ادامنىڭ وي- پىكىرى، مىنەزى، قوعامدا تۇلعا رەتىندە قالىپتاسۋى، ادامدىعى - كورگەن تاربيەسىنە بايلانىستى. ال بالانى تاربيەلەۋدە اتا- اناسىنىڭ جاسى، تاجىريبەسى، ءبىر- بىرىمەن قارىم- قاتىناسى تىكەلەي اسەر ەتەدى. قازاق ءداستۇرى بويىنشا كوپ وتباسىندا تۇڭعىش بالا اتا- اجەسىنىڭ تاربيەسىنە بەرىلەدى. مۇنداي بالالار مەيىرىمدى بولادى. باسقا بالالارعا قاراعاندا اقىلدى بولادى، سەبەبى اتا- اناسى جاس، ال بالاسى اقىل توقتاتقان، ءومىر كورگەن اتا- اجەسىنىڭ تاعىلىمىن الىپ، دانىشپان بولادى. اۋىلداعى اتا- اجە تاربيەلەسە، قازاقيلىققا ءبىر تابان جاقىن بولىپ، سالت- داستۇرگە قانىعىپ وسەدى. كوشباسشىلىققا، بيلىككە جاقىن. قاتارلاستارى ءوزىن بيلەپ- توستەگەندى ۇناتپايدى. سەبەبى بالانىڭ ۇلكەنى بولعاندىقتان، باۋىرلارى ءوزىنىڭ ايتقانىمەن ءجۇرىپ، ءتىلىن العانىنا ۇيرەنگەن. كەرىسىنشە، ادامدارعا ءسوزىن وتكىزە الادى، ۇيىمداستىرۋ قابىلەتى جوعارى. وسى قاسيەتتىڭ «ارقاسىندا» ونىڭ بويىندا ازداعان جالقاۋلىق بولۋى دا ىقتيمال. وزىنەن كىشىلەر تۇرعاندا ساۋساعىن ارتىق قيمىلداتپاي داعدىلانسا، سوڭى وسى قاسيەتكە اكەلەدى. ەسەسىنە، موينىنا العان ءىسىن اياعىنا جەتكىزبەي تىنبايدى، اسا مۇقيات، تياناقتى ورىندايدى.
اتا- اناسىمەن قاتار قۇربىداي، ەركىن سويلەسە الادى. ولار دا ۇيدەگى ماسەلەنى شەشۋدە، تاڭداۋ جاساۋدا، كەز كەلگەن جاعدايدا الدىمەن تۇڭعىش بالامەن اقىلداسادى. اتا- اناسىنان جىراققا كەتكەندە دە، وسى قاسيەت قالىپ قويادى، جانىنداعىلار شەشىم قابىلداعاندا وزىمەن اقىلداسۋىن قالايدى. كوپ جاعدايدا اكەسىنە قاراعاندا اناسىنا جاقىنىراق بولادى، بار سىرىن ايتا الادى. تۇلا بويىم تۇڭعىشىم دەپ، اناسى كوبىرەك مەيىرىمگە بولەيدى. باۋىرمال، قامقور، جاناشىر. بارلىق ادامدى باۋىرىنداي كورىپ، قول ۇشىن سوزۋعا، قارجىلىق جاعىنان بولسىن، پسيحولوگيالىق كەڭەس بەرۋدە بولسىن - قولىنان كەلگەنىن ايانباۋعا تىرىسادى. جاۋاپكەرشىلىگى وتە جوعارى. وزىنەن كەيىنگى ءىنى- قارىنداستارىنىڭ (سىڭلىلەرى) تاربيەسىنە دە ارالاسىپ، ولاردى «ادام قاتارىنا» قوسۋعا ءوزىن جاۋاپتى سانايدى. اقىل ايتار، جول كورسەتەر باۋىرى بولماي، ءۇيدىڭ ۇلكەنى بولعاندىقتان، ءوزىن ءوزى الىپ جۇرۋگە ۇيرەنەدى. باسقا ىستەردە دە جاۋاپتىلىعىن ۇمىتپايدى.
اقشانى ۇنەمدەپ جۇمساپ، بارلىعىنا جەتكىزە الادى. ازداپ وزىمشىلدىك قاسيەت تە وتباسى تۇڭعىشتارىنىڭ بويىنان تابىلادى. ەڭ جاقسىسى وزىندە بولعانىن قالايدى. ويتكەنى كىشكەنتايىنان قاجەتتى نارسەسىن الدىمەن وزىنە الىپ بەرگەنىنە ۇيرەنگەن. بۇل قاسيەتتەر باسقا بالالاردىڭ دا بويىنان تابىلۋى مۇمكىن، دەگەنمەن وتباسىنداعى العاشقى بالالاردا كوبىرەك كەزدەسەتىن قاسيەتتەر - وسىنداي.
پسيحولوگ پىكىرى حانىم ورىنبايەۆا: وتباسى اتتى شاعىن مەملەكەتتە بار تاربيەنىڭ باستاۋى جاتىر. جانۇياداعى تۇڭعىش بالانىڭ باسقا بالالاردان ارتىقشىلىقتارى بار. ولار كوبىنەسە جاۋاپكەرشىلىگى جوعارى ءارى شىدامدى، كەز كەلگەن سيتۋاتسياعا ءتوزىمدى كەلەدى. اتا- انادان كەيىنگى سەنىمدى تۇلعا رەتىندە وزدەرىن ءۇيدىڭ جارىق جۇلدىزى سانايدى. ولار شىندىعىندا اتا- اناسىن جوقتاتپايدى. مەيىرىمدى، وزدەرىنە سەنىمدى كەلەدى. كەيدە تەك وزدەرىن ويلاپ كەتەدى، بارلىعىن ءوزىم جاسايمىن دەپ باسقالاردىڭ ىسىنە كۇمانمەن قارايدى.
اتا- انا پىكىرى دانا حيباسوۆا: مەنىڭ التى بالام بار، تۇڭعىش قىزىمدى 21 جاسىمدا ومىرگە اكەلدىم. ول ءۇيدىڭ ۇلكەنى بولسا دا ەركە، سەبەبى اتا- اجەسىنىڭ مەنشىگىندەگى بالا. ءارى باسقالارىنا قاراعاندا وتە باياۋ قوزعالادى، مۇنى دا اجەسىنىڭ جانىندا كوپ جۇرگەنىنەن دەپ تۇسىنەمىن. ءبىراق تاپسىرىلعان ءىستى قانشا جاي جاساسا دا، ۋاقىتىلى ءارى تياناقتى اياقتايدى. باسقا باۋىرلارىن تاربيەلەۋگە بىزگە كومەكتەسەدى، كەمشىلىگىمىزدى وڭاشادا ايتىپ وتىرادى. ءۇيىمىزدىڭ العاشقى قىزىعى بولعاندىقتان بارلىعىنىڭ نازارى وسى قىزىمدا بولدى، ءالى دە سولاي، سوندىقتان بولۋى كەرەك، ءوزىن- ءوزى باعالاۋى جوعارى. ايتا بەرسەم، ارتىقشىلىعى كوپ، باسقا بالالارىم ءبىر توبە بولسا، تۇڭعىشىمنىڭ ورنى - ءبىر توبە. تانىستارىڭىز اراسىنان وتباسىنىڭ تۇڭعىش بالالارىن ەسىڭىزگە ءتۇسىرىپ، سيپاتتالعان قاسيەتتەرمەن سالىستىرىپ كورىڭىز، قانشالىقتى سايكەس كەلەدى؟ ءسىز تاعى قانداي قاسيەتتەر قوسار ەدىڭىز؟
Massaget.kz