ەلىمىزدە مەملەكەتتىك تىلدە تارالاتىن تۇڭعىش شەتەلدىك باسىلىمنىڭ العاشقى سانىندا ەلباسى ن. نازاربايەۆتىڭ قۇتتىقتاۋى جاريالانعان.
بەدەلدى باسپا برەندى ورتا ازياعا العاش رەت قادام باسىپ، سونىڭ ىشىندە قازاقستاندا قازاق تىلىندە جاريالانىپ وتىر. العاشقى ساننىڭ ءبىرىنشى بەتىندە ەلباسى نۇرسۇلتان نازاربايەۆتىڭ قۇتتىقتاۋ حاتى جاريالانعان. وندا ەلباسى: «مەن الەمگە ايگىلى باسىلىمنىڭ قازاق جەرىندە، قازاق تىلىندە جارىق كورۋىن انا ءتىلىمىزدىڭ حالىقارالىق دەڭگەيدەگى تاعى ءبىر جەتىستىگى دەپ باعالايمىن»، - دەپ اتاپ وتەدى.
سونداي- اق، مەملەكەت باسشىسى ۇلى دالاداعى ايشىقتى تابيعات پەن شەجىرەلى تاريحتى، كەڭ بايتاق قازاقستاننىڭ تۋريستىك الەۋەتىن دايەكتى دەرەكتەرمەن بايانداپ، الەم جۇرتىنا جان- جاقتى ناسيحاتتاۋ - ەڭسەلى ەلدىكتىڭ بەلگىسى ەكەنىن ايتادى.
بۇگىنگى كۇنى وسىناۋ عىلىمي- تانىمدىق گەوگرافيالىق جۋرنالىن رەسپۋبليكامىزدىڭ بارلىق وڭىرلەرىندەگى گازەت- جۋرنال ساتاتىن دۇڭگىرشىكتەرىنەن تابۋعا بولادى.
بەدەلدى باسپانى شىعارۋشىلاردىڭ ايتۋىنشا، جۋرنالدىڭ باستى ماقساتى - قازاق ەلىنىڭ باعا جاتپەس ءارى قايتالانباس باي تابيعاتىن، جانۋارلار دۇنيەسى مەن وسىمدىكتەر الەمىن ناسيحاتتاۋ، سونداي- اق وتاندىق عالىمدار مەن زەرتتەۋشىلەردى جان- جاقتى قولداۋ. بۇدان بولەك، جۋرنال اعىمداعى جىلى ءبىرقاتار ەكسپەديتسيالار ۇيىمداستىرىپ، فوتوكورمەلەر وتكىزۋدى دە جوسپارلايدى.
«قازاقستاننىڭ عاجايىپ، سۇلۋ تابيعاتىن اتاعى جەر جارعان فوتوگرافتاردىڭ كوزىمەن الەمگە كورسەتۋ، ەلدىڭ تاريحىن، ارحەولوگيالىق قازبا جاڭالىقتارىن مەملەكەتتىك تىلدە تاراتۋ - بۇل اۋقىمدى جوسپارىمىزدىڭ ازعانا بولىگى. جۋرنال ءوزىنىڭ العاشقى سانىنان- اق، ەلىمىزدەگى ەكولوگيالىق پروبلەمالارعا، سونىڭ ىشىندە ارال تەڭىزىنىڭ تارتىلۋىنا قاتىستى ماسەلەلەرگە جۇرتشىلىقتىڭ نازارىن اۋدارادى. «ارال تاعدىرى - ادام تاعدىرى» دەپ اتالاتىن ماقالادا عالامشارىمىزدىڭ ەڭ ۇلكەن سۋ قويماسى، ورتالىق ازيانىڭ ماڭىزدى ستراتەگيالىق نىسانى - ارال تەڭىزىنىڭ بۇگىنگى جاي- كۇيى باياندالعان»، - دەلىنگەن باسپا ءسوز بايانىندا.
ايتا كەتەيىك، « National Geographic » گەوگرافيالىق قاۋىمداستىعى 1888 - جىلدىڭ قاڭتارىندا قۇرىلىپ، الەمدەگى ەڭ ءىرى كوممەرتسيالىق ۇيىمعا اينالعان بولاتىن. گەوگرافيالىق ءبىلىم مەن عىلىمدى ناسيحاتتاپ، تاراتۋ ماقساتىندا قۇرىلعان ۇيىمعا التى اي وتكەندە، 1888 - جىلدىڭ قازانىندا الەمدىك جۋرنال العاش رەت جارىق كوردى. ونىڭ جاھاندىق ميسسياسى - عىلىمي، ءبىلىم جانە قورشاعان ورتانى قورعاۋ باعدارلامالارىنا قولداۋ ءبىلدىرۋ بولدى. قاۋىمداستىق وسى باعىتتا 9000-نان استام جوبانى قارجىلاندىرعان.
National Geographic الەمنىڭ 38 تىلىندە شىعاتىن جۋرنالدان بولەك كىتاپتار باسىپ، تەلەباعدارلامالار مەن فيلمدەر ءتۇسىرىپ تاراتادى.
وسىلايشا، 128 جىلدان بەرى ءوز ءداستۇرىن قالىپتاستىرعان بەدەلدى باسىلىم، ساياساتتان باسقانىڭ بارلىعىن قاۋزايدى. بۇگىنگى تاڭدا جۋرنال الەمنىڭ 80 مەملەكەتىنە تارالادى. National Geographic قاۋىمداستىعىنىڭ قامتيتىن اۋديتورياسى 600 ميلليون ادامنان اسادى. جۋرنالدىڭ ءاربىر سانى ميلليونداعان وقىرماندارعا الەمدىك دەڭگەيدەگى قايتالانباس ءارى ەرەكشە ساپالى فوتوسۋرەتتەر ۇسىنىپ، ادامزاتتى قورشاعان ورتانى ايالاۋعا، ىزگىلىككە شاقىرادى.
اۆتور: قانات مامەتقازى ۇلى