«جاتاقحانا قۇرىلىسىنىڭ ينۆەستيتسيالىق تارتىمدىلىعى تۋراسىندا سويلەسسەك. نە سەبەپتەن ستۋدەنتتەرگە ارنالعان جاتاقحانانى سالۋ ءتيىمدى؟ بۇل جەردە ەكى فاكتور بار. ءبىرىنشىسى داعدارىس جاعدايىندا اسىرەسە ءبىلىم بەرۋ سالاسىنا كوپتەپ قارجى قۇيىلادى. ياعني، ءبىلىم بەرۋ گرانتتارى كوبەيەدى. سول جاعدايدا ستۋدەنتتەردىڭ سانى كوبەيگەننەن كەيىن جاتاقحانادا تۇراتىن ستۋدەنتتەردىڭ سانى تۇراقتى بولادى. ونىڭ ۇستىنە جەكەمەنشىك ۇيگە قاراعاندا، جاتاقحانا الدەقايدا ءتيىمدى»، - دەدى ساراپشى پرەزيدەنتتىڭ بەس الەۋمەتتىك باستاماسى تالقىلانعان استانادا وتكەن باسپا ءسوز ءماسليحاتىندا.
الۋا جولدىبالينانىڭ ايتۋىنشا، شەت مەملەكەتتەردە جاتاقحانالاردى باسقارۋ بەلگىلى ءبىر كومپانياعا تاپسىرىلادى.
«سول كومپانيا جاتاقحانانى ءوز اكتيۆىنە الىپ، ستۋدەنتتەردى ىزدەيدى. ول الەمدەگى قالىپتاسقان تاجىريبە. ياعني، جاتاقحانالاردى باسقارۋ مەنەدجمەنتى بار. شەتەلدىك ەكونوميستەردىڭ مالىمەتتەرىنە قۇلاق اسساق، ەگەر جالعا بەرۋدەن تۇسەتىن پايدا 2-3 پايىزدى قۇراسا، ال جاتاقحانا سالاسىندا ەكونوميكالىق تابىس جىلىنا 4-6 پايىزدى قۇرايدى. قازىرگى كەزدە كوپتەگەن قۇرىلىس كومپانيالارى تۇرعىن ۇيلەردەن گورى، جاتاقحانالاردى سالۋعا دەن قويۋدا»، - دەدى ول.
ساراپشىنىڭ كەلتىرگەن مالىمەتىنە سۇيەنسەك، سوڭعى 5 جىلدا ستۋدەنتتىك جاتاقحانا سالۋدان ەڭ كوپ جۇمىس ىستەگەن گەرمانيا مەملەكەتى. گەرمانيا بۇل باعىتتا 220 ميلليون ەۋروعا جۋىق ينۆەستيتسيا قۇيعان.
«ەندى گەرمانيا ينۆەستيتسيانى 2020 -جىلعا دەيىن 22 پايىزعا ۇلعايتامىز دەپ وتىر. ودان بولەك، ا ق ش- تا جاتاقحانا تۇرعىزاتىن كوپتەگەن قۇرىلىس كومپانيالارىنا جەڭىلدىك بەرىلەدى. سونىمەن قاتار، ستۋدەنتتەر جاتاقحاناسى قۇرىلىسىنا ينۆەستيتسيانى كوپتەپ سالاتىن ەلدەردىڭ ىشىندە ۇلى بريتانيا مەملەكەتى دە بار. 75 مىڭ ورىندىق جاتاقحانا سالۋدا مەملەكەتتىڭ كۇشىمەن بىرگە، ىسكە بيزنەس وكىلدەرىن دە شاقىرۋ كەرەك. بيزنەس مەملەكەتتىك- جەكەشەلىك ارىپتەستىك نەگىزىندە جاتاقحانا قۇرىلىسىن جۇرگىزۋى ءتيىس. بۇگىن دە الەمدەگى ەڭ ۇلكەن شۆەد كومپانياسى جاتاقحانا بويىنشا ۇلكەن جوبانى جۇزەگە اسىرۋدا. ودان بولەك ا ق ش- تىڭ قۇرىلىس كومپانيالارى جەكەمەنشىك جاتاقحانانى سالىپ جاتىر»، - دەيدى ساراپشى.
الۋا جولدىبالينانىڭ ايتۋىنشا، بۇگىنگى الەمدىك ترەند - مودۋلدىك تەحنولوگيالار نەگىزىندە سالىنعان جاتاقحانالار. ياعني، قۇرىلىس كومپانيالارىنىڭ جاتاقحانا تيپىندەگى مودۋلدىك تۇرعىن ۇيلەردى سالۋ ۇلكەن كىرىس اكەلىپ جاتىر. ونىڭ ىشىندە، ا ق ش- تاعى ءىرى قۇرىلىس كومپانيالارى سوڭعى 7 جىلدا تەك تۇرعىن ءۇي نارىعىندا ستۋدەنتتىك جاتاقحانانى سالۋعا كىرىسكەن.
«ا ق ش، گەرمانيا سەكىلدى مەملەكەتتەردىڭ سوڭعى 5 جىلداعى جۇمىس باعىتىن باعامداساق، جاتاقحاناعا ينۆەستيتسيا سالۋ جانە ونى باسقارۋدا ۇلكەن مەنەدجمەنتتەرگە دەن قويىپ جاتىر. كانادادا ستۋدەنتتەردىڭ وزىنەن قۇرىلعان ۇكىمەتتىك ەمەس ۇيىمدار بىرىگىپ، جاتاقحانا سالىپ، ونى وزدەرى باسقارىپ ءجۇر. ياعني، فورماتتار ءار ءتۇرلى. بىزگە بيزنەس قۇرىلىمدارمەن بىرىگە وتىرىپ، جالپى جاتاقحانا سالۋدىڭ تيىمدىلىگى بويىنشا الگوريتمدەر مەن مەحانيزمدەردى ويلاستىرۋ كەرەك. بۇل جوبا ارينە وتە ءتيىمدى بولادى»، - دەپ ءتۇيدى ساراپشى.
اۆتور: ايان بەكەن ۇلى