ديماش قۇدايبەرگەننىڭ قىتايلىق جانكۇيەرلەرى استاناعا ۇشىپ كەلدى - فوتو

Sina Weibo الەۋمەتتىك جەلىسىندە اسپان استى ەلىنىڭ ءار قالاسىنان ەلوردامىزعا ات باسىن بۇرعان جانكۇيەرلەردىڭ فوتولارى جاريالانۋدا.

«بەيجىڭ-استانا» باعىتىنداعى اۆيارەيستە قىتاي جۇلدىزى، ديماشتىڭ «Singer2017» بايقاۋىنداعى باستى قارسىلاسى جانە «باستاۋ» ءان كەشىنىڭ قۇرمەتتى قوناعى لينچجيسيۋان (TerryLin) دا بار.

قىتايلىق قوناقتاردىڭ جازۋىنشا، «ەير استانا» اۋە كومپانياسىنىڭ بورتى ەلوردا اۋەجايىنا تاڭعى ساعات 07.20 دا كەلىپ قوندى. ەسكە سالايىق، «باستاۋ» كونسەرتى ەكسپو-2017 حالىقارالىق كورمەسى اياسىندا 27- ماۋسىم كۇنى ەلورداداعى «استانا ارەنا» ستاديونىندا وتەدى.

ديماش قۇدايبەرگەن كونسەرتكە قاتىساتىن انشىلەردى كوپشىلىككە جاريالاعان بولاتىن. ولار - قىتايدىڭ بەلگىلى ءانشىسى تەرري لين، ەۆروۆيدەنيا-2012 بايقاۋىنىڭ جەڭىمپازى لورين (شۆەتسيا)،  ۇلى بريتانيا ءانشىسى سوفي ەليس بەكستور، كريستينا ورباكايتە (رەسەي) جانە قازاقستاننىڭ ەڭبەك سىڭىرگەن ءارتىسى، وپەرا ءانشىسى مايرا مۇحامەد قىزى. سونداي-اق ديماش قۇدايبەرگەن استانادا وتەتىن اقتوبە وبلىسىنىڭ مادەنيەت كۇندەرى اياسىندا 26- ماۋسىمدا ەكسپو-قالاشىعىنىڭ امفيتەاترىندا ونەر كورسەتەدى. وعان سونىمەن قاتار قازاق ەستراداسىنىڭ جۇلدىزدارى مەن اقتوبە وبلىسىنىڭ شىعارماشىلىق ۇجىمدارى قاتىساتىن بولادى.

اۆتور: مۇحتار قاليموللا ۇلى