اقىننىڭ ولەڭدەرى قازاق حالقىنىڭ تالاي عاسىرلىق مۇڭى مەن قۋانىشىن، سىرى مەن سيپاتىن ايتادى. وقىپ وتىرىپ ءبىر اقىننىڭ جىرىن عانا ەمەس ءبىر ۇلتتىڭ سان عاسىرلىق ساليحالى تاريحىن ارالاعانداي بولاسىز.
ولجاس ولەڭدەرى قازاق پەن ورىس اراسىندا عانا ەمەس، ەۋروپا ەلدەرى، كىشى ازيا، قىتاي، امەريكا ەلدەرى اراسىندا ءوزىنىڭ اسقاق قازاقى ءۇنىن اسپانداتا ساڭقىلداتادى. ەندەشە اقىننىڭ ەل ەسىندە قالعان تۇجىرىمدى ويلارىن نازارلارىڭىزعا ۇسىنامىز.
*
مەنىڭ ءدىنىم - ماحاببات.
*
اقيقات قاشان دا اڭعال كەلەدى.
*
ماحابباتتىڭ دا ءوز تەورەتيكتەرى مەن پراكتيكتەرى بولادى.
*
قازاقتاردىڭ مورالدىك كودەكسىن ولاردىڭ ماقال-ماتەلدەرى مەن اڭىز-ءاپسانالارىنان ىزدەڭىز.
*
مادەنيەت دەگەنىمىز - كىسىلەر اراسىندا ادام بولۋ ونەرى.
*
مەن ءار حالىقتىڭ ەرتەگىلەرىن وقۋدى ۇناتامىن: بۇل عاجاپ عادەت - حالىقتار دۇنيەتانىمىن ەجەلگى اۆتورلار مەتافورالارى ارقىلى تانۋعا جاتادى.
*
تاريحشى عىلىمي جاتتاندىلىق بىتكەننىڭ بارىنە كۇمانمەن قاراعانى ءجون.
*
جىلنامالاردا حالىق تاريحىنىڭ تەك درامالىق ساتتەرى، سوعىستار عانا قامتىلادى. بەيبىتشىلىك تاريح جادىندا ۇزاق ساقتالمايدى.
*
ءتىل - جازعىشتاردىڭ تالكەگىنەن امان قالعان تاريحي اقپاراتتىڭ ەڭ باي رەزەرۆۋارى.
*
كەز كەلگەن ءتىل دەرەكسىزدىككە (ابستراكتسيا) قۇمار. ال ەڭ تازا ءسوز - جۇيەلىلىك جانە سەمانتيكالىق تۇرعىدا مونوپوليسكە اينالعان ءسوز.
*
«ءتولتۋما مادەنيەت» دەگەن پاتريوتتىق ۇعىمدى الدەبىر الىس مۇحيت تورىندە سان عاسىرلار بويى كەمە زاكىر (ياكور) تاستاپ كورمەگەن ارالعا قاتىستى عانا قولدانۋعا بولادى.
*
گۇلدەنگەن مادەنيەت دەگەنىمىز - سان عاسىرلار بويى وزگە مادەنيەتتەرمەن ۇزدىكسىز بايلانىس جاساۋدىڭ جەمىسى. تىلگە قاتىستى دا وسىنى ايتۋعا بولادى.
*
جازبا ادەبيەت ءتىلى - مەملەكەتتىلىكتىڭ ءبىرىنشى ايىرىم بەلگىسى.
*
كوشپەلىلەر ورحون-ەنيسەي جازبالارىنان باسقا ەشتەڭە دۇنيەگە اكەلمەسە دە - الەمدىك مادەنيەتكە قوماقتى ۇلەس قوسقان حالىقتار اراسىنان ويىپ ورىن سۇراۋعا حاقىلى. ولار بىزگە كەرەمەت حرامدار مۇراعا قالدىرعان جوق، ولار وق-ءدارى (پوروح) دە، قاعاز دا ويلاپ تاپقان جوق. ءبىراق تاسقا ماڭگىلىككە قاشالعان نەمەسە حالىق زەردەسىندە باعزىدان ساقتالعان ادەبي وي - سولاردان كەم ماڭىزدى مادەنيەت ەلەمەنتتەرى دەپ كىم ايتا الادى؟!
