مارسقا باراتىن ەرىكتىلەر قاي ايماققا قونعانى دۇرىس

ەندى مارسقا ۇشاتىن اپپاراتتاردىڭ جابدىقتارىن دايىنداۋ، ساپاردى جوسپارلاۋ جۇمىستارى باستالدى.

NASA مارسقا ۇشاتىن ەرىكتىلەر قىزىل عالامشاردىڭ قاي ايماعىنا، قاي نۇكتەسىنە قونعانى دۇرىس، سونى تالقىلاۋدى باستادى. NASA وسى ماسەلەنى الەمنىڭ تانىمال عالىمدارىمەن اقىلداسىپ شەشۋدى قۇپ كورەدى.

ۋكراينانىڭ حاركوۆ قالاسىندا تۇراتىن عالىم، گيدروگەولوگ ۆالەري ياكوۆليەۆ - مارس بەتىندە سۋ كوزدەرىن بۇرىننان زەرتتەپ جۇرگەن عالىمداردىڭ /بىرى. ول سونداي- اق NASA - مەن بىرىگىپ جۇمىس ىستەيدى. بۇعان دەيىن ۆ. ياكوۆليەۆ ا ق ش- تىڭ ۇلتتىق عارىش اگەنتتىگىنە مارس بەتىندە زەرتتەۋ جۇرگىزەتىن اپپاراتتاردى قىزىل عالامشاردىڭ قاي بولىگىنە جىبەرۋ كەرەك، سول جونىندە اقىل- كەڭەس بەرگەن.

ەندى عالىم مارسقا باراتىن ەرىكتىلەر قاي ايماققا قونعانى دۇرىس، سونى ساراپتاۋ ۇستىندە. قازىرگى كەزدە NASA قىزىل عالامشار بەتىندەگى 46 جەردى قاراستىرىپ جاتىر.

ۆ. ياكوۆليەۆتىڭ ويىنشا، ەكسپەديتسيانىڭ قاتىسۋشىلارىن مۇز قورى ۇلكەن، قاتقان تاۋ جىنىستارىنان تۇراتىن الىپ تاۋلاردىڭ جانىنا ءتۇسىرۋ كەرەك. بۇل ەرىكتىلەردى سۋ قورىمەن قامتاماسىز ەتۋدى جەڭىلدەتەدى. ويتكەنى جەر وربيتاسىنىڭ وزىنە سۋ قورىن الىپ شىعۋدىڭ قۇنى 20 مىڭ دوللار تۇرسا، مارسقا سۋ جەتكىزۋ بۇدان دا قىمباتقا تۇسپەك.

الايدا مارسقا اتتاناتىندار ءۇشىن الدىڭعى كەزەكتە تۇرعان ماسەلە - عالامشارعا امان- ەسەن جەتۋ. مىقتى تەحنيكانى پايدالانعان كۇننىڭ وزىندە جەردەن مارسقا جەتۋ ءۇشىن التى اي كەتەدى. ونىڭ وزىندە قىزىل عالامشارعا بەلگىلى ءبىر ۋاقىتتا عانا ۇشۋ كەرەك. ال بۇل ءسات ەكى جىلدا ءبىر- اق رەت تۋادى ەكەن. وسى ۋاقىتتا مارس پەن جەر اراسىنداعى اراقاشىقتىق مەيلىنشە قىسقارادى.

NASA - نىڭ جوسپارىنا قاراعاندا، مارسقا ۇشاتىندار ەڭ الدىمەن قىزىل عالامشاردىڭ سەرىگى - فوبوسقا توقتاپ ايالدايدى. «مارسقا جەتۋ قيىن. مارسقا جىبەرىلگەن اپپاراتتاردىڭ جارتىسىنان ازى عانا قىزىل عالامشارعا جەتتى. بالكىم، ادامدار مىنگەن عارىشتىق كەمە ولاردى مارسقا جەتكىزەتىن دە شىعار. ءبىراق ولار ءدىن امان جەتە مە، ماسەلە سوندا. جەردىڭ ماگنيتتىك ورىسىنەن شىققان كەزدە، عارىشتىق كەڭىستىكتە ادامدار زياندى ساۋلەلەنۋگە ۇشىرايدى. مارستىڭ بەتىندەگى زياندى ساۋلەلەنۋ دە وتە جوعارى، سەبەبى ونىڭ ماگنيتتىك ءورىسى جوق. سوندىقتان قىزىل عالامشاردا بىرنەشە اي ءومىر سۇرگەن ادام وسىنىڭ كەسىرىنەن مەرت بولۋى مۇمكىن»، - دەيدى زەرتتەۋشى.

عالىمدار بۇدان شىعار جولدى ىزدەستىرىپ جاتىر. ەرىكتىلەر جەتكەنشە، مارستىڭ بەتىنەن ءبىر مەتر تەرەڭدىكتە ساۋلەلەردەن قورعايتىن بازا سالۋعا بولادى. تاعى ءبىر نۇسقاسى، كۇن ساۋلەسىن ءتۇسىرىپ، زياندى ساۋلەلەردى ۇستاپ قالاتىن كۇمبەز تۇرعىزۋ. قىسقاسى، NASA ەرىكتىلەردىڭ ءومىرىن قاۋىپ- قاتەردەن امان الىپ قالۋدىڭ بارلىق جولدارىن قاراستىرۋدا.

«جاس الاش» گازەتى