قارالى جيىنعا اكتەردىڭ ارىپتەستەرى، تۋعان-تۋىستارى، ونەرسۇيەر قاۋىم وكىلدەرى، ق ر مادەنيەت جانە سپورت ءمينيسترى ارىستانبەك مۇحامەدي ۇلى، الماتى اكىمى باۋىرجان بايبەك قاتىستى.
«بۇگىنگى قازا - تەك قازاق ونەرىنىڭ عانا ەمەس، بۇكىل دۇنيەجۇزى ونەرىنىڭ قازاسى. ءوزىمىز ماقتانىشپەن ايتاتىن «قىز جىبەك» فيلمى قازاقتىڭ كىم ەكەنىن، سالت ءداستۇرىن، رۋحاني بايلىعىن كورسەتكەن فيلم ەدى. سونداعى باستى رولدەردى سومداعان قازاقتىڭ تولەگەنى قۇمان تاستانبەكوۆ پەن مەرۋەرت وتەكەشوۆا ەكەۋى قىز جىبەك پەن تولەگەن وبرازىن قازاق حالقىنا ۇلگى ەتىپ قالدىرعان ەدى. وتكەن جىلى عانا قۇمان تاستانبەكوۆ «پاراسات» وردەنىمەن ماراپاتتالعان بولاتىن. ەلباسىنىڭ شاقىرتۋىمەن ارنايى استاناعا كەلگەن ەدى. ول كىسىنىڭ قازاسى بارشا قازاق حالقىنىڭ قابىرعاسىن قايىستىردى»، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى.\
قالا باسشىسى باۋىرجان بايبەك مارقۇمنىڭ قازاسى الماتى قالاسىنىڭ مادەني دامۋىنا سوققى بولعانىن ايتتى.
«اعامىزدىڭ سانالى عۇمىرى الماتىمەن بايلانىستى بولدى. 1945-جىلى الماتى وبلىسىندا دۇنيەگە كەلگەن اعامىز الماتىداعى كونسەرۆاتوريانى ءبىتىرىپ، ساحنادا جۇمىس ىستەي باستادى. قازاق جاستارى بۇل كىسىگە ەلىكتەپ، ۇلكەن ازامات بولىپ ءوستى. كەڭەس زامانى كەزىندە شىققان «قىز جىبەك» فيلمى ءار قازاق ءۇشىن ماقتانىش سەزىمىن تۋدىرارى ءسوزسىز. ەلىمىزدە بۇل فيلمدى بىلمەيتىن قازاق جوق شىعار. ءار قازاق ءۇشىن ول كىسىنىڭ قازاسى اۋىر بولىپ وتىر. اعامىزدىڭ ونەرى ەشقاشان ۇمىتىلماق ەمەس. الماتى جۇرتشىلىعى اتىنان كوڭىل ايتامىز»، - دەدى باۋىرجان بايبەك.
مارقۇمنىڭ دەنەسى كەڭساي زيراتىنا جەرلەنىپ، مەيرامحانادا اس بەرىلدى.
قۇمان تاستانبەكوۆ 1945-جىلى بۇرىنعى تالدىقورعان وبلىسىندا دۇنيەگە كەلگەن. قازاقستاننىڭ حالىق ءارتىسى، قازاقستان لەنيندىك كومسومول سىيلىعىنىڭ لاۋرەاتى، «قۇرمەت»، «پاراسات» وردەندەرىنىڭ يەگەرى. 1969-جىلى قازاق مەملەكەتتىك قۇرمانعازى اتىنداعى كونسەرۆاتوريانىڭ تەاتر فاكۋلتەتىن بىتىرگەن. ول ساحنادا و. بوكەيەۆتىڭ «قۇلىنىم مەنىڭدەگى» - جان، «ۆەتنام جۇلدىزىنداعى» - ۇشقىش، ءا. نۇرپەيىسوۆتىڭ «قان مەن تەرىندە» - تاڭىربەرگەن، ع. مۇسىرەپوۆتىڭ «اقان سەرى-اقتوقتىسىندا» - اقان، س. مۇقانوۆتىڭ «شوقان ءۋاليحانوۆىنداعى» - شوقان، ت. احتانوۆتىڭ «انتىندا» - ساۋران، م. اۋەزوۆتىڭ «ايمان-شولپانىندا» - الىبەك، ت. احتانوۆتىڭ «جوعالعان دوسىندا» - ەستەمەسوۆ، ش. ايتماتوۆتىڭ «انا- جەر-اناسىندا» - قاسىم، «اق كەمەسىندە» - قۇلبەك، ە. دومبايەۆتىڭ «ءبىزدىڭ كلاستىڭ قىزدارىندا» - تولەگەن، ب. مۇقايدىڭ «ءومىرزاياسىندا» - تسەزار، ف. ەرۆەنىڭ «تۇلكى بيكەشىندە» - فلوريدور، ن. حيكمەتتىڭ «فارحاد- شىرىنىندا» - فارحاد سىندى نەگىزگى رولدەردى سومدادى. تەاتر رەپەرتۋارىندا ءجۇرىپ جاتقان سپەكتاكلدەردە -شاحيماردەننىڭ «توميريسىندە» - بالقاش، س. تورايعىروۆتىڭ «قامار سۇلۋىندا» - ومار، س. مۇقانوۆتىڭ «ءمولدىر ماحابباتىندا» - جاقىپبەك، ت. نۇرماعانبەتوۆتىڭ «ەسكى ۇيمەن قوشتاسۋىندا» - جالعاسبەك، ب. جاكيەۆتىڭ «جۇرەيىك جۇرەك اۋىرتپايىندا» - قاريا، م. زادورنوۆتىڭ «كۇيەۋىڭىزدى ساتىڭىزشى» كومەدياسىندا - اندرەي، گ. گاۋپتماننىڭ «ىمىرتتاعى ماحابباتىندا» - شتەينيتس، شەكسپيردىڭ «رومەو مەن دجۋلەتتاسىندا» - مونتەككي، د. كوبۋرننىڭ (اۋد. ە. امانشايەۆ) «جىن ويناعىندا» - ۆەللەر مارتين (رەج. ە. ا مانشايەۆ، ا. كاكىشيەۆا)، ا. چەحوۆتىڭ «اپالى-ءسىڭلىلى ۇشەۋ» دراماسىندا (اۋد. ءا. بوپەجانوۆا، رەج. ر. اندرياسيان، ا. كاكىشيەۆا) - كۋلىگين رولدەرىن سومداعان.
«ق. تاستانبەكوۆتىڭ كينو ونەرى سالاسىنداعى ەڭبەگى دە ەلەۋلى. ول اتاقتى «قىز جىبەك» فيلمىندەگى (رەجيسسەر س. قوجىقوۆ، سەناري ع. مۇسىرەپوۆ، رەداكتور ا. سۇلەيمەنوۆ، 1970) تولەگەن رولىمەن «جۇلدىزى جانعان» اكتەر. بۇدان كەيىن دە كوپتەگەن فيلمگە - «ءبىزدىڭ عاني» » (1971)، «قىس - سۋارمالى كەزەڭ ەمەس» (1972)، «مۇندا اققۋلار ۇشىپ كەلەدى» (1973)، «اققۋلار جاڭعىرىعى» (1974)، «قوسىمشا ساۋالدار» (1978)، «اعامنىڭ قالىڭدىعى» (1979) ، «پروۆينتسيالدى رومان» (1981) ، «قاراشا قازدار قايتقاندا» (1981) ، «ورنەك» (1982)، «الاڭ جيەگىندە» (1982)، «كىمسىڭ سەن، سالت اتتى؟» (1987)، «ادام-جەل» (2003)، «ماحامبەت» (2008) ت. ب. تۇسكەن»، - دەلىنگەن اۋەزوۆ تەاترىنىڭ مالىمەتىندە.
اكتەردىڭ انشىلىك ونەرى دە بار. ول بىرنەشە سپەكتاكلدە ءان ورىندايدى. قازاقستاننىڭ حالىق ءارتىسى (1993)، ك س رو كينەماتوگرافيستەر وداعىنىڭ مۇشەسى (1991)، قازاقستان لەنيندىك كومسومول سىيلىعى لاۋرەاتى (1976).
«قۇرمەت» وردەنىنىڭ يەگەرى (2008)، ق ر تاۋەلسىزدىك كۇنىنە وراي، المالى اۋدانىنىڭ الەۋمەتتىك، ەكونوميكالىق، قوعامدىق، ساياسي ومىرىنە قوسقان ۇلەسى، جوعارى كاسىبي بىلىكتىگى مەن ازاماتتىق بەلسەندىلىگى ءۇشىن ماراپاتتالدى.
اۆتور: گۇلميرا عوسمانالي