كەيبىر كاسىپكەرلەر 5 ليتردەن كوپ كوجە ساتىپ العاندارعا سىيلىققا 2 كەلى باۋىرساق بەرىلەتىنىن جازعان، دەپ حابارلايدى قازاقپارات ەلورداينفو سايتىنا سىلتەمە جاساپ.
ماسەلەن، Olx.kz سايتىندا جارناما بەرگەن ساتۋشى 5 ليتر ناۋرىز كوجە ساتىپ العان ادامعا 2 كەلى باۋىرساقتىڭ سىيلىققا بەرىلەتىنىن جازعان. بەلگىلى بولعانداي، ناۋرىز كوجە قالا شەتىندەگى ءدامحانانىڭ بىرىندە دايىندالادى. جۇگەرى، بۇرشاق، بيداي، ەت، سۋ، تۇز جانە قۇرت قوسىلعان كوجەنى كاسىپكەر ءبىر ليترىن 1 مىڭ تەڭگەگە باعالاپ وتىر.
تاعى ءبىر جەلى قولدانۋشىسى 10 ليتردەن كوپ العان ادامعا كوجەنى 800 تەڭگەدەن بەرەتىنىن جازعان. ءارى تاپسىرىس ءۇش ليتردەن جوعارى بولسا جەتكىزۋ تەگىن ەكەنىن كورسەتكەن.
كەلەسى جارنامانىڭ اۆتورى كوجەنىڭ ءبىر ليترى 1500 تەڭگە تۇراتىنىن جازعان. قوڭىراۋ شالعان كەزدە «ءبىزدىڭ كوجەمىزگە استاناداعى ءبىرقاتار ەلشىلىكتەر تاپسىرىس بەردى. ءدامدى ەكەن دەپ، ءبارى ماقتادى»، دەپ ماقتانىپ الدى. بۇل كاسىپكەردىڭ ۇسىنعان بار جەڭىلدىگى - 10 ليتردەن ارتىق العانعا تەگىن جەتكىزۋ قىزمەتى.
ناۋرىز مەرەكەسى Event اگەنتتىكتەردىڭ تابىس تابۋىنا دا جاقسى مۇمكىندىك بولدى. سەبەبى، الەۋمەتتىك جەلىلەردە مەرەكەگە ارنالعان ۇجىمدىق كەشتەردە پايدالانۋ ءۇشىن ۇلتتىق كيىمدەر مەن قاجەتتى تۇرمىستىق زاتتاردى جالعا بەرۋ مەن ساتۋ تۋرالى جارناما جەتكىلىكتى. ماسەلەن، ۇلتتىق كيىمدەر، كورپە- جاستىق پەن نايزا، ەر- تۇرماندى جالعا بەۋدىڭ ەڭ تومەنگى باعاسى 3 مىڭ تەڭگەدەن باستالادى. ەرتەگى مەن اڭىز كەيىپكەرلەرىنىڭ كوستيۋمدەرى دە بار.
ۇلتتىق ستيلدەگى كادەسىيلار دا سۇرانىسقا يە زاتتاردىڭ قاتارىندا. ماسەلەن، كىشكەنتاي كيىز ۇيلەر 1 مىڭ تەڭگە، اعاشتان جاسالعان بۇيىمدار 8 مىڭ تەڭگەدەن باستالادى. اعاشتان ويۋ سالىنىپ جاسالعان سۋ جاڭا قازاقى جەر ۇستەلدىڭ باعاسى - 30 مىڭ تەڭگە. بازارداعى ساتۋشىلارمەن ساۋدالاسسا بەس مىڭ تەڭگەگە ارزان الۋعا بولادى.
ناۋرىزعا ارنالعان دايىن سىيلىقتاردىڭ قاتارىندا تاتتىلەر سالىنعان كارزەڭكە كوش باستاپ تۇر. 1800 تەڭگەگە ورىك- مەيىز، قۇرت، كەپتىرىلگەن جەمىستەردىڭ ءتۇر- ءتۇرىن تاڭداپ الۋعا بولادى.
ۇلتتىق مۋزىكالىق اسپاپتاردا وينايتىن ونەرپازدار دا ناۋرىز مەرەكەسىنەن ءناپاقا تابۋ مۇمكىندىگىن قالت جىبەرمەگەن سىڭايلى. الەۋمەتتىك جەلىدە «تەك قانا ۇلتتىق ونەردى ناسيحاتتايمىز، قازاقشا اندەر ورىندايمىز» دەگەن سىڭايداعى مۋزىكالىق اسپاپتاردان قۇرالعان توپتاردىڭ جارناماسى ءورىپ ءجۇر.