ولاردىڭ سوزىنشە فيلمدە تاريح بۇرمالانعان. ال ونى كورگەن ءتۇرلى ۇلتتار مەن حالىقتار اراسىنا جىك ءتۇسۋى ابدەن مۇمكىن.
رەسەيلىكتەر تۇسىرگەن «يگرى پرەستولوۆ» اسىرەسە تاتار تاريحشىلارىنىڭ كوڭىلىنەن شىقپاي وتىر.
«التىن وردا» (زولوتايا وردا) سەريالىنىڭ ءتۇسىرىلىم جۇمىستارى بىرنەشە جىل بۇرىن باستالعان. سول كەزدە-اق، كينو كارتينكانىڭ ماعىناسى مەن «يگرى پرەستولوۆ» سەريالىنا باسەكەلەس بولادى» دەگەن باستامالار تاريحشىلاردىڭ نازارىن اۋدارعان ەدى.
فيلمگە تاريحي جاعداي نەگىز بولعانىنا قاراماستان اۆتورلار كوپتەگەن كەيىپكەرلەر ويدان قۇراستىرىلعان، ال جانرى- فانساستيكا دەگەن ەدى. سەريالدىڭ انونسىندا بىرنەشە باستى كەيىپكەر بولاتىنى تانىستىرىلدى. ولار: ورىس كنيازى، التىن وردا حانى جانە ەكى تاراپتىڭ جاس سۇلۋلارى.
12- ناۋرىز كۇنى ءبىرىنشى ارنادان 16 سەريالدى فيلمنىڭ پرەمەراسى بولدى. العاشقى ەكى سەرياسىن كورگەن كوپشىلىك بىردەن وزدەرىنە ۇناماي قالعان تۇستارىن ءتىزىپ بەردى.
«بۇل فيلمدە تاتارلار مەن وردالىقتاردى ءبىر-بىرىنە اتاجاۋ ەتىپ كورسەتكەن. كارتينكادا ولار كوشپەلى، كۇركەدە تۇراتىن دالا حالقى بولىپ سۋرەتتەلگەن. تاريحتا بەركە مەن باتۋ بيلىك قۇرعان كەزدە ۇلكەن قالالار بولعان.
مىسالعا، ۇكەك كەيىننەن ساراي-ءال -جاديد. ولار سول كەزدىڭ وزىندە كيەۆ، لوندون، پاريج قالالارىنان ۇلكەن بولعان. اۆتورلار تاتار بيلىگىن تالاس-تارتىستان، تەك ۇرىس-كەرىستەن، كەكتەن باسى ارىلماعان ەتىپ كورسەتەدى.
ەگەر بۇل فانتاستيكا بولسا باسقاشا اتاۋ بەرگەندەرى دۇرىس ەدى. مىسالى «يگرا پرەستولوۆ» فيلمىنە ەشقانداي دا تاريحي شاعىم ايتپايمىز عوي. «التىن وردا» فيلمى تاتار تاريحىن ازعىنداتىپ كورسەتىپ وتىر»، - دەيدى تاتار تاريحشى يسكاندەر يزمايلوۆ.
اۆتورلار بولسا كينوكارتينكانىڭ نارىقتا ءوز ورنىن تابۋ ءۇشىن بىرنەشە جىل ەڭبەك ەتتىك دەپ وتىر.
ءبىز «التىن وردا» فيلمىن ءبىرىنشى ارنا وكىلدەرىمەن بىرگە 5 جىل بۇرىن جوسپارلاعانبىز. اقىلداستىق، سەريالعا ارقاۋ بولاتىن نەگىزگى وقيعالاردى تاڭدادىق.
تەك رەسە نارىعىنا ەمەس وزگە دە ەلدەردىڭ قىزىعۋشىلىعىن ارتتىرۋدى ويلاستىردىق. ماقساتىمىز رەسەيدە بۇرىن سوڭدى تۇسىرىلمەگەن دۇنيەنى جاساپ شىعۋ بولدى.
التىن وردانىڭ دۇركىرەگەن داۋرەنىن الدىق. تاريحي فاكتىلەردەن سانالى تۇردە قاشىپ، ءالى كۇنگە تاريحشىلار داۋلاسىپ جۇرگەن تۇستاردى تاڭدادىق.
بىزدەگى وقيعالار مەن كەيىپكەرلەردىڭ بارلىعى ويدان قۇراستىرىلعان. «التىن وردا» شىمشىتىرىققا تولى مەلودراما»، - دەپ تۇسىندىرگەن فيلمنىڭ باس پروديۋسەرى رۋبەن ديشديشيان رەسەيلىك ارنالارعا بەرگەن سۇحباتىندا.