شەتەلدىك تۋريستەردى اسىرەسە، ايقايقۇمنىڭ تابيعي داۋىسى ەرەكشە اسەرگە بولەدى، دەپ حابارلايدى قازاقپارات ءتىلشىسى. قازىر وسى ايماقتا 11 يتاليا ازاماتى ءجۇر. ولار جالپى قازاقستان جايلى 2015 - جىلى ميلاندا وتكەن «ەكسپو» كورمەسى ارقىلى ءبىلىپتى.
«سول كورمەدە ەكسپو- نىڭ 2017 - جىلى قازاقستان ەلىندە وتەتىنىن ءبىلدىم. ءوزىم يتالياداعى تۋريستىك اگەنتتىكتە جۇمىس ىستەگەندىكتەن بىردەن سىزدەردىڭ ەلدەرىڭىزدىڭ اتى جازىلعان جەرگە سۋرەتكە ءتۇسىپ، حالىقارالىق كورمەنىڭ كەلەسى جولى وسى ەلدە بولاتىنىن الەۋمەتتىك جەلى ارقىلى جاريالادىم. جالپى قازاقستان جانە ونىڭ تابيعاتى جايلى اقپاراتتاردى اقتارا باستادىم. قىزىعۋشىلىق تانىتقاندار كوپ بولدى. مىنە بۇگىن سول ەكسپو كورمەسىنىڭ ارقاسىندا ءبىز قازاق ەلىنە كەلدىك» ، دەيدى يتالياندىق دجامماركو لۋپيني.
تۋريستەردى اسىرەسە «ايقايقۇمنىڭ» ەرەكشە قۇبىلىسى قاتتى تاڭعالدىردى. «بارشا تۋريستەرگە ايتار كەڭەسىم بار. ەگەر ايقايقۇمنىڭ ەرەكشە تابيعي قۇبىلىسىن كورگىلەرىڭىز كەلسە، مىندەتتى تۇردە شىڭىنا شىعۋ كەرەك. ءبىز 150 مەتر بيىكتىكتى باعىندىردىق. قۇمنان شىققان ءدۇرىل داۋىستى ءبىرىنشى رەت ەستىپ تۇرمىز. اسەر كەرەمەت» ، دەيدى تۋريست دانيەلا دجورداني.
يتاليالىقتار قازاق ەلىنە العاش رەت كەلىپتى. اسىرەسە، قازاقتاردىڭ قوناقجايلىلىعىنا ەرەكشە ءتانتى. ولار، وسى «التىنەمەل» پاركىن تولىقتاي ارالاپ بولعاننان كەيىن، شارىن شاتقالىندا ساياحاتتارىن جالعاستىرماق. ال قازاق ەلىندەگى ساپارلارىن ەلوردا تورىندەگى «ەكسپو-2017» حالىقارالىق كورمەسىنە بارىپ، اياقتايمىز دەيدى.
قازىر «التىنەمەل» پاركىنە شەتەلدىكتەر كوپتەپ كەلىپ جاتىر. سونىڭ ءبىرى - سلوۆەنيالىق الەس وۆەن. 32 جاستاعى ول جەتىسۋدىڭ تابيعاتىن كورۋ ءۇشىن قازاقستانعا ارنايى كەلگەن. قازىر جالعىز ءوزى ۇلتتىق پاركتى تاماشالاۋدا. ەرەكشە اسەرگە بولەندىك دەگەن تۋريستەر قازاقستانعا تاعى كەلمەك ويلارى بار. ايتا كەتەيىك، بيىلعى جىلدىڭ 12-15 ماۋسىم ارالىعىندا يۋنەسكو- نىڭ پاريجدەگى شتاب- پاتەرىندە «ادام جانە بيوسفەرا» باعدارلاماسى حالىقارالىق ۇيلەستىرۋ كەڭەسىنىڭ كەزەكتى سەسسياسى ءوتىپ، وندا ەلىمىزدىڭ «التىنەمەل» مەن قاراتاۋ قورىعى يۋنەسكو- نىڭ دۇنيەجۇزىلىك تىزىمىنە ەندى.