*
قايسىسىن تاڭداۋ كەرەك؟ شەكسپيردىڭ «ۇنەمى وزىڭمەن-ءوزىڭ بولىپ قالۋى» ما، الدە وعان كەراعار «ءوز بويىڭداعى ەڭ جاقسى قاسيەتتەردى جارقىراتىپ اشۋ» ما؟ ەلىمىزدى كوپتەن بىرگە مەكەندەپ كەلە جاتقان باسقا دا حالىقتارمەن بىرگە تىعىز قارىم-قاتىناستا دامىعان جاڭا قازاق ۇلتىنىڭ الدىندا تۇرعان قازىرگى ماڭىزدى ماسەلە وسى.
*
ءوزىڭدى-ءوزىڭ تانۋ ءتارىزدى، تاريحتى تانىپ ءبىلۋ دە - قازىرگى دامۋ پروتسەسىنە اسا قاجەت ارەكەت. ول - بولماي قويمايتىن جوعالتۋلار مۇڭىن تەرەڭىرەك سەزىنۋگە مۇمكىندىك بەرەدى، سونىمەن بىرگە پروگرەسكە كەڭ جول اشادى.
*
دانىشپاندار تۋرالى زەردە - ولاردىڭ وزدەرى كوتەرگەن ماسەلەلەردىڭ وزەكتىلىگى جويىلعانشا عانا ەل جادىندا ساقتالادى.
*
شوقان - وتكەندە ءومىر سۇرگەن بۇگىننىڭ ادامى. ونىڭ ءوز «بۇگىنى» - ءوز ارمانىنىڭ بالقىمايتىن قۇرامداس بولشەكتەرىنەن، ۇمىتسىزدىكتەن، ومىرگە شەكسىز قۇشتارلىق پەن پەسسيميزمنەن تۇراتىن. ونىڭ ەڭ تاماشا رەاليستىك فانتازيالارى - قالىپتاسقان جاعداي شىندىعىنىڭ دوكىر ەتىگىنىڭ تابانىنىڭ استىندا قالىپ، تۇنشىعىپ ءولدى. ول وتىز جىل (1835-1865) ءومىر ءسۇردى. ونىڭ ءومىرى - قازاق حالقىنىڭ تاريحىنداعى تۇتاس ءبىر ءداۋىر. ونىڭ بۇكىل عۇمىرى - سيمۆول. شوقان تاعدىرى - مۇحيتتىڭ ءدامىن تانىتار تامشى ىسپەتتەس.
*
تاۋلاردى الاسارتپاي، دالانى بيىكتەتەيىك!
*
اقىن - ءوزىنىڭ تۋعان توپىراعىنىڭ ەلشىسى. الەم اقىنعا قاراپ، ونىڭ تۋعان حالقى تۋرالى وي تۇيەدى. اقىن ءوز حالقىنا ادامزات مادەنيەتىنىڭ، بۇكىل دۇنيەجۇزى مادەنيەتىنىڭ نۇرىن شاشادى.
*
قاراما-قايشى كوزقاراستارعا قاشاندا ءبىر جاقتىلىق ءتان - ولاردىڭ ەكەۋى دە بىردەي اقيقاتتان الىس جاتادى: شىندىق - ورتاعا، ەكۆاتورلىق ايماققا تاياۋ تۇرادى.
*
ەتنوستار ءبىر-ءبىرىن جەكە تۇلعالاردىڭ كەزدەسۋى ارقىلى تانيدى.
*
«حالىقتار دوستىعى» دەگەن - ناقتى ادامدار اراسىنداعى دوستىق پەن ءوزارا قۇرمەت سەزىمىنسىز، ابستراكتىلى ءھام تۇرلاۋسىز ۇعىم.
*
ادەبي شىعارمانىڭ مازمۇنى قوعامدىق سانادان ءنار الىپ، ءتىل ارقىلى جۇزەگە اسادى.
*
تۇركىلىك قوعامدا ايەلدەرگە كەڭ قۇقىقتار بەرىلگەن، ولار مەملەكەتتىك ىستەرگە بەلسەنە ارالاسقان. تاقتىڭ مۇراگەرىن انا تاربيەلەگەن.
Massaget.kz