قازاقستان پرەزيدەنتى جارىلىس تۋرالى حاباردى زور كۇيزەلىسپەن قابىلداعانىن اتاپ وتكەن.
«بۇگىندە تەرروريزم بۇكىل ادامزاتقا ۇلكەن قاتەر ءتوندىرىپ وتىر. بۇل زۇلىمدىقتى تەك كۇش-جىگەر جۇمىلدىرۋ ارقىلى عانا جەڭۋگە بولادى. قازاقستان بەيبىت ءومىر مەن ەلدەرىمىزدىڭ قاۋىپسىزدىگىن قامتاماسىز ەتۋ ءۇشىن زاماناۋي سىن- قاتەرلەرگە قارسى كۇرەس جولىندا تۇركيامەن تىعىز ىنتىماقتاستىقتى جالعاستىرۋعا دايىن»، - دەلىنگەن جەدەلحاتتا.
نۇرسۇلتان نازاربايەۆ قازا بولعانداردىڭ تۋىستارىنا قازاقستان حالقىنىڭ جانە جەكە ءوزىنىڭ اتىنان كوڭىل ايتتى، سونداي- اق زارداپ شەككەندەردىڭ تەزىرەك ساۋىعىپ كەتۋىنە تىلەكتەستىگىن ءبىلدىردى.
سونداي-اق، كوڭىل ايتۋ جەدەلحاتى تۇرىك رەسپۋبليكاسىنىڭ ستامبۋل قالاسىندا بولعان تەررورلىق اكت سالدارىنان نەمىس ازاماتتارىنىڭ قازا تابۋىنا بايلانىستى گەرمانيا فەدەرالدىق كانتسلەرى انگەلا مەركەلگە جولداندى. جەدەلحاتتا قايعىلى وقيعا تۋرالى حاباردى ەلباسىنىڭ زور كۇيزەلىسپەن قابىلداعانى ايتىلعان.
«قازاقستان جاھاندىق قاۋىپسىزدىككە قاتەر توندىرەتىن تەرروريزم مەن ەكسترەميزمنىڭ كەز كەلگەن ءتۇرىن ايىپتايدى جانە بۇكىل حالىقارالىق قوعامداستىقتىڭ وعان قارسى كۇرەسىن قولدايدى»، - دەلىنگەن جەدەلحاتتا.
نۇرسۇلتان نازاربايەۆ قازاقستان حالقىنىڭ جانە جەكە ءوزىنىڭ اتىنان ا. مەركەلگە، قازا بولعانداردىڭ تۋىستارى مەن جاقىندارىنا، سونداي-اق بۇكىل گەرمانيا حالقىنا شىن نيەتپەن كوڭىل ايتتى.