1000 جىلدىق تاريحى بار الىپ شاھاردا وسىمەن ءۇشىنشى جىل قاتارىنان ۇيىمداستىرىلىپ وتىرعان ەتنو- فەستيۆال ەلىمىزدە عانا ەمەس، كۇللى تۇركى الەمىندە كونە مۇرانى كوزىنىڭ قاراشىعىنداي ساقتاپ كەلە جاتقان جىرشى- تەرمەشىلەردىڭ اسىعا كۇتەتىن سالتاناتتى كەشىنە اينالعان. ايتۋلى شارا قازاق، قىرعىز، نوعاي، تۇركىمەن، قاراقالپاق، باشقۇرت، وزبەك ەلىنىڭ جىر- تەرمەلى ورىندالىپ، ءتۇبى ءبىر تۇركىنىڭ ادەبيەتى مەن مادەنيەتى، ءدىلى مەن ءداستۇرى ورتاق ەكەنىن تانىتتى.
بيىل دا قاراقالپاقستان، وزبەكستان، تۇركىمەنستاننان شاقىرتىلعان جىرشىلار «كورۇعلى»، قاراقالپاق حالىق تەرمەسى سىندى تاريحى تەرەڭ شىعارمالاردى ورىنداپ، تىڭداۋشىلارىن ءتانتى ەتپەك.
سونىمەن قاتار، سىر، ورال، ماڭعىستاۋ ءوڭىرىنىڭ جىراۋلىق ونەرىنىڭ حاس شەبەرلەرى، بۇگىنگى قازاق جىرشىلارىنىڭ اقساقالدارى حاتيموللا بەردىعالييەۆ، بيداس رۇستەمبەكوۆ، وسەرباي سارسەنبايەۆ باستاعان جىرشى- تەرمەشىلەرىمىز ونەرلەرىن ورتاعا سالادى.
ساحنادا مۇرات موڭكەنىڭ «ءۇش قيان» داستانى، سۇگىردىڭ تولعاۋى، نارتايدىڭ باستاۋى، مايلىقوجانىڭ «جاقسى ءبىر ادام قارتايسا» تەرمەسى، بالتاباسوۆ تۇمەننىڭ «ماڭعىستاۋ» داستانى ورىندالادى.
ونەر كەشىندە جاس جىرشىلار دا حالىق الدىنا شىقپاق. دالىرەك ايتساق، ۋاتحان شاتتىق، جۇلدىز ىسقاقوۆا جانە راۋان ابىلبايەۆ ۇلت مۇراسىنىڭ تۇنىعىنان ءنار تاتىرماق.
كەشتە ايتىلاتىن جىر- تەرمەنىڭ شىعۋ تاريحى باياندالىپ، ونىڭ جەتكىزۋشىسى جايىندا ادەمى اڭگىمە ءوربيدى.
اۆتور: الماس مۇقاش ۇلى