قازاقستاننىڭ تاۋەلسىزدىك العانىنا 25 جىل بولدى. قازاقستان سودان بەرى شەتتەن كەلگەن قازاقتاردى قابىلداپ جاتىر. ەشكىمدى كەۋدەسىنەن يتەرىپ جاتقان جوق. سولاي بولا تۇرسا دا، ءبىزدىڭ اۋىلدىڭ ءالى ىرگەسى سوگىلە قويعان جوق. ياعني، ءبىزدىڭ اۋىلدان بىردە- ءبىر وتباسى قازاقستانعا كوشپەي وتىر. بۇل نەدەن؟ مۇنىڭ قانداي سەبەبى بار؟
ءبىز كۇندە بولماسا دا، جىل ارالاتا قازاقستانعا كەلىپ-كەتىپ تۇرامىز. سونداعى كورگەندەرىمىز ءبىزدى ۇركىتىپ- شوشىتا بەرەدى. ماسەلەن، قازاقستانداعى بيلىك - ورىس تىلدىلەردىڭ قولىندا. ول جەرگە قازاق تىلدىلەر كىرە دە، ەنە دە المايدى... بيلىك كىمنىڭ قولىندا بولسا، سونىڭ دەگەنى بولاتىنى دا بەلگىلى.
جوعارى وقۋ ورىندارى - تۇگەل ورىسشا. قازاقستاندا تۇراتىن باۋىرلارىم «قازاق ءتىلىن بىلمەيتىن قازاقتار - حالىقتىڭ 40 پايىزى» دەيدى. مەنىڭ ءوز باسىما قازاق ءتىلىن بىلمەيتىندەر بۇدان الدەقايدا كوپ بولىپ كورىنەدى. بالكىم، 60 پايىز. ويتكەنى مەن قازاقستانعا كىرگەننەن قايتقانشا ەستيتىنىم - تەك ورىسشا: ورىسشا ءسوز، ورىسشا ءان، ورىسشا تەلەحابار، ورىسشا راديو حابار، ورىسشا بوقتاۋ... تاشكەنتكە كەلىپ، سونان كەيىن اۋىلىما كىرگەندە ءبىر-اق ەستيمىن قازاقشانى. «ۇرپاعىمىز قازاقستانعا بارىپ ورىس بولىپ كەتكەنشە، وسىندا ءجۇرىپ وزبەك بولعانى الدەقايدا جاقسى ەمەس پە؟! ءتىلىن ساقتايدى (وزبەكتىڭ ءتىلى قازاق تىلىنە جاقىن عوي،) مۇسىلمانشىلىعىن ساقتايدى» دەپ ويلاپ وتىرمىز قازىر. ەگەر قازاقستان دا وزبەكستان سەكىلدى مەملەكەتتىك ءتىلىن كۇشەيتىپ، قازاقتانىپ، قازاقشاسىن جولعا قويىپ جاتسا، وندا ءبىز دە قازاقستانعا، اتا جۇرتقا كوشەر ەدىك.
ءالمۇحان قۇرمانالى، تاشكەنت، وزبەكستان
"جاس الاش" گازەتى