ايتا كەتكەن ءجون، جىل سايىن فەستيۆال ساحناسىندا تۇركى حالىقتارىنىڭ شاعىن توپتارى، ياعني سانى جاعىنان از ۇلتتار دا ونەر كورسەتەدى. ماسەلەن، وسى جولى قىتايدا تۇراتىن «سالار» اتتى حالىقتىڭ، ال يراننان «افشار» ۇلتىنىڭ وكىلدەرى مۋزىكا مەرەكەسىنە العاش رەت قاتىستى. التايدان ات تەرلەتىپ كەلگەن چاينوش بايتوشكينا دا جينالعان جۇرتتى بەي-جاي قالدىرمادى. كومەيمەن ءان ايتۋدىڭ شەبەرى سۋسىلداپ اققان سۋدىڭ، سايراعان قۇستىڭ، ءتىپتى شۋىلداعان ورماننىڭ دىبىسىن كەلتىرىپ، كورەرمەن قاۋىمدى تىلسىم تابيعاتتىڭ كۇشىمەن باۋراپ العانداي بولدى. حالىق التاي تاۋلارىنىڭ شىڭدارىنا كوتەرىلىپ، قۇلديلاپ تومەن ءتۇسىپ، جاسىل جايلاۋدىڭ جەلەگىنە اۋناپ تۇسكەندەي اسەر الدى. باشقۇرت قۋرايشىسى نۇرعالي قايىقبەردى دە ءوز ونەرىمەن ءتانتى ەتتى. ءازىربايجاننىڭ ونەرپازدار توبى نازىك ءۇندى داۋىستارىمەن قازاقستان تۋرالى ءان ايتسا، قىرعىز ءانشىسى نازيرا توكونوۆا تۇركى حالىقتارىنىڭ باۋىرلاستىعىن تاعى ءبىر مارتە ەسكە سالدى. بيىلعى فەستيۆالدە ارقا، جەتىسۋ، سىر مەن ماڭعىستاۋ ءوڭىرىنىڭ اندەرى دە ايتىلدى. گۇلميرا سارينا، جۇمابەك قادىرقۇلوۆ، اقمارال ەرىمبەتوۆا، بولات كاكىشەۆ، سەرىك جاقسىعۇلوۆ، دۇيسەنبەك ءومىرالى، ماقپال ماناسپايەۆا مەن دۇيسەنبەك نابيەۆتەر قازاقتىڭ كۇيشىلىگىن، تەرمەشىلىگى مەن انشىلىگىن پاش ەتتى.
ال ەڭ سوڭىندا بارلىق قاتىسۋشىلار «باياناۋىل» ءانىن شىرقاپ بەردى. «شىنى كەرەك، مۋزىكا ءتىلى - بىرلىكتىڭ ءتىلى. ونى اۋدارۋدىڭ قاجەتى جوق. مۋزىكانىڭ ءتىلىن بىلەتىن الەمنىڭ قاي جەرىنە بارسا دا، ءوز ويىن جەتكىزە الادى»، - دەيدى يراننىڭ قازاقستانداعى توتەنشە جانە وكىلەتتى ەلشىسى مودجتابا داميرچيلۋ.
ازەربايجان ەلشىسى راشاد ماممادوۆ تا «استانا- ارقاۋ» فەستيۆالىنەن ۇلكەن اسەر العانىن جاسىرمادى. «بۇگىن ءبىز ءۇش مىڭ جىلعا كەرى شەگىنىپ، اتا- بابالارىمىزدىڭ داۋىرىنە ساياحات جاساپ كەلگەندەي بولدىق. تاماشا فەستيۆال، تاماشا مۋزىكا. سىزدەر سيقىرلى ءبىر الەمدى جاساپ قويعانداي بولدىڭىز. ءدال وسىنداي شارالار ءبىزدى جاقىنداستىرادى، تاريحىمىزعا تەرەڭ ۇڭىلۋگە ۇندەيدى»، - دەپ اتاپ كورسەتتى ەلشى.
بيىلعى فەستيۆالدىڭ دەكوراتسيالارى، اسىرەسە، الىپ دەنەلى ساربازدار بىردەن كوزگە ءتۇستى. «استانا وپەرانىڭ» كونسەرت زالى تۇركى حالىقتارىنىڭ الەمىنە اينالدى.
ايتا كەتەيىك، ەرتەڭ «استانا- ارقاۋ» فەستيۆالى جالعاسادى. وعان يران، رەسەي، وزبەكستان، قىرعىزستان، تۇركيا، ازەربايجان، موڭعوليا، قىتاي جانە تاعى باسقا ەلدەردىڭ ونەرپازدارى قاتىسۋدا.