بالالار اقشا ۇعىمىن اسا جاقسى تۇسىنە بەرمەيدى، سوندىقتان قولىندا باردى تەك جاراتۋ كەرەك دەپ ويلايدى. وسى جاعدايدىڭ الدىن الۋ ءۇشىن، ەرتەڭگى كۇنى بالالارىڭىزعا اقشا ۇستاۋدى ۇيرەتۋ ءۇشىن مىنا كەڭەستەردى قاپەرىڭىزگە الىڭىز. بالاعا اقشا تابۋ ءۇشىن قانشا ەڭبەكتەنەتىنىڭىزدى ايتىڭىز، بانك تەك ونى قاۋىپسىزدىكتە ۇستايتىن جەر ەكەنىن ءتۇسىندىرىڭىز. ەسىن بىلە باستاعان شاقتان، 4-5 جاسىنان باستاپ، قولىنا اقشا بەرىپ قويىڭىز. ورىندى جەرىنە ءوزى جۇمساي ءبىلۋدى وسىلايشا ۇيرەنەدى. بالا ءوز بيۋدجەتىمەن ءوزى جۇمىس ىستەي بىلەتىن بولۋى كەرەك. ەگەر وعان بىرنارسە قاجەت بولسا، قالاعان نارسەسىن ساتىپ الۋى ءۇشىن ءوزى اقشا جيناسىن. ءسىز بەرگەن اقشانى تەك ماڭىزى اسا جوعارى دۇنيەلەرگە عانا جۇمساۋدى ۇيرەنەدى، ارتىلعانىن جيناپ قويادى. كوزدەگەنىمە قول جەتكىزەمىن دەپ اقشا جيناۋ جولىندا ادامگەرشىلىكتەن اتتاپ كەتپەۋدى دە ەسكەرتىڭىز.
ومىردە جەتىستىككە جەتۋدىڭ باستاپقى ساتىلارى رەتىندە قالاعانىنا ءوز كۇشىمەن قول جەتكىزگەنىن جاتقىزۋعا بولادى. مۇنىڭ ماراپاتى رەتىندە ءوزى جيناعان اقشانى دۇكەن كاسساسىندا ءوزى تولەۋىنە مۇمكىندىك بەرىڭىز. بالا مۇنى ەشقاشان ۇمىتپايدى ءارى اسا قۋانىپ قالادى. ءوز تاڭداۋىنا وكىنبەس ءۇشىن ۇناتقان نارسەسىن الدىمەن جان- جاقتى قىرىنان سارالاپ الۋدى ۇيرەتىڭىز. قازىرگى بالالار ينتەرنەتتى اتا- اناسىنان جاقسى ءبىلىپ جاتسا دا تاڭعالمايمىز. ولارعا عالامتور ارقىلى باسقا ساۋدا ورىندارداعى باعانى، ساپانى سالىستىرىپ، ەڭ جاقسىسىن تاڭداۋ كەرەك ەكەنىن ايتىڭىز. سودان كەيىن عانا تاپسىرىس بەرۋ ارقىلى نە بارىپ ساتىپ الۋعا بولادى.
ساتىپ الۋدا عانا ەمەس، ومىردە دە ءوزى تاڭداعان نارسەدەن باس تارتۋعا، وعان وكىنۋگە بولمايتىنىن ۇقتىرىڭىز. شىعىندارىن قاداعالاۋ. كەز كەلگەن ادام ارتىق شىعىن جۇمساماۋى ءۇشىن اقشانىڭ قايدا كەتىپ جاتقانىنا ەسەپ بەرە الاتىنداي بولۋى كەرەك. ول ءۇشىن ەرىنبەستەن جۇمساعان اقشاسىنىڭ ءتىزىمىن جازىپ وتىرعان دۇرىس. بالاڭىزدى مۇندايعا كىشكەنە كەزىنەن داعدىلاندىرىپ، شاعىن بلوكنوت بەرىڭىز نە ەسەبىن نوۋتبۋككە، پلانشەتكە جازسىن. الدە چەكتەرىن جيناپ جۇرەتىن ءاميان بەرسەڭىز دە، بالاعا بۇل قىزىقتى بولادى. بالاعا قولىنداعى اقشاسىنىڭ بەلگىلى ءبىر بولىگىن قايىرىمدىلىققا بەرۋدى، وزگەلەرگە سىيلىق الۋدى ۇيرەتىڭىز. سوندا ونىڭ ساناسىندا اقشا تەك قاجەتتىلىكتەردى ساتىپ الۋ ءۇشىن ەمەس، باسقالارعا قۋانىش سىيلاۋ ءۇشىن دە قاجەت دەگەن تۇسىنىك بالا كەزىنەن قالىپتاسادى.
Massaget.kz