بۇل تۋرالى ق ر سىرتقى ىستەر ءمينيسترىنىڭ باسپا ءسوز حاتشىسى ءانۋار جايناقوۆ ءمالىم ەتتى.
«نيسسا دا بولعان تەراكتىگە بايلانىستى، فرانسيا حالقىنا كوڭىل ايتامىز. الدىن الا مالىمەت بويىنشا، قازا تاپقاندار مەن زارداپ شەككەندەر اراسىندا قازاقستاندىقتار جوق. دەگەنمەن، تەراكتى بولعان جەردە قازاقستاننىڭ ءتورت ازاماتى جۇرگەن. تۇندە ق ر سىرتقى ىستەر مينيسترلىگىنە قازاقستان ازاماتى حابارلاسىپ، نيسسا قالاسىنداعى «اعىلشىن جاعالاۋىنا» جاقىن جەردەگى قوناق ۇيدە وتىرعانىن جانە جانىندا تاعى ءۇش ادام بار ەكەنىن ءمالىم ەتتى. ولار ومىرلەرىنە قاۋىپ تونەدى دەپ قورىققان. تەرەزەدەن قازا تاپقانداردى، قاشقان ادامداردى كورگەن. بىزدەن كومەك سۇرادى. قازاقستاننىڭ ديپلوماتتارى شۇعىل تۇردە ولارعا حابارلاستى. قازىر ءتورت ازامات تا قاۋىپسىز جەردە. ەشقايسىسى زارداپ شەككەن جوق»، - دەدى ءا. جايناقوۆ.
ونىڭ ايتۋىنشا، نيسسا دا جۇرگەن ءتورت ازامات ەرلى- زايىپتىلار وتباسى جانە ولاردىڭ ەكى تۋىسقانى. تورتەۋى دە بۇل ەلگە تۋريست رەتىندە بارعان. قازىر ولار وزدەرى توقتاعان قوناقۇيدە جاتىر.
اۆتور: كەنجەكەي توقتامۇرات قىزى