ءمولدىر اۋەلبەكوۆا اۋكسيوندا قازاقستاندىق بوكسشىنىڭ قولعابىن ساتىپ الدى

اتىراۋ. قازاقپارات - اتىراۋدا «Astana Arlans» كومانداسى بوكسشىلارىنىڭ قولعاپتارى اۋكسيونعا قويىلىپ، ساتىلدى، دەپ حابارلايدى قازاقپارات ءتىلشىسى.

ايتا كەتەيىك، كەشە كەشكە بۇكىلالەمدىك بوكس سەرياسىنىڭ (WSB) VIII ماۋسىمىنىڭ جارتىلاي فينالدىق ويىنى اياقتالدى. الەمدىك دودادا WSB جوباسىنىڭ ءۇش دۇركىن چەمپيونى «Astana Arlans»  ۇلى بريتانيانىڭ «BritishLionhearts» كومانداسىمەن كەزدەسىپ، جەڭىسكە جەتتى.

 

ويىن سوڭىندا اۋكسيون وتكىزىلىپ، ءباسساۋداعا «Astana Arlans» كومانداسى بوكسشىلارىنىڭ قولعاپتارى قويىلدى.

وڭىرلىك كوممۋنيكاتسيالار قىزمەتىنىڭ حابارلاۋىنشا، ءدۇبىرلى دودادا جەڭىسكە جەتكەن قامشىبەك قوڭقابايەۆتىڭ قولعابى 3 ميلليون 700 مىڭ تەڭگەگە ساتىلدى. سونداي- اق، ءانشى، ەسترادا جۇلدىزى ءمولدىر اۋەلبەكوۆا اسلانبەك شىمبەرگەنوۆتىڭ قولعابىن 600 مىڭ تەڭگەگە ساتىپ الدى.

اۋكسيوننان تۇسكەن بارلىق 7 ميلليون تەڭگە ناۋقاس بالالاردىڭ ەمدەلۋىنە جۇمسالاتىن بولادى.

 

 

اۆتور: اباي ابىلاي ۇلى