«9 - قاڭتاردا قاراعاندى وبلىسىنىڭ اكىمى نۇرمۇحامبەت ابدىبەكوۆ بۇقار جىراۋ اۋدانىنىڭ بوتاقارا كەنتىندە قازاق تىلىندە وقىتاتىن جاڭا ورتا مەكتەپتىڭ اشىلۋىنا قاتىستى. ونىڭ قۇرىلىسى 2014 - جىلعى ماۋسىمنان بەرى «ءبىلىم بەرۋدى دامىتۋ» مەملەكەتتىك باعدارلاماسى بويىنشا جۇرگىزىلىپ جاتقان ەدى»، - دەلىنگەن حابارلامادا.
جاڭا مەكتەپ 484 ورىنعا ارنالعان، ءۇش قاباتتى عيماراتتىڭ اۋدانى - 6400 شارشىمەتر. شەبەرحانا، مۋلتيمەديالىق، لينگافون كابينەتتەرى، كاسىپتىك باعدارلاۋ زەرتحاناسى بار. مامانداندىرىلعان حيميا، فيزيكا جانە بيولوگيا كابينەتتەرى جاساقتالعان. مەكتەپ قۇرىلىسىنا وبلىستىق بيۋدجەتتەن 902 ميلليون تەڭگە ءبولىندى.
«ساپالى ءبىلىم - الەمنىڭ دامىعان 30 ەلىنىڭ قاتارىنا كىرۋگە ۇمتىلىپ وتىرعان ەلدىڭ ويداعىداي دامۋى فاكتورلارىنىڭ ءبىرى. ەل بولاشاعى ءبىزدىڭ مەكتەپ وقۋشىلارىمىزدىڭ قولىندا، سوندىقتان دا مەملەكەت باسشىسى جالپى ءبىلىم بەرەتىن جۇيەنىڭ ماتەريالدىق- تەحنيكالىق بازاسىن جاڭارتۋعا ايرىقشا كوڭىل ءبولىپ وتىر»، - دەدى ن. ابدىبەكوۆ مەكتەپتىڭ اشىلۋىندا.
بۇدان بۇرىن بوتاقارادا ءبىر عيماراتقا جالپى ءبىلىم بەرەتىن جانە مۋزىكالىق مەكتەپتەر ورنالاسقان بولاتىن. بولمەلەر وقۋشىلار ءۇشىن تار بولدى، سپورت زالى بولماعان. جاڭا مەكتەپ سالىنۋىمەن بۇل پروبلەما شەشىلدى.
جاڭا مەكتەپتەگى ساباقتار ەكىنشى جارتىجىلدىقتان باستالادى. مۇندا 55 مۇعالىم جۇمىس جاسايدى، ولاردىڭ اراسىندا «ديپلوممەن - اۋىلعا» باعدارلاماسى بويىنشا كەلگەن جاس ماماندار بار.