سول كەزدەسۋدە دۋلات يسابەكوۆتىڭ «شەتەلدەگى قانداستاردىڭ باسەكەگە قابىلەتتىلەرىن اكەلەيىك»، - دەگەن پىكىرى الەۋمەتتىك جەلىدە قىزۋ تالقىلاندى.
جۋرناليست ۇلاربەك دالەي ۇلى «قارتايعان اتا-اناسىن، اۋىلداعى وقىماعان اعا-ءىنىسىن تاستاپ، سوپايىپ جالعىزدان-جالعىز كەلىپ، كىم وپا تاپپاق مۇندا؟» - دەدى. Jasqazaq.kz ءتىلشىسى وسىعان وراي جازۋشىنىڭ پىكىرىن ءبىلدى.
جاس قازاق: دۋلات اعا، كەشەگى كەزدەسۋدەن كەيىن قانداستارىمىزعا قاتىستى ايتقانىڭىز قىزۋ تالقىعا ءتۇستى. ءسىز نە ايتاسىز؟
دۋلات يسابەكوۆ: ءيا، جۇرتتار «كەمپىر شالدى تاستاپ، بالالارىن الۋ كەرەك» دەپ ايتىپ جاتىر دەيدى. وندايدى ەسى دۇرىس ادام ايتپايدى عوي. پرەزيدەنتتىڭ الدىندا ۇلكەن ماسەلەلەر قوزعالدى. ءتىل پروبلەماسى، دەموگرافيالىق ماسەلە. ونى شەشۋدىڭ بىردەن-ءبىر جولى - شەتەلدەگى قازاقتاردىڭ ءوز انا ءتىلىن ۇمىتپاي تۇرعاندا تۇگەل كوشىرىپ الۋ. 5 ميلليون قازاقتى ەلىمىزگە اكەلۋ كەرەك. اسىرەسە مىناۋ وزبەكستاندا تالاي قازاق بار. 2 ميلليون قازاق كەلەمىز دەپ قۇلشىنىس تانىتىپ وتىر. موڭعوليا مەن قىتايداعى قازاقتاردى جينايتىن بولساق، 5 ميلليوننا استام قانداسىمىز شىعادى ەكەن. سونىڭ ءبارىن مىناۋ قارا ەرتىستىڭ بويىنا ورنالاستىرۋ كەرەك. شارۋاشىلىق ماماندارى اراسىندا دوستارىم بار. سولارمەن دە اقىلداستىم. ءوزىم دە اۋىل پارتياسىنىڭ مۇشەسى بولعاندىقتان كوپتەگەن ماسەلەگە قانىقپىن. ول جاقتا ەگىن ەگۋگە جارايتىن 2 ميلليون گەكتارداي جەر بار. سونىڭ جوسپارىن جاقسىلاپ جاساپ، سول جەرگە شوعىرلاندىرۋىمىز كەرەك. اسىرەسە وزبەكستانداعى قانداستارىمىز جەرمەن وتە جاقسى جۇمىس ىستەي الادى. ونى مىناۋ تەمىرلان مەنەن شىمكەنت اراسىندا شۇبارشىن دەگەن اۋىل بار. تاۋەلسىزدىك العان جىلدارى ورىستار جاپپاي كوشىپ كەتكەن. سول جەر قاراۋسىز قالدى. ولار 200-300 دوللارعا ساتىپ كەتكەن. يسلام ابىشەۆ دەگەن قازىرگى شارۋاشىلىق رەسۋرستار كوميتەتىنىڭ ءتوراعاسى، بۇرىنعى و ق و اكىمىنىڭ ءبىرىنشى ورىنباسارى بولىپ جۇرگەن كەزىندە ماسەلە كوتەرگەن بولاتىن. العاشقى كەزدە 12-13 ادام، مەكتەپ ديرەكتورى كەلىپ جالعىز مەكتەپ سالىندى. ول كەزدە اۋىل اكىمى دەگەن جوق. سول ديرەكتور بىرتە-بىرتە قازاقتاردى تارتىپ، قازىر 30 مىڭنان استام ادام تۇرادى.
جاس قازاق: جەل تۇرماسا ءشوپتىڭ باسى قيمىلدامايدى. بۇل اڭگىمە دە جايدەن-ءجاي شىقپادى عوي. ءسىز ءسوز اراسىندا «باسەكەگە قابىلەتتىسىن شاقىرۋىمىز كەرەك» دەگەندى ايتتىڭىز با؟
دۋلات يسابەكوۆ: جالپى ەلىمىز بارلىق وزگەرىسكە دايىن بولۋ كەرەك. پرەزيدەنت بىلاي دەدى: «ءومىر كۇندە وزگەرىپ جاتىر. قازاق ءالى جايباراقات كۇي كەشىپ جاتقان سياقتى. وزگەرىستەرگە ساي بىزدە جۇمىس ىستەمەسەك، سول باياعى ەسكى جۇرتتا قالامىز». بۇل ءسوز وسىدان شىققان بولاتىن. ولاردىڭ ءبارى دايىن نارسەگە كەلەتىن سياقتى. باسپانا بەر، كۋوتا بەر، مال بەر. ال قازاقستاننىڭ بۇرىننان تۇرىپ كەلە جاتقان حالقى جەتىسىپ وتىر ما؟ مەن باياعىدا موڭعوليامەن العاش قارىم- قاتىناس جاساي باستاعاندا، قاتەلەسپەسەم يسلاموۆ دەگەن عالىم كەلگەن. سول كەزدە مەن وعان: كوزىڭ اشىق ادامسىڭ. عىلىم دوكتورىسىڭ. ءبىزدىڭ ەلدە جەتىسىپ وتىرعان جوق. ول جاقتان كەلەتىن قانداستارىمىز «ءبارىن دايىنداپ بەر» دەيدى ەكەن. ءۇي بەر، سۋ بەر، جىلۋ بەر، جۇمىس بەر، مال بەر. ءبىز قانشا وقيعانى باستان كەشىردىك. اشارشىلىق، ەكىنشى دۇنيەجۇزىلىك سوعىسى. تىزە بەرسەڭ جەتكىلىكتى. سونىڭ ءبارىن بىزبەن بىرگە كورگەن قانشا وتانداسىمىز قازىر دە ءۇيسىز-كۇيسىز ءجۇر. سىرتتان كەلگەن قانداسىمىزدى جارىلقايمىز با، الدە وسىندا جۇرگەندەرگە جاعداي جاسايمىز با؟ سول سەبەپتەن ەلىمىزگە كەلسەڭدەر بار جاعدايعا كونىگۋ كەرەك. سەندەر موڭعولياعا كوشىپ بارعاندارىڭدا «وي، قازاق باۋىرلارىمىز كەلىپ قالىپتى دەپ قۇشاعىن اشىپ، جاعدايىڭدى جاساپ ەشكىم كۇتىپ العان جوق. باردىڭدار. ءسىڭىسىپ كەتتىڭدەر. امان قالعاندارىڭا شۇكىر»، - دەپ ايتقانىم بار. كەلەمىن دەگەندەرگە وسىنى ءتۇسىندىرىپ ايتىپ جاتىرمىز. كەلسىن. تۋعان جەرى. وسى ەلمەن بىرگە كورسىن. تاۋەلسىزدىگىمىزدى الىپ، ەندى ەسىن جيىپ كەلە جاتقان مەملەكەتپىز. قايتا ولار كەلسە، پايداسى مول. قازاق ءتىلىنىڭ، رۋحانياتىمىزدىڭ دامۋىنا سەپتىگىن تيگىزەر ەدى.