۇكەننىڭ كەي قوناقتارى ەكولوگيالىق دۇنيەلەردى بۇرىننان پايدالاناتىنىن ايتتى، الايدا وسى جولى تاراتىلعان پاكەتتەر ولار ءۇشىن دە جاڭا زات بولىپ وتىر ەكەن.
«ءبىر كەزدەرى قاعاز پاكەتتەر مەن توقىما سومكەلەر ۇستايتىنمىن، ءبىراق كەيىن كادىمگى پلاستيككە قايتا كوشتىم. اكتسيا وتە پايدالى جانە ماڭىزعا يە. بولاشاقتا تەك ەكولوگيالىق تازا جانە زيانسىز كومپونەنتتەر قولدانۋعا تولىقتاي كوشۋ ءۇشىن، بۇل شارانىڭ قازاقستاندىقتارعا جاقسى وي سالاتىنىنا ءۇمىتتىمىن»، - دەيدى دۇكەن كليەنتى دينارا ىسقاقوۆا.
Eurasian Resources Group باسشىلىعى كومپانيانىڭ قورشاعان ورتانى لاستاۋدى توقتاتۋ ءۇشىن بار كۇشىن سالىپ جاتقانىن ايتادى.
«وتكەن جىلى قازاقستان بويىنشا تابيعاتتى قورعاۋ شارالارىنا دەپ 20 ميللياردتان استام ءبولىندى. تازالاۋ سۇزگىلەرىمىزدى قورشاعان ورتاعا بارىنشا از اسەر ەتۋ ءۇشىن وڭتايلاندىرىپ، شارالار قولدانىپ جاتىرمىز»، - دەپ ءسوزىن قورىتىندىلادى تالعات تورەبەكوۆ.
بۇكىل الەمدىك قورشاعان ورتانى قورعاۋ كۇنى 1974 -جىلدان بەرى جىل سايىن ب ۇ ۇ باستاماسىمەن اتاپ وتىلەدى. وسى جىلى ول تابيعاتتى پلاستيكپەن لاستاۋعا قارسى كۇرەسكە ارنالىپ وتىر. ال قازاقستان 2018 -جىلى قورشاعان ورتانى قورعاۋ سالاسىنداعى قىزمەتىنىڭ 30 جىلدىعىن اتاپ وتۋدە.