ماتريارحاتقا كونبەگەن ەركەك جۇدىرىق جۇمسايدى، سوڭى اجىراسۋعا اكەلەدى.
بۇل تۋرالى kerek-info.kz جازادى.
اجىراسۋ - بۇگىندە قازاق قوعامىن القىمداپ، اتانى بالادان الىستاتقان جاۋ. ستاتيستيكا بويىنشا، قازىر شاڭىراق كوتەرگەن جۇپتىڭ ۇشتەن ءبىر بولىگى العاشقى جىلى-اق ايرىلىسىپ تىنادى. پسيحولوگتار بۇرىن شاڭىراق شايقالار قاۋىپتى كەزەڭ دەپ بەسىنشى جانە ونىنشى جىلدى ايتاتىن. جەتكەن جەرىمىز سول، جاس جۇبايلاردىڭ جۇرەگىندە مازداعان ماحابباتتىڭ جىلۋى جىلدان اسپاي سۋيتىن بولعان. «بالاعا ءبىر تيىن بەرمەيدى...». «كوكەك اكە»، «كوكەك انا». «كوزىمە ءشوپ سالدى». «كور كەۋدە بولىپ شىقتى...». «جىگىتتەر جىگىت بولۋدى قويدى». «ءجونى ءتۇزۋ قىز تاپپايسىڭ». قوعامدا الەۋمەتتىك تەرمينگە اينالعان ءسوز تىركەستەرى.
«جاقسى بولسا العانىڭ، ۇيىڭنەن كىسى كەتپەيدى. جامان بولسا العانىڭ، شىن دوسىڭ دا شەتتەيدى». بۇل ماقالدار اتام زاماننان بار. ال بۇگىندە ءجۇز جولدىڭ ءبىرى پسيحولوگقا اپارادى. ماماندار ۇلتتىق دۇنيەتانىم مەن پسيحولوگيانىڭ عىلىمي ۇستانىمدارىنىڭ باسىن ءتۇيىستىرىپ كوردى. بابالارىمىزدان قالعان: «العانىڭ جاقسى بولسا، ىرىسىڭنىڭ تۇراعى»، «قاتىنىڭ جامان بولسا، ۇيىڭنەن مەيمانىڭ كەتەدى» دەگەن سەكىلدى ناقىل سوزدەر كوپ.
«بۇل ماقالداردا جاۋاپكەرشىلىكتى بولۋدە پسيحولوگيالىق قاتەلىك جىبەرىلگەن: وتباسىندا ەر ادامدى نە جاقسى، نە جامان «قىلاتىن» ايەل سياقتانادى»، - دەيدى پسيحولوگ مارات عۇسمانوۆ.
كۇيەۋى ۇرماي تۇرىپ، ايەلدىڭ ءوزى تيراننىڭ ءرولىن اتقارادى ەكەن. كۇيەۋىنىڭ مازاسىن الا باستايدى. ءوزىنىڭ دە ىقىلاس- ءىلتيپاتقا مۇقتاج ەكەنىن تۇيسىنە بەرمەيدى. قالىپتى الەۋمەتتىك ءتاسىلدى قولدانىپ، «جانىم، ماعان كوڭىل ءبولشى، ەكەۋمىز ءبىر جاققا بارساق، مەنىمەن كوبىرەك سۇقباتتاسقانىڭدى قالايمىن» دەمەيدى. ونىڭ ورنىنا، «كورشىگە قارا، اناۋ انانى قاتىرىپتى، سەن بولساڭ مىناۋ، ديۆاندا جاتىرسىڭ!» دەپ قۇلاق ەتىن جەي باستايدى. بۇل - كۇيەۋىنە ءجابىر كورسەتۋ بولىپ سانالادى. اقىر سوڭىندا ايەل تيراننان زارداپ شەگۋشىگە، ال كۇيەۋى تيرانعا اينالعانىن بىلمەي قالادى. ادەتتە، بۇدان سوڭ ءوزىن قول كوتەرگەنى ءۇشىن كىنالى سەزىنگەن ەركەك قۇلدىق ۇرىپ، كەشىرىم سۇرايدى، ال ايەل وسىدان ءلاززات الادى. ءوزىن كەرەك سەزىنەدى. بۇل - كوممۋنيكاتسيا ءتاسىلى. بۇنداي ايەل وزىنە باسقاشا نازار اۋدارتا المايدى. ۇيرەتپەگەن. ۇيرەنبەگەن.
ايەل ادامنىڭ وتباسىن ساقتاپ قالۋداعى كۇش- قارىمىنا قاتىستى، دالەلدەنگەن دۇنيە «3 جاستان كەيىن كەش» دەپ اتالاتىن كىتاپ تا بار. جاپوندىقتار بالا تاربيەلەۋدە وسىنى ۇستانادى، ال جالپى، پسيحولوگتار تۇلعا بەس جاسقا دەيىن قالىپتاسادى دەپ ەسەپتەيدى. ال، ەر ادام قانشا جاستا ۇيلەنەدى؟ جيىرمادان كەيىن عانا وتاۋ قۇرادى. سوندىقتان قايتا تاربيەلەۋ
يدەياسى - كوپتەگەن ايەلدىڭ ۇلكەن قاتەلىگى. بويىنا و باستا قاجەتتى تاربيە سىڭىرىلمەگەن بولسا، ەشنارسەنى الىپ- قوسا المايسىڭ.
دەگەنمەن، ەكەۋى بىرگە تۇرعاندا، ەموتسيونالدىق بايلانىس بولسا جانە ايەل ەركەگىنىڭ دەڭگەيىنە ءتۇسىپ، كۇيزەلىسىن بولىسە السا، ەشتەڭە بولماس ەدى. مىسالى، ەر ادام جۇمىسسىز قالىپ، شىنداپ قامىققاندا، جان دۇنيەسىن ۇعىپ، ءتىلىن تاباتىن، جاقسى كورەتىن ايەلىنىڭ «قاشان جۇمىسقا شىعاسىڭ» دەپ زىركىلدەگەنىن ەمەس، «نەمەن شۇعىلدانعىڭ كەلەدى، سەن ءۇشىن ءقازىر نە ماڭىزدى»، «قانداي ويداسىڭ» دەگەن سەكىلدى بۇل كۇيزەلىستى ەكەۋلەپ جەڭۋگە سەپ بولار سۇراقتاردى قويعانىن ءتاۋىر كورەدى. وكىنىشتىسى سول، كوپ ايەلدەر كۇيەۋىنىڭ جانىن جەگىدەي جەپ، قاقساي بەرۋ ارقىلى ايتقانىما كوندىرەمىن، دەگەنىمە جەتەمىن دەپ ويلايدى.
ايەل ادام جۇرگىش بولسا، بۇل ونىڭ جان دۇنيەسىندەگى ولقىلىقتىڭ، جارىمجاندىلىقتىڭ بەلگىسى. جۇرەگىنىڭ تۇكپىرىندە ەلگە بىلدىرمەيتىن جان جاراسى بار دەگەن ءسوز. بالالىق شاعىندا زورلىق كورىپ، ءيا بىرەۋدىڭ جامان ىسكە بەيىمدەۋى نە ينتسەستى باسىنان كەشكەن بولۋى ابدەن مۇمكىن. قۇندىلىقتاردىڭ ورنى توسەك قاتىناسىمەن الماستىرىلعان، بۇل دا سول ايەلدىڭ ءوزى ۇعىنا بەرمەيتىن نارسە. ەر ادامعا تانىنەن وزگە نە ۇسىنارىن بىلمەيدى. سوندىقتان، جۇرگىش ايەلدىڭ ءوزىن باعالاۋى تىم تومەن دەڭگەيدە.
نەگىزىندە، ولاردىڭ كوبى - جان دۇنيەسىندە پەرنەسى باسىلماعان تۇكپىرلەرى كوپ ادامدار. سول سەبەپتى، كوبىسىنە، عىلىم تىلىمەن ايتقانداعى «ورگازم» ۇعىمى جات، تەك وتىرىك كەيىپ تانىتادى... ال، ءداستۇرلى مادەنيەتتى ۇستانعان ايەل ءۇشىن كوزگە ءشوپ سالۋ - وتە اۋىر نارسە. اففەكتكە (اشۋ قىسۋ - اۆت.)، ىشكى كۇيزەلىس كەزىندە جول بەرۋى مۇمكىن. پسيحيكالىق تۇرعىدا ءتىرى ولىككە اينالماس ءۇشىن بارۋى مۇمكىن. ويتكەنى، دەپرەسسيانىڭ اۋىر فورماسىندا ادام ءوزىن ءتىرى ولىك سياقتى سەزىنەدى.
وكىنىشكە وراي، وسى كۇيدە كوپ ايەل قاتەلىككە ۇرىنادى: كولدەنەڭ كوك اتتىمەن شاتاسادى نەمەسە وزگە جامان جولدى تاڭدايدى. جىلۋ كورمەگەن بالاعا ءتاتتى بەرسە، كەز كەلگەن ەرەسەك الداپ تۇسىرە الادى ەمەس پە؟ كۇيەۋىنىڭ ىقىلاس- نازارى كەمشىن ايەل دە سولاي. ال، ەر ادامدار مۇنى سەزەدى دە، تۇزاققا ءتۇسىرۋى مۇمكىن.