الەۋمەتتىك جەلىلەر ارقىلى قىتايدىڭ ءار قالاسىنان جينالىپ استاناعا كەلگەن جانكۇيەرلەر ديماش قىتايداعى بايقاۋعا قاتىسپاي تۇرىپ، وزدەرىنىڭ قازاقستان تۋرالى ەشتەڭە بىلمەگەندىكتەرىن ايتتى.
«جوق. مەن تەك گەوگرافيا پانىنەن قازاقستاننىڭ ۇلكەن مەملەكەت ەكەنىن عانا بىلەتىنمىن. ديماشتىڭ ءانىن ەستىپ ونىڭ ونەرىنە ەرەكشە ءتانتى بولدىم. ول تالانتتى ءانشى جانە قاراپايىم حالىققا ەرەكشە جاقىن. باسقا جۇلدىزدار سياقتى ەشقانداي ەرسى قىلىق كورسەتپەيدى. ونىڭ قاراپايىمدىلىعى، جۇمساق مىنەزى مەنىڭ قازاقستانعا جانە قازاق حالقىنا دەگەن قۇرمەتىمدى ارتتىردى. سوندىقتان، وسى كونسەرتكە قولداۋ ءبىلدىرىپ، ديماشتىڭ تۋعان ەلىن، وسكەن جەرىن جانە تۇراتىن قالاسىن كورۋ تۋرالى شەشىم قابىلدادىم. قازاقستان حالقى دا ديماش سياقتى وتە اقكوڭىل، قوناقجاي ەكەن»، - دەدى چانشا قالاسىنان كەلگەن ين يۋچەن اتتى جانكۇيەر.
سونداي-اق، قوناقتار استانا قالاسى مەن وسى ايماقتاعى بىرنەشە اۋداندى جانە ەكسپو اۋماعىن ارالاپ ۇلگەرگەن.
«تۇنىق اۋا، كوركەم تابيعات جانە قازاقتىڭ ءدامدى ۇلتتىق تاعامى ەرەكشە كەرەمەت اسەر قالدىردى. كونسەرتتەن كەيىن تاعى الماتى قالاسىن سەرۋەندەپ قايتۋدى جوسپارلاپ وتىرمىز»،- دەدى يە ينين.
ايتا كەتەيىك، «باستاۋ» كونسەرتى ەكسپو-2017 حالىقارالىق كورمەسى اياسىندا 27- ماۋسىم كۇنى ەلورداداعى «استانا ارەنا» ستاديونىندا وتەدى. ديماش قۇدايبەرگەن كونسەرتكە قاتىساتىن انشىلەردى كوپشىلىككە جاريالاعان بولاتىن. ولار - قىتايدىڭ بەلگىلى ءانشىسى تەرري لين، ەۆروبايقاۋ-2012 بايقاۋىنىڭ جەڭىمپازى لورين (شۆەتسيا)، ۇلى بريتانيا ءانشىسى سوفي ەليس بەكستور، كريستينا ورباكايتە (رەسەي) جانە قازاقستاننىڭ ەڭبەك سىڭىرگەن ءارتىسى، وپەرا ءانشىسى مايرا مۇحامەد قىزى.
اۆتور: مۇحتار قاليموللا ۇلى