پارلامەنتتەگى ءۇش پارتيالىق فراكسيالار وكىلدەرىنىڭ مەرزىمىنەن بۇرىن ءماجىلىس جانە بارلىق دەڭگەيدەگى ءماسليحاتتار سايلاۋلارىن وتكىزۋ جونىندەگى باستاماسى قازاقستان جۇرتشىلىعىن ءدۇر سىلكىندىرگەنىن «ەگەمەن قازاقستاننىڭ» بەتتەرىندە كۇندە جاريالانىپ جاتقان پىكىرلەر كۇندەلىكتى جاريالانۋدا. بۇل باستاما، سونىمەن بىرگە، حالىقارالىق قوعامداستىقتىڭ دا نازارىن اۋدارىپ وتىر. بۇگىن باسىلىم شەتەل ساراپشىلارىنىڭ وسى ۇسىنىسقا وراي بىلدىرگەن پىكىرلەرىنىڭ توپتاماسىن «مەرزىمىنەن بۇرىن سايلاۋ وتكىزۋ: شەتەلدىك ساراپشىلار نە دەيدى؟» دەگەن تاقىرىپپەن ۇسىندى. ماسەلەن، گەرمانيا بۋندەستاگىنىڭ دەپۋتاتى گەنريح سەرتيكتىڭ ويىنشا، قازاقستاندىق ارىپتەستەرى دۇرىس شەشىم قابىلدادى. «مەن قازاقستاندىق ارىپتەستەرىمنىڭ شەشىمىنە سەنەمىن. بۇل ءدال ۋاقىتىندا، ويلاستىرىلا شەشىلگەن. قازاقستاندا ۇلت جوسپارى قابىلداندى، ەلدەرىڭىز وسى رەفورمانى ورىنداۋ جولىمەن ءجۇرىپ كەلەدى. الەمدە تۇراقسىزدىق ورىن الىپ جاتقاندا، وسىنداي باعىتتا العا قاراي جىلجۋ وتە دۇرىس شەشىم. ال جاڭا ءماجىلىس پرەزيدەنت العان قويعان تاپسىرمالاردى ورىنداۋعا جاڭا كۇشپەن كىرىسەدى»، - دەيدى ول.
پارلامەنت ءماجىلىسىنىڭ دەپۋتاتى، اۋعان سوعىسى ارداگەرلەرى ۇيىمدارىنىڭ «قازاقستان ارداگەرلەرى» قاۋىمداستىعىنىڭ ءتوراعاسى باقىتبەك سماعۇلمەن «ەگەمەن قازاقستان» گازەتىنىڭ ءتىلشىسى اراسىنداعى سۇحبات باس باسىلىمنىڭ بۇگىنگى نومىرىندە جاريالاندى. نەگىزىنەن ءدىن ماسەلەسىنە، دايش سودىرلار توبىنا قاتىستى وربىگەن سۇحبات بارىسىندا ب. سماعۇل: «ءبىزدىڭ توپىراعىمىزدا ورنىققان يسلام ءدىنىنىڭ حانافي مازحابىنا قاتىپ قالعان قاساڭ قاعيدالار مەن ءبىرجاقتىلىق جات دەپ ويلايمىن. مەن تەرىس يدەيالاردىڭ جەتەگىندە كەتكەن بازبىرەۋلەر ايتاتىنداي، «ساقالىڭ ءبىر تۇتامنان اسپاسا، مۇسىلمان ەمەسسىڭ» دەۋشىلەردى ءوز باسىم قۇپتاي المايمىن. ماسەلە، تەك ساقالدا بولسا، مەن كورگەن اۋعانستان دۇنيەجۇزىندەگى وزىق ەلدەردىڭ قاتارىندا بولار ەدى عوي... مەن سوندىقتان دا قازاقستان ازاماتتارىن الاۋىزدىقتىڭ اسەرىنەن باسىنان باعى تايىپ، سوعىس ورتىنە ورانعان الىس- جاقىن ەلدەردىڭ بۇگىنىنەن ساباق الىپ، ءوز ەلىمىزدە بەرىك ورنىققان تىنىشتىق پەن كەلىسىمدى قادىرلەۋگە شاقىرامىن. ءبىز ءتۇتىنى ءتۇزۋ شىعاتىن قۋاتتى ەل بولۋىمىز ءۇشىن عىلىمعا، بىلىمگە، جاڭاشىلدىققا جاقىن بولىپ، ەلىمىزدىڭ تۇتاستىعى مەن تۇراقتىلىعىن قاشاندا باستى ورىنعا قويۋىمىز قاجەت دەپ بىلەمىن»، - دەيدى. سۇحبات تاقىرىبى: «يماندى ايدالادان ەمەس، اينالاڭنان ىزدە».
***
قازاقستاننىڭ بىرنەشە قالاسىندا ءبىر- بىرىنەن اۋمايتىن قالالىق اڭىز بار. ول جول بويىندا كولىك توقتاتىپ تۇراتىن ەلەس قىز جايىنداعى اڭگىمە»، - دەپ جازادى «ەكسپرەسس ك» گازەتى سەنبىلىك سانىنداعى «پريزراكي ۆىحوديات نا تراسسۋ» دەگەن تاقىرىپتاعى ماقالاسىندا. كوركەمدىك دەتالدارعا ساي كەلەتىن وسىناۋ اڭىز ءتۇرلى قالالاردا جەلدەي ەسۋدە. ماسەلەن، بۇل قىز الماتىدا قاپشاعاي تاس جولى بويىنشا كولىك توقتاتىپ تۇرادى. جۇرگىزۋشىلەر دە ءبىراۋىزدان ول قىزدىڭ اياعى اتتىڭ تۇياعىنا ۇقسايتىندىعىن ايتادى. ەڭ باستىسى، الگى ەلەس قىز كولىكتىڭ سوڭىنا تۇسكەن كەزدە تەرىس بۇرىلىپ قاراماۋ كەرەك. ويتكەنى، جۇرگىزۋشىنىڭ قورىققانىنان قۋات الاتىن قىز قۋىپ جەتۋى مۇمكىن. ال استانا مەن الماتىدا بۇل ەلەس قىز قالا سىرتىندا تاكسيست قىلمىسكەردىڭ قولىنان قازا تاپقان جان. ادەتتە، قىز توقتاعان كولىك جۇرگىزۋشىسىنە ءوز ءۇيىنىڭ تەلەفون ءنومىرىن ايتىپ، اتا-اناسىنا ءوزىنىڭ جاعدايىنىڭ جاقسى ەكەندىگىن ايتۋدى وتىنەدى ەكەن. ال اتالعان نومىرگە حابارلاسقان ادام ونىڭ اتا- اناسىنان قىزدارىنىڭ قايتىس بولىپ كەتكەندىگىن ەستيدى. ماقالادا الماتىلىق ينجەنەر مەرەي رىسكەلديەۆتىڭ ءسوزىن كەلتىرگەن.
اۆتور: مارلان جيەمباي