شىلدە ايىندا بريتانيالىق ساياحاتشى ەلەكتر كوزىنەن قۋات الاتىن كولىگىمەن لوندوننان استاناعا ۇزاق ساپارعا اتتاندى. LEAF AT- EV ەلەكتروموبيلى قازاقستانعا جەتەم دەگەنشە 16000 شاقىرىم قاشىقتىقتى وتكەرگەن. كريس - قورشاعان ورتانى لاستامايتىن كولىك قۇرالدارىن جانە جابايى تابيعاتقا بايلانىستى تۇراقتى تۋريزمدى ناسيحاتتاۋمەن اينالىساتىن كومپانيانىڭ نەگىزىن قالاۋشى.
ءبىزدىڭ مەملەكەتكە كەلەر الدىندا ول اۆستريا، تۇركيا، گرۋزيا جانە ازەربايجان ەلدەرىن ارالاعان. كريستىڭ ايتۋىنشا، قازاقستاندا ول تىلسىم تابيعات پەن جايدارى مىنەزدى ادامداردى كورىپ ريزا بولعان.
«جەرگىلىكتى حالىقتىڭ كورسەتكەن قوناقجايلىعى ءبىزدى ءتانتى ەتتى. قازاقستان ءبىز بارعان ەلدەردىڭ ىشىندە وق بويى وزىق تۇر. ەلدەرىڭىزدى وتە ۇناتىپ قالدىق. مادەنيەتتەرىڭىز وتباسىلىق قۇندىلىقتارعا قۇرىلعان. سىزدەردە كوپبالالى جانە تۋىسقاندارمەن تىعىز بايلانىستا بولۋ ءارى ۇلكەندەردى سىيلاۋ وتە جاقسى دامىعان. ءبىز ۇلتتىق تاعامدارىڭىز: قىمىز، شۇبات جانە باۋىرساقتاردىڭ ءدامىن تاتتىق، دەيدى ساياحاتشى.
ساپار بارىسىندا كريس اقتاۋ، اقتوبە، اتىراۋ، قوستاناي، كوكشەتاۋ جانە استانا قالالارىندا بولعان. ەلوردامىزدا ساياحاتشى ەكسپو-2017-گە قاتىسىپ، ونى تۇگەل تاماشالاپتى. كولەمى جانە مازمۇنىنا ءتانتى بولعان ول كورمەدەن ەرەكشە اسەر العانىن ايتادى. كريس رەمسيدىڭ ايتۋىنشا، قازاقستاننىڭ العا ۇمتىلىسى تاڭ قالدىرادى. «كورگەن-بىلگەنىمنەن مۇناي مەن گاز تاۋەلدىلىگىنەن بولاشاقتا قۇتىلاتىندىعىمىزعا كوزىم جەتتى. بۇل ارينە قۋانتادى. قازاقستان بۇل ماسەلە بويىنشا البەتتە العا باسىپ بارادى»، كريستىڭ ەلەكتروموبيلى جاڭا ەمەس.
ءبىراق بۇل جايت ۇزاق قاشىقتىقتاردى وتكەرۋگە كەدەرگى بولمادى. قازاقستاندىق تاراپ كولىگىن قۋاتتاندىرۋعا قاجەت بارلىق جابدىقتارمەن قامتاماسىز ەتىپ وتىرعان. ول ەلدىڭ اسەم جەرلەرىن تاماشالاپ، جاڭا دوستار تاپقانىنا قۋانىشتى